Ezekieli 25 - KITABU KITAKATIFU

Ovoporofeti vwu Kudiviza Avandu va Amoni

¹ Yahova yamoloma ninzi.

² Navoora, “Mwana wu Mundu, ulandizi vudamanu vwavandu vikivala cha Amoni.

³ Uvavoolere vahulirizi aga Inzi, Yahova, Wuvunyali, mboraa: Munyi mwayanzilira kolola Litembeli liange nilionogonywa, kivala cha vandu va Isiraeli nikitigaye chere kandi kolola avandu vi Ivuyuda nivahiliywi mu lihaminywa.

⁴ Kigira mwayanzilira, Inzi ndakaleke zihiiri kutura muchangalangwe chi Ivugwi kumuguuta. Navumbake mahema gaavo mu kivala chiinyu ma navamenye mu. Navalie makuyu kandi navanwi maveere agaali gave ginyu.

⁵ Ndaza ngirung'anyie lidaala linene lia Raba kuva havundu hukutugira zing'amia, kandi kivala choosi cha Amoni kuva havundu hukutugira magondi, kunangwa munyi namumanye ndi inzi mbeeye Yahova.

⁶ “Yaga nigo aga Yahova Wuvunyali avoora: Mwakubaga makono kandi nimutumagira kigira vusangali. Munyi mwalegeliza kivala cha vandu va Isiraeli.

⁷ Kigira mwakora ndio, ndamuviiki muvunyali vwi zihiiri zindi iziaza zimunuuli kandi zimulanye. Ndamudiviza ligali kuduuka; si namuve ihiiri kandi mba, anoho si namuve kandi ni kivala chiinyu aveene mba. Maku namumanye ndi inzi mbeeye Yahova.”

Ovoporofeti vwu kudiviza Avandu va Moabu

⁸ Yahova Wuvunyali avoora, “Kigira vandu va Moabu vamali kovora ndi avandu vi Ivuyuda vaveeye vuzwa kuli avandu vi zihiiri zindi,

⁹ ndakaleke madaala manene aga kinga lwako lwa Moabu kwingilirwa, harara na madaala malahi ga Bezi Jeshimozi, Baali Meoni na Kiriazaimu.

¹⁰ Ndakaleke zihiiri zie changalangwi chi Ivugwi kuguuta vandu va Moabu, harara na vandu va Amoni, kunangwa vandu va Moabu si navave ihiiri kandi mba.

¹¹ Ndakahane mageri ku vandu va Moabu kandi valakamanye ndi inzi mbeeye Yahova.”

Ovoporofeti vwu kudiviza Avandu va Edomu

¹² Yahova Wuvunyali yavoola, “Avandu va Edomu vavaanzaa kisaalia kidamanu ku vandu vi Ivuyuda; akisaalia yicho chakola vandu va Edomu kuva nilihiolo liemihiga ni mihiga.

¹³ Kalunu nandizaa ndi, ndahaana mageri ku vandu va Edomu, kandi ndiita vuli mundu nizinyama. Ndakora Edomu kuva mang'anye kutura mu lidaala lia Temani kuduuka mu lidaala lia Dedani, kandi avandu valitirwa mu liihi.

¹⁴ Avandu vange va Isiraeli vaza vambanzili kisaalia ku vandu va Edomu, kandi na vakolere avandu va Edomu kolondekana nu vutima vwange vululu. Avandu va Edomu navamanye livanza kisaalia liange.” Yahova Wuvunyali umali kovora.

Ovoporofeti vwu Kudiviza Avandu va Filisitia

¹⁵ Yahova Wuvunyali avoora, “Avandu va Filisitia vamali kuvanza kisaalia nu mwoyo gwu kusaliriza ku vasigu vaavo vakale kandi ku vadiviza mulivihilirizwa liavo.

¹⁶ Inzi nandizaa ndi, ndingilira vandu va Filisitia nukuvadiviza. Ndadiviza vuli mundu uwatigala kukisulu chinyanza.

¹⁷ Ndaza mbahe mageri malulu, kandi nambanze kisaalia kidukiru kuvo. Maku navamanye ndi Inzi mbeeye Yahova lwa nambahe mageri mu vutima vwange vululu.”