Ezekieli 21 - KITABU KITAKATIFU

Yahova Alahaana Mageri ku vandu va Jerusalemi

¹ Yahova yamoloma ninzi.

² Yavoola, “Mwana wu Mundu, ulandizi uvudamanu vwa vandu va Jerusalemi. Ovoole uvudamanu ha vundu havandu vasigamira misambwa. Wiganihizi avandu va Isiraeli

³ ndi Inzi, Yahova, mboraa: Inzi mbeeye musigu winyu. Inzi ndasomola kivavi change mu chura chacho nu kwita munyi mwosi, avalahi navadamanu harara.

⁴ Kigira nziza kwita avalahi navadamanu, ndatuliza kivavi change mu chura nu kwita vuli mundu kutura Isavaalu kuduuka Ivaale.

⁵ Vuli mundu namanyirizi ndi Inzi, Yahova mali kosomola kivavi muchura kandi sindiranyia mu mba.

⁶ “Kunangwa okenye, Mwana wu Mundu! Okenye imbiri wavo nu mwoyo mudedekere kandi novovereri vunyingi ligali.

⁷ Lwa vakoteeva kigira ki okenyaa, uvavoolere ndi nikigira amakuva mageni gaazaa. Lwa nagaaze, navave nuvuti ligali, makono gaavo nagave madedekere, valavula kuva nu vuluviliri kandi amalu gaavo