Ezekieli 22 - KITABU KITAKATIFU

Uvwoni vwa vandu va Jerusalemi

¹ Yahova yamoloma ninzi.

² Yavoola, “Mwana wu Mundu, ivi oveeye mwetegeku kukalagira avandu vi lidaala linene iliveeye navandu aviti vanyingi? Uvavoolere vulahi vindu viosi viukuvihiliriza viavamali kokora.

³ Ovoolere avandu vi lidaala linene aga Inzi, Yahova Wuvunyali, mboraa: Kigira munyi mumali kwita avandu vinyu vanyingi kandi mumali kweyonogonyia mulisigamira ivifananyi, ing'inga yinyu yokohevwa mageri yiza.

⁴ Muveeye ni lihiolo kigira avandu va mwita kandi mwayonogonywa ni vifananyi via mwalomba. Kulwayago lidiku lienyu liveeye ahimbi kandi mihiga jiinyu jimali kuduuka! Yiki nicho kigira Inzi mali koleka zihiiri zimukolere ekehenyahenye kandi vivala viosi vimuseke mulilegelizwa.

⁵ Yavo avaveeye ahimbi kandi avaveeye ihale kutura ku munyi valamukolera ekehenyahenye, munyi avaveeye ni liiva lidamanu kandi aviizula kivihiri.

⁶ Heenzi kuli aviimiliri vosi va Isiraeli avaveeye mu munyi kuli vatumikira zinguru ziavo kwita.

⁷ Baba na mama si vahevwa luyali mba. Avageni vadambizwa kandi avavisandu na vakunzakali vakolerwa vudamanu.

⁸ Munyi mumali kolegeriza ivindu viange vitakatifu kandi mwayonogonyia lisabato liange.

⁹ Valala kumunyi vavoola ovovehi kigira vandu, vandi, kunangwa vaduuki kwitwa. Valala kuvo valiza visiuviliru vihaaniywi ku vifananyi. Valala vaduukiza liegomba liavo liumuviri vuli ing'inga.

¹⁰ Valala kuvo vagona navakari va vababa vaavo. Valala vatumikira zinguru kogona navakari ing'inga lwa vaziyi mu mweli.

¹¹ Valala vakora voheyi navakari vavatende; navandi vonogonyia avanavizara vaavo navandi vonogonyia vavoozo vaavo.

¹² Valala ku munyi vahevwa mitungu vaduuki kwita. Valala vatungiza vukala vunyingi kuliegobiza liavakola ku vandu va Isiraeli nokonyoora vutugi kigira litungiza linyingi kuvo. Vamali kunzivilira.” Yahova Wuvunyali umali kovora.

¹³ “Ndadiviza avandu vamali kwenyolera viambeti kandi avandu vamali kwita avaveeye mu munyi.

¹⁴ Na musuuviraa mulazizagilira kuva nuvuluviliri anoho mulava ni zinguru mulidiku lia namudivizi? Inzi Yahova mali kovora kandi ndakakole ndio.

¹⁵ Inzi ndasalanyia avandu vinyu mu vuli kivala kandi ihiiri kandi ndaheriza vikolwa vienyu vidamanu.

¹⁶ Lwa namuve ni mumali kwonogonywa imbiri wi zihiiri, mwazamumanyirizi ndi Inzi mbeeye Yahova.”

Avandu va Jerusalemi Kuduuka Vaselezwe

¹⁷ Yahova yamoloma ninzi kandi yavoola,

¹⁸ “Mwana wu Mundu, avandu va Isiraeli si vaveeye kindu ku Inzi mba. Vaveeye kuli izahabu, mugasa kandi kivia kimali kwoneka lwi ifeza imali kutulwa mu muliru.

¹⁹ Kunangwa kalunu Inzi, Yahova Wuvunyali, mbavooleraa ndi, vaveeye vuzwa kuli kindu kitakonya. Inzi ndavaleta vosi harara mu Jerusalemi,

²⁰ munzira indara nzere yamagina gizahabu, kivia kandi mugasa vivikwa mu muliru kutulwa. Vutima vwange vululu vulavayingura kuli muliru guyingura magina.

²¹ Yee, ndavavungiza harara mu Jerusalemi, ndavaviika mu muliru nukuhia ligali, ndaviika vutima vwange vululu kuvo.

²² Ndavasalulukizira mu Jerusalemi kuli izahabu isalulukira mumuliru. Maku valamanya ndi inzi, Yahova, mali kuvaha mageri mu vutima vwange.”

Uvwoni vwa Vimiliri va Isiraeli

²³ Yahova yamoloma na Inzi kandi.

²⁴ Yavoola, “Mwana wu Mundu, ovolere avandu va Isiraeli ndi si vaveeye avatakatifu mba, kulwayago ndavaha mageri mu vutima vwange.

²⁵ Aviimiliri vaavo vaveeye kuli zisimba zihuumira ku zinyama ziaimali kwita. Vita avandu, mavavugula mabese harara ni miandu josi javanyala konyoora, kandi muliita liavo valeka avakunzakali vanyingi.

²⁶ Avasaalisi vavunanyi lilago kandi sivahaana luyali kuvindu vitakatifu mba. Sivaveeye ku niliavukanyia hagati hivindu viveeye vitakatifu nivitaveeye vitakatifu mba. Sivigizaa liavukana hagati hivindu vinifu ni vitaveeye vinifu mba, kandi sivagumira lisabato mba. Kigira yaga, avandu va Isiraeli sivambezaa luyali mba.

²⁷ Vimiliri vuvwamihi vaveeye kuli vivwi vitanduranyia mu vidonye zinyama ziavamali kwita. Varumindaa kunangwa vanyoore vutugi.

²⁸ Vaporofeti vamali kuvisa uvwoni yivu kuli avandu vavaki lidigi no vodohi uvulavu. Valora malola govovehi kandi vakora vusigitiri vwuvugadi. Vekola vamoloma makuva ga Yahova Wuvunyali, navuzwa Inzi, Yahova, si molomi navo mba.

²⁹ Avandu vi kivala yiki vamali kudambiza nu kunuura. Vamali kudambiza avadaka na vageni, kandi si vavakolera likalaga liveeye lirungi mba.

³⁰ Ndahenza umundu kutura muvo uwaali unyala kwumbaka lidigi, uwaali anyala kusingira ha vundu hamadigi gamali kugwa nukukinga vandu lwa ndaali ahimbi kuvadiviza, navuzwa sindanyola mundu kali mulala mba.

³¹ Kunangwa muvutima vwange vululu, ndaaza mbane mageri ku vandu va Isiraeli ku aga vamali kokora, kandi navamanyirizi ndi inzi mbeeye nu vutima.” Yahova umali kovora.