Ezekieli 24 - KITABU KITAKATIFU

Inyingu Yokodekeramu

¹ Ku lidiku lie likomi ku mweli gwi likomi mu muhiga gwa tisa gwi lihaminywa lietu, Yahova yamoloma na inzi.

² Yavoola, “Mwana wu Mundu, ong'ode lidiku lia kalunu live liu kwizuliziraku, kigira yili ni lidiku liu Mwami wa Babiloni atangaa Likumberiza lidaala linene lia Jerusalemi.

³ Ovoole lugano yilu ku vandu vange avamali kwibaala, ulwa Inzi Yahova Wuvunyali mali kovora kigira yavo; Uviiki inyingu kumahiga ma witimu amazi gizuri mu du.

⁴ Uviiki mu vidonye vilahi vie inyama, mavega kandi zivazwa; Wizulizi mu vidonye vie vigumba via umali kotovola.

⁵ Utumikiri inyama indahi ligali yi ligondi; uviiki zingu mu mahiga. Oleke amazi gatavagili, ma odeeke vigumba kandi zinyama.”

⁶ Yaga nigo ga Yahova Wuvunyali avoora: “Kivi keveeye ku lidaala linene lia valumindi! Liveeye kuli inyingu yi zisisinia itanyala kwogizwa mba. Vidonye vie zinyama vimali kutulizwa muyo, kandi sikeveeye ho kedonye kali kilala ikimali kutigala mu mba.

⁷ Avandu va Jerusalemi vaaluminda vandu vataveeye nimbara mu lidaala linene. Sivaveeye avanyala kali kukunika masahi gasunduka ku lirova nuluguki mba.

⁸ Kumanyia uvutima vwange, Inzi mali kuviika masahi ga vaatahiza kulirova liumu, kunangwa gavuli kukunikwa.”

⁹ Yaga nigo ga Yahova Wuvunyali avoora: “Kivi keveeye ku lidaala linene lia valumindi! Inzi mwene ndavungiza zinganya zie zingu!

¹⁰ Ndavungiza zingu, kandi mbambizi muliru, mandeeke inyama vulahi kandi nzuganyie mu vidugiliru mandeeke vigumba vihie ligali.

¹¹ Maku ndaviika inyingu enzere ku manda gu muliru, ihie kuduuka yaakanye pa, kandi umugasa gwayo guhie, kunangwa iliiko liduuki kukamuluka muyo, kandi zisisinia ziayo ziduuki kukama.

¹² Inzi mali kokora miyinzi javuzwa, zisisinia ziayo zinyingi sizituli munyingu yiyi kali mulisambwa nu muliru mba.

¹³ Munyi avandu va Jerusalemi, vikolwa vienyu vidamanu vimali kumwonogonyia. Kali niiva ndaageriza kumukola muve avanifu, navuzwa simwenya kuva avanifu mba. Munyi simulava avanifu kandi mba, kuduuka lwa nambane amageri gange amalulu ku munyi.

¹⁴ Inzi Yahova Wuvunyali, mali kovora. Ing'inga imali kuduuka kokora kekolwa, si ndagilung'anyia zing'anagani ziange kigira uvwoni vwinyu mba, anoho si ndamuverera mba. Ndamuha mageri ku aga mumali kokora.” Yahova umali kovora.

Likuza liu Mukali wu Muporofeti Zacheli

¹⁵ Yahova yamoloma ni Inzi;

¹⁶ Yavoola, “Mwana wu Mundu, ndakuya kandi nziti mukali woovo muyanze. Siulalira anoho siulasioma mba, anoho maliga si galituruka mba.

¹⁷ Utaleka likenya liilio lihuliriki mba. Uviiki virato mu virenge vivio kandi uviiki igudwa ku mutwi gugwo keve kuli kelolero chu kusioma. Utafuuma mumoni mumwo anoho umanyie ovovereri vuvwo mba, kandi utalia chukulia cha yavo avasioma mba.”

¹⁸ Kunangwa ndavolera vandu ing'inga ya mugambazuri, na hamugorova ndi mukali wange alakuza! Na lidiku lialondaku, ndaakola kuli Yahova yaali nandagi.

¹⁹ Maku avandu vandeva, “Unyala kokovoolera makuva yaga gaveeye na kivuni ki ku kunyi, kigira nokora kuli ndio?”

²⁰ Kunangwa ndaavavoolera, “Yahova yambolera

²¹ mbolere munyi avandu va Isiraeli makuva yaga: munyi mwigingiraa kigira Litembeli liezingulu. Mwayaanza kulihenza kandi kuzia mulio, navuzwa Yahova azizaa kuliononyia. Avana vinyu avakaana na vayaayi avalitigala mu Jerusalemi valakitirwi mu vulwani ni kivavi.

²² Maku mulakakole aga inzi mali kokora. Simulakafuumi mu zimoni zienyu anoho kulia chukulia cha yavo avasioma mba.

²³ Si mulakagende vugira virato anoho vugira zigudwa ku mitwi jienyu mba, anoho mutasioma anoho muliri mba. Navuzwa mulang'aha kigira uvwoni vwinyu, kandi mulakakenye aveene na vene.

²⁴ Maku ndakave kelolero ku munyi; na mulakakole vuli kindu choosi cha mali kokora. Yahova avoora ndi, lwa yaga galakekoleke, mulakamanye ndi aveeye Yahova.”

²⁵ Yahova yavoola, “Mwana wu Mundu, kalunu ndatulizaho Litembeli lie zinguru iliali uvukumi kandi uvusangari vwavo, iliavayaanziliraa kuhenza ku kandi kuzia mulio. Ndatulizaho avana vaavo avayaayi na vakana.

²⁶ Ku lidiku lianangole yaga, mundu ulihononoka kutura mu kivi yiki, alakaze komuvoolera agaamali kokoleka.

²⁷ Ku lidiku liene yilio, ulakanyore zinguru ziu komoloma ku mundu uyu, kandi siulakave idimbidi kandi mba. Kunangwa, ivi ulakave kelolero ku vandu, kandi valakamanye ndi Inzi mbeeye Yahova.”