Ezekieli 27 - KITABU KITAKATIFU

Lwimbu Lwi Likuza Kigira Tiro

¹ Yahova yamoloma ninzi,

² Yavoola, “Mwana wu Mundu, wimbiri avandu va Tiro lwimbu lwi likuza,

³ Lidaala liveeye kundulu kwi inyanza ilikolaa likilanyia na vandu vamenya kundulu kuvuli inyanza. Ovoolere lidaala lia Tiro aga Inzi Yahova Wuvunyali mboraa: Munyi avandu va Tiro, mwigingiraa kigira uvudukiru vwinyu kandi uvulahi vwinyu.

⁴ Zinzako zienyu ziveeye hagati hi inyanza. Avumbaki vinyu vaamulomba kuli emeri indahi ligali:

⁵ vatumikira zimbaho zie misaala ji miberozi kutura ku kiguru cha Herimoni. Vaavugura musaala gwu mudaragwa kutura Lebanoni kokolombera umulage.

⁶ Vaavugura misaala ji miduguyu kutura Bashani nivalomba mivango ja maato. Valomba uvwaliru kutulaku musaala gwu munazi; kutura Saipurasi ahimbi ni inyanza, kandi ni valomba na miinu geenzogu.

⁷ Zimeri zienyu zialombwa ni zinguvu zie ikatani, mangirinya kutura Egebeti, zialoleka mukumanyikana kali nizive ihale. Zikatani zienyu zialombwa kutura ku zinguvu, zindahi, zie mizambarao kutura mu kisulu cha Saipurasi.

⁸ Avandu vinyu vi mivango ja maato vaatura mu madaala ga Sidoni na Arivadi. Avasaza vinyu vene avasiza kutura Zemeri vaali avandu vahiraa zimeri.

⁹ Avakulundu harara navasiza va Gebali vaali harara ni munyi, avahomeleraa ihura. Zimeri ziosi ziu munyanza harara na vandu vakolaamu miyinzi vaali harara ni munyi, vaakora likiranyia mu zimeri zienyu.

¹⁰ “Avasaza kutura Pasia, Lidia na Libia vaatumika kuli avasikari mu liihi lienyu. Vaasunga zingavo kandi zigudwa mu zinyumba zienyu ziu vulwani. Vaali avasaza vaamuletera luyali.

¹¹ Avasikari kutura Arivadi kandi Haleki vaalinda madigi ginyu, kandi avasaza kutura Gamadi vaalinda minaara jienyu. Vaasunga zinguva ziavo ku madigi ginyu. Vaali avasaza vamukola kuva avalahi ligali.

¹² “Avandu va Tarishishi vaakora likiranyia ni munyi kigira mwaali nu vutugi vunyingi ligali. Vaakora likiranyia lie ifeza, kivia, libati kandi lisasi ku mitungu ju vutugi vwinyu.

¹³ Avandu va Javani, Tubali na Mesheki vaakora likiranyia ni munyi. Vaaguliza vandu kuli avahambe kandi viju viu mugasa mu likiranyia liavo.

¹⁴ Avandu va Beza Togama vaagura zibarasi ziu kuyinzira, kandi zibarasi, ziu vulwani kandi zibunda.

¹⁵ Avandu va Dedani vaakora likiranyia ni munyi. Avandu vanyingi kutura muvivala viu ku inyanza vaamugulizira amiinu gi zinzogu kandi zimbaho ziu vuguli vudinyu kunangwa vanyoore ku ivindu vienyu.

¹⁶ Avandu va Edomu vaakora likiranyia ni munyi kigira uvutugi vwinyu vunyingi. Vaamugulizira zinguvu ziu vulidadi vwi mizambarao, zinguvu ziu vong'orang'ore, zikatani zindahi ligali, na magina makanyu guvuguli. Vaamugulizira kigira vutugi vwinyu.

