Ezekieli 23 - KITABU KITAKATIFU

Avakali Vaviri Avoni

¹ Yahova yamoloma ninzi.

² Navoora, “Mwana wu Mundu, vaaliho avakali vaviri avamwavo.

³ Lwa vaali nivakikiri avasoleri, nivamenyi mu kivala cha Egebeti, vonogonyia uvugima vwavo kandi nivagwa malaya.

⁴ Mukaana munene yalangwa Ohola; liveeye kovora ‘Samaria,’ nu mukaana mukekeeke yalangwa Oholiba; liveeye kovora ‘Jerusalemi.’ Ndaavavugura ma nivagwa vakali vange, niviivura vana vakana na vayaayi.

⁵ Kali niiva Ohola yaali mukali wange, yaazizagilira kokora uvulaya. Yakola uvulaya na vayanze veve kutura Asiria.

⁶ Vaali avasikari mu zinguvu zie mizambarao avamihi kandi avanene vi zidalajia zinene. Vosi vaali avasaza avasoleri viligondo lilahi ligali kandi avanene vi zibarasi.

⁷ Yihaana kuli liraya ku vimiliri vosi va Asiria kandi niyeyonogonyia mu lisigamira vifananyi via vuli mundu woosi wayaakola uvulaya naye.

⁸ Siyaalekela kokora uvulaya vwa yakola lwa yaali namenyi Egebeti mba. Kutura ing'inga yayaali nakikiri mukaana musoleri, yakola uvulaya na vasaza kali kuduuka nivamukora kuva liraya.

⁹ Kunangwa ndamuviika muvunyali vwa vandu va Siria, avayaanze veve avayaakolaa navo uvulaya.

¹⁰ Vamutuliza zinguvu natigala chahonyo, nivavugura vana veve avakaana na vayaayi, maku nivamwita ni kivavi. Avakali vandi vaamoloma havundu hoosi ku agaali nigekoleki ku Ohola.

¹¹ “Kali niiva amwavo weve Oholiba yaali nalori yaga, naye yakola uvulaya uvunyingi ligali kuvita uvwa Ohola yaali naakori.

¹² Oholiba yakola uvulaya vunyingi na vamiihi kandi avanene, vasikari vaali ni viviki zinguvu ziu luyali kandi na vasaza vasoleri viligondo lilahi ligali kandi avanene vi zibarasi.

¹³ Ndaalora ndi yaali umudamanu ligali kuvita amwavo weve.

¹⁴ “Navuzwa Oholiba yameda kokora uvulaya ligali. Yalora ling'orwa liavasaza mu vwakanyu ku lidigi, mu lifana lia vasaza va Babiloni.

¹⁵ Vaali ni vevohi misibi mu vikenge viavo, kandi viremba ku mitwi jaavo; vosi vaaloreka kuli avanene, lifana lia vandu va Babiloni avuvulwani.

¹⁶ Nonoho lwa yaavilola, yayanzizwa navo, ma natuma avatumwa kuvo mu Babiloni.

¹⁷ Maku avasaza va Babiloni vaza kuye ni vakora uvulaya naye, ma nivamwonogonyia ligali. Inyima wa vaali nivakamwonogonyia, vaamuvihiliriza ligali.

¹⁸ Lwa yaali ni yakakola uvulaya, kandi namanyi uvudamanu vwivwe havulavu, ndaamuleka kuli ndaaleka amwavo weve.

¹⁹ Yaazizagilira kokora uvulaya ligali kuvita ing'inga yindi yoosi. Yizuliza kokora kuli yakola nakikiri mukaana musoleri, lwa yakola uvulaya lwa yaali mu kivala cha Egebeti.

²⁰ Yaali ni liyaanzilira vasaza avaheyi avaari ni liegomba liu muviri kuli ibunda kandi avaari ni zinguru kuli zie ibarasi.”

²¹ Oholiba, ivi wenya kwiranira uvudamanu vwa wakola nukikiri mukaana musoleri mu kivala cha Egebeti; uwa vasaza vaakora uvulaya niivi kandi nivakwonogonya.

Nyasaye Yahaana Mageri ku Oholiba

²² “Kulwayago Oholiba, yaga nigo aga Inzi Yahova Wuvunyali nziza kokora ku ivi. Ndakora avayaanze vovo avuwaagirung'ana kutura kuvo mu livihirirwa vakwingiliri. Ndavaleta vakwingiliri kutura ku zimbega ziosi.

²³ Ndaleta avandu va Babiloni vosi, kandi avandu va Kalideli, avasaza kutura Pekodi, Shoa na Koa, kandi na avandu va Asiria vosi. Ndavungiza harara vasoleri vosi avanene vi ligondi lilahi ligali kandi avamihi, avasikari na vanene vandi vosi vi zibarasi avaveeye nu luyali.

²⁴ Valakwingilira kutura Ivaale ni liihi linene lia magare gu vulwani. Valakukumberiza ku zimbega ziosi ni viugi viavo, ni igudwa kandi zikuuti. Ndakuviika mu zinguru ziavo na valakukalagira kolondekana na malago gaavo.

