Ezekieli 26 - KITABU KITAKATIFU

Ovoporofeti vwu Kudiviza Avandu va Tiro

¹ Yahova yamoloma na Inzi ku lidiku liu kutanga liu mweli, kumuhiga gwi likomi na mulala gwi lihaminywa lietu.

² Yavoola, “Mwana wu Mundu,” Yiki nicho kigira vandu va Tiro vasangala. Vahanzuka nivavoora, “Jerusalemi imali kudivizwa! Likiranyia lialio lie zinguru limali kohera! Si valahingana kandi nikunyi mba.”

³ “Kalunu yaga nigo aga Inzi, Mwami Munene Yahova, mboraa: munyi avandu va Tiro, Inzi mbeeye musigu winyu. Ndaleta zihiiri zinyingi kumwingilira, kandi zilaza kuli viguvuli vie inyanza.

⁴ Valakadivizi madigi gi lidaala lienyu linene, kandi navaturi hasi minaara jinyu. Maku nanduliziho vindu viosi ma nalitigale iliere.

⁵ Munyanza hagati, halava havundu hukuvagala zineti ziavaluvi. Inzi, Yahova Wuvunyali, mali kovora. Zihiiri zilakalanye Tiro,

⁶ valakiiti avandu vamenyi mu madaala gaavo ku kivala kenene ni vivavi. Maku avandu va Tiro navamanyirizi ndi, inzi mbeeye Yahova.”

⁷ Yahova Wuvunyali avoora, “Nziza koleta Mwami Munene kuvami vosi, Mwami Nebukadineza wa Babiloni kwingilira vandu va Tiro. Na yaze kutura Ivaale ni liihi linene, ni zibarasi, namagare gu vulwani kandi ni miganda ja vandu.

⁸ Avandu avamenyi mu madaala ku kivala kenene na vitilwi mu vulwani. Musigu alayava malina nukwumbaka vitumi, kandi alumbaka lidigi lidinyu lie inguuva ku munyi.

⁹ Valakaduyi mu madigi ginyu ni kindu chukusambula nukutuura hasi minaara jinyu ni viugi.

¹⁰ Zibarasi ziavo nazive zinyingi ligali kuduuka luguchi lwazio nalumukuniki. Madigi ginyu nagadegere kigira liyoga lie zibarasi ziu vulwani, kandi magare gu vulwani lwa nagingiri mu virivwa vienyu kuli avandu vingira mu lidaala linene lia madigi galio gamali kufudulanywa.

¹¹ Avasikari vaavo viliihi naviitili avandu vinyu mu zinzira zienyu. Zitiru zienyu zie zinguru zilagwa hasi.

¹² Vasigu vinyu valakalanye vuhinda vwinyu, kandi navalanye likilanyia lienyu. Navadivizi madigi ginyu ni zinyumba zienyu zindahi. Navasiuvi mu inyanza magina ginyu, zimbaho zienyu kandi zigongodo zienyu munyanza.

¹³ Ndaheriza zinyimbu zienyu zieliyoga, kandi zinyimbu zienyu ziuvukana; si zilahulirika kandi mba.

¹⁴ Ndamukora muve kuli ulwanda kandi mulagwa havundu hukuvagala zineti zie miluvo. Lidaala linene yili si lilumbakwa kandi mba. Inzi Yahova Wuvunyali mali kovora.”

¹⁵ Yahova Wuvunyali avooreraa lidaala linene lia Tiro ndi, “Lwa muva ni muguutwa, vandu vamenyi ahimbi ni inyanza navatihizwi kigira lilira lia yavo avitwaa.

¹⁶ Maku avanene vosi avamenyi ahimbi ninyanza navaturi ku zindeve ziavo ziu vwami, navatulizi zinguvu ziavo ziamangilinya kandi navatulizi zigaanza ziavo. Navave mulitiihizwa linene ligali kigira vuduamanu vwinyu, kali sinavalekele kodegera mba.

¹⁷ Valakamwimbiri lwimbu lwi lisioma yilu: Lidaala linene liamanyikana limali kudivizwa! Zimeri zialio zimali kutulizwa mu zinyanza. Avandu vi lidaala linene yili vamiiha kivala keveeye ahimbi ku inyanza, kandi vatihiza vosi avamenyi ahimbi ku inyanza.

¹⁸ Kalunu avandu vamenyi ahimbi kunyanza valadegera ku lidiku lie liigwa liilio; avandu vamenyi mu visulu vienyanza, vaveeye nuvuti kigira lidivizwa lienyu.”

¹⁹ Yahova Wuvunyali avoora: “Ndakamukole hazwa kuli lidaala liveeye mang'anye wumundu atamenyi. Ndakamukuniki na mazi gu mululiva lwinyanza.

²⁰ Ndamutuma muzie hasi mu kivala cha vakuzu muvugane harara na vandu vamenya muzing'inga ziakale. Ndamukora mumenye mu kivala chahasi yicho mihiga ni mihiga numuganda gwa vandu vakuzu. Kulwa gene yago si mwaza mumenye mu kivala cha vandu vaveeye mwoyo mba.

²¹ Ndakamukole muve kelolero chu kutihiza, kandi yili nalive limalirika lienyu. Avandu valakamwenye, navuzwa sinavamunyole kandi mba.” Yahova Wuvunyali umali kovooola.