¹⁷ Avandu vi Ivuyuda na avandu va Isiraeli vaakiranyia ni munyi. Vaamugulizira ingano kutura Minizi, amaguta, mizeituni, uvwuki kandi vifunya umwayu.

¹⁸ Avandu va Damasiko vaakora likiranyia ni munyi kigira vutugi vwinyu uvunyingi ligali. Vaamugulizira Iwaini kutura Heliboni kandi uvwoya uvulavu kutura Zahari.

¹⁹ Avandu va Dedani na Javani valeta kivia chatulwa, ovogongo, kandi mudarasini kutura Uzali kukiranyia ni munyi.

²⁰ Avandu va Dedani vaakiranyia ni munyi zinguvu ziu vuguli vudinyu ziu kuninira ku zibarasi.

²¹ Avandu va Arebia na aviimiliri vosi va Kedari vaali avakiranyi vinyu avamwayaanzilira mu likiranyia lie vimeme, amagondi amakole kandi zimburi.

²² Avandu va Sheba na Rama vakiranyia ni munyi. Mwagulana navo ku viosi vifunya mwayu mulahi ligali, amagina goosi guvuguli uvudinyu ligali, kandi izahabu.

²³ Avandu va Harani, Kane, Edeni, Sheba, Ashuru, na Kimadi vosi vakiranyia ni munyi.

²⁴ Vaamugulizira zinguvu zindahi ligali, zinguvu zie mizambarao, kandi ziu vong'orang'ore, mikeka ju vulidadi, ijavofwa harara ni migoye.

²⁵ Zimeri zia Tarishishi ziatumika kuginga viukukiranyia vienyu. Kunangwa mwaali ni misigo miliduhu ligali, hagati hinyanza.

²⁶ Avandu vinyu vi mivango ja maato vamuhira kuzia munyanza, Imbuza yu kudiviza kutura Ivugwi imali kumudivizira hagati hinyanza.

²⁷ Uvutugi vwinyu vwosi, vwu kukiranyia, avandu vosi avaari mumeri harara na vahiri vayo, avahili vemeri harara na vakiranyi, avasikari viliihi avaari mumeri vosi vaadiva lwemeri yinyu yaadivizirwa hagati hinyanza.

²⁸ Lihanzuka liayavo avaari mumeri liahulirika kulwuginga, kivala choosi chadegera.

²⁹ “Avandu vosi vi mivango ja maato valeka zimeri ziavo; Avatumikiri va maato harara na vandu vosi avaari mumato, vaatura ni vazia kusingila ku lujinga.

³⁰ Vosi vasioma vululu kigira munyi, vuhulanyia luguchi ku mitwi jiavo, kandi nivagalagala mu ligoke.

³¹ Vavega masu gaavo kigira munyi, kandi viviika zinguvu zia magunia. Vaali nu vuliduhu mu mioyo jiavo lwa vasioma.

³² Mu lisioma liavo ku munyi valira nivavoora: ‘Nivwaha oveeye kuli Tiro, uwadivizilwa hagati hi inyanza?’

³³ Lwa viukukiranyia vienyu viazia kuduuka muvivala viengeleka wi inyanza, mwigutizaa zihiiri zinyingi, Avami vaagwa avatugi kigira uvuhinda vwi vindu vienyu.

³⁴ Kalunu mumali kudivizirwa munyanza; miviri jinyu jiziiyi hasi mu luliva lwi inyanza. Viukukiranyia vienyu harara na yavo avamutumikiraa, vosi vamali kudiva harara ni munyi mu inyanza.

³⁵ “Avandu vosi avamenyi ahimbi nu lujinga lwinyanza vaveeye ni ligenya kigira lidivizwa lienyu. Kali avami vaavo vaveeye nuvuti vonene ligali vaveeye nuvuti ligali.

³⁶ Avakiranyi hagati hi zihiiri vamusekerizaa. Munyi mumali kuduuka ku keheri chi litihiza, kandi si mulavaho mihiga ni mihiga mba.”