²⁵ Kigira mbeeye nu vutima nivi, ndaleka vakole goosi ga vanyara ku ivi mu vutima vwavo. Valakalaga amatu googo kandi amuru googo na valitigala valitwa ni kivavi. Valavugula vayaayi na vakana vovo na valasambwa nu muliru nivaveeye mwoyo.

²⁶ Valatandulanyia zinguvu zizio kandi valavugula magina googo guvuguli.

²⁷ Inzi ndaheriza uvudamanu kandi uvulaya vuvwo vwosi vwakola nukikiri mu kivala cha Egebeti: Kunangwa, si ulalora kandi vifananyi anoho kwizuliza Egebeti kandi mba.”

²⁸ Yaga nigo ga Yahova Wuvunyali avoora, “Ndakuviika mu zinguru zia vandu va ivi udunyiraa, kandi ava ivi uvihiliraa.

²⁹ Kigira vandu yava vakudunyira, valavugula vuli kindu choosi cha wanyoola kologeli lwulwo, na valakoleka umwere kandi ni chahonyo. Uvudamanu vwuvwo vulaloleka havulavu. Uvudamanu vwuvwo nu vulaya vwuvwo

³⁰ vumali koleta yaga goosi ku ivi. Wakola uvulaya ni zihiiri kandi niweyonogonyia ni vifananyi viavo.

³¹ Ivi wakola uvudamanu vulala vwere vwa amwavo woovo yakola, kulwayago ndakuha mageri malala mere kuli aga ndahaana ku amwavo woovo.”

³² Yahova Wuvunyali avoora, “Ulanyora mageri malala mere, kuli aga mwavo woovo yanyoora; gaveeye manene kandi amalulu. Vuli mundu alakusekeriza kandi alakokolera kehenyahenye; amageri yaga gaveeye maduukiru.

³³ Ulava kuli muhambiku kandi wovovereri, amageri gu kutihiza kandi gu kudiviza, amageri ga mwavo woovo Samaria.

³⁴ Ulanyora mageri gokoheleriza, kali kuduuka umanyuli liisu liilio mu vovereri ligali. Inzi Yahova Wuvunyali mali kovora.”

³⁵ Kalunu yaga nigo ga Yahova Wuvunyali avoora, “Kigira ivi umali kunzivilira kandi kungirung'ana, ulanyora mageri kigira uvudamanu vuvwo kandi uvulaya vwuvwo.”

Nyasaye Yakalagira Ohola na Oholiba

³⁶ Yahova yandeva, “Mwana wu Mundu, wetegeki kukalagira Ohola na Oholiba? Ovoole vindu viu kuvihiliriza via vamali kokora.

³⁷ Vamali kokora ovoheyi kandi vamali kwita. Vaakora ovoheyi ni vifananyi viavo; kali vamali kuhaana vana vange kuva visiuviliru ku vifananyi viavo.

³⁸ Si gaveeye yago geng'ine ga vaakora mba, navuzwa vonogonyia Litembeli liange kandi vaavunaga lidiku liange lie Lisabato, lia Inzi mwene ndaviikaho.

³⁹ Lidiku lilala liere lia vita vana vaavo kuva kuli visiuviliru ku vifananyi viavo, vaza mu Litembeli liange nivalionogonyia! Yaga nigo agavaakola mu Litembeli liange.

⁴⁰ “Vuli kazozo vaatuma avatumwa kogenihiza vasaza kutura ihale. Avasaza yavo vaza. Avakali vaviri yava viisinga nivaniha, kandi nivaviika viuma ku zimoni ziavo kwetegekera nu kuyaanziza vasaza yava.

⁴¹ Viikara ku kidali kilahi ligali, kandi imbiri wavo, valomba emesa nivaviika ku kimuli kifunyaa mwayu kandi amaguta gu mwayu agandaali nimbaheye.

⁴² Muliviti gwi kiduma cha vandu gwahulirika, muganda gwa vandu vahambiku kutura mwigendanyama. Vaviika madongolo ku makono ga vakali yava kandi ni zitaji zindahi ligali ku mitwi jaavo.

⁴³ Maku ndavoora, kalunu vandu yava vavuli kuva avakolaa ovoheyi nu mukali oveeye liraya?

⁴⁴ Vaakora ovoheyi haali kanyingi na vakali yava, Ohola na Oholiba avakali vadamanu.

⁴⁵ Avandu valungi valakavakalagili kigira vaakora ovoheyi kandi aviiti, kigira valoleki kuva vadamanu.”

⁴⁶ Yaga nigo ga Yahova Wuvunyali avoora, “Ndaleta muganda gwa vandu kutihiza vakali yava kandi kuvanura.

⁴⁷ Ndaleka muganda gwa vandu yava guvalase na magina kandi guvingiliri ni vivavi, viiti avakaana kandi avayaayi vaavo, nu kusamba zinyumba ziavo.

⁴⁸ Kunangwa ndakaherizi uvudamanu mu kivala, na lilava lieganihiza ku vakali vosi vavuli kokora ovoheyi kuli vaakora.

⁴⁹ Ndahaana mageri ku munyi kigira uvudamanu vwinyu kandi uvwoni vwinyu vwu kusigamira vifananyi. Maku mulakamanye ndi Inzi mbeeye Yahova Wuvunyali.”