Ezekieli 28 - KITABU KITAKATIFU

Ovoporofeti kuhingira Mwami wa Tiro

¹ Yahova yamoloma ninzi.

² Yavoola, “Mwana wu Mundu, ovoolere mwamihi wa Tiro aga Inzi Yahova Wuvunyali mboraa kuye: Oveeye ni liegingira mu mwoyo gwugwo, wevoola ndi oveeye munyasaye. Ovola ndi wikala kondeve yu vwami kuli munyasaye, hagati hi zinyanza. Unyala kwevoora kuva mugeri kuli mu nyasaye, navuzwa si oveeye mu nyasaye mba, oveeye mundu vuzwa.

³ Uganagana oveeye umugeri kuvita Danieli, si liveeye ho likuva linyala kuviswa kutura ku ivi mba.

⁴ Ovogeri vuvwo kandi limanyiriza liilio liakokola konyoora uvutugi, kandi wavungiza izahabu kandi ifeza mu mavikiru googo.

⁵ Wameeda uvutugi vuvwo kigira ovogeri ovonene vwi limanya mu likiranyia. Oveeye ni liegingira, kigira uvutugi vuvwo uvunyingi!

⁶ “Maku kalunu, yaga nigo aga Inzi Mwami Munene Yahova mboraa: Kigira uganagana oveeye umugeri kuli munyasaye,

⁷ Ndaleta avasigu vukutihiza kuza kukwingilira. Valakulwaana nukwononyia vindu vivio vilahi via wanyoola novogeri vuvwo, kandi nuvutugi vuvwo vwosi.

⁸ Valakwita kandi valakusiuva hagati hinyanza.

⁹ Lwa vaza kukwita, ulazizagilira kovora oveeye nyasaye imbiri wavo? Si ulava nyasaye mba, navuzwa ulava mundu vuzwa imbiri wa yavo avakwita.

¹⁰ Ulakitwi kuli imbwa navageni vataveeye avasuuvirifu. Inzi Yahova Wuvunyali, mali kovora.”

Liigwa Liu Mwami wa Tiro

¹¹ Yahova yamoloma ninzi kandi.

¹² Yavoola, “Mwana wu Mundu, usiome kigira mwami wa Tiro. Umuvolere aga Inzi Yahova Wuvunyali mboraa: Ivi waali kelolero chu vuduukiru, kandi waali novogeri vunyingi ligali kandi wi ligondo lilahi ligali.

¹³ Ivi wamenyaa mu Edeni, mulimi gwa Nyasaye. Wiviika zinguvu zing'ano zinyingi ziu vuguli vudinyu; zinzakanyu, zia topazi, zie limasi, zie berulo, zie Sokamu, zie jasipi, zie safiro, zio vong'orang'ore, zie Saridoniki kandi zie zahabu. Zinguvu yizi zialomberwa ivi ku lidiku lia walombwa.

¹⁴ Ndaatovora engelosi yukutihiza ningekola kuva mulindi woovo, wamenya ku Kiguru change kitakatifu. Kandi wagenda hagati ha magina gu muliru.

¹⁵ Ivi waali vugira imbara kutura ing'inga ya walombwa, kuduuka lwa wataanga kokora uvudamanu.

¹⁶ Mu vunyingi vwi likiranyia liilio, yaga gakokola kuva ni kirage kandi kokora uvwoni. Kulwayago, ndaakuniga kutura mu kiguru change kitakatifu, kandi engelosi yakulinda yaakukunga kutura hagati ha magina gu muliru.

¹⁷ Waali ni liegingira kigira waali mundu wi ligondo lilahi ligali, kandi limanyikana liilio liakokola vindu kuli musiru. Kigira yaga, ndaakusiuva mu kivala kandi ningunaavula havulavu imbiri wa vami, vaduuki kokolola.

¹⁸ Wakola vwoni vunyingi mu likiranyia liilio, kandi niwononyia vuli havundu hukusigamira misambwa. Kulwayago ndaaleeta muliru kusamba lidaala linene lidodoka. Yavo vosi vamuhenza kalunu vamulola kuva ligoke.

¹⁹ Avandu vosi avakumanya hagati hi zihiiri valava niligenya ku ivi. Umali kuduuka ku keheri chukutiihiza kandi siulamenya mihiga ni mihiga mba.”

Ovoporofeti vwu kuhaana mageri ku Sidoni

²⁰ Yahova yambolera,

²¹ “Mwana wu Mundu, ohenze ku lidaala lia Sidoni ma oporofete kigira kuhaana mageri kulio.

²² Ovoolere avandu mu lidaala yilio ndi, Inzi Yahova Wuvunyali mboraa yaga kuvo: Mbeeye musigu winyu, avandu va Sidoni; avandu vandi valanzizominya kigira agaamali kokora ku munyi. Valamanya ndi Inzi mbeeye Yahova, lwa manyia kuli mbeeye mutakatifu mu lihaana mageri ku yavo avamenyaa hagati hinyu.

²³ Ndatuma uvulwaye ku munyi, kandi amasahi galizula mu zinzira zienyu. Avasigu valamwingilira ku zimbega ziosi, kandi valiita vandu vinyu vosi. Maku mulamanya ndi Inzi mbeeye Yahova.”

Avandu va Isiraeli valakagasizwi

²⁴ Yahova yavoola, “Avandu va Isiraeli si valakumbirizwa kandi ni zihiiri ziveeye zinduru kuvo mba; avaveeye kuli zindavati anoho amafa gavasalirizaa mba. Maku valakamanye ndi Inzi mbeeye Yahova Wuvunyali.”

²⁵ Yahova Wuvunyali yavoola, “Ndiranyia vandu va Isiraeli kutura mu zihiiri uwandavasaranyia, kandi zihiiri ziosi zilamanya ndi, Inzi mbeeye mutakatifu. Avandu va Isiraeli valamenya mu kivala chavo aveene, kivala chandahana ku mutumikiri wange Yakobo.

²⁶ Valamenya mu kivala yiki mu mirembe. Valakumbake zinyumba kandi valakalimi milimi nukutaga Mizabibu. Ndahaana mageri ku zihiiri ziosi zia vaakolera kehenyahenye, kandi vandu va Isiraeli valakamenye mu mirembe. Maku valakamanye ndi Inzi mbeeye Yahova Nyasaye wavo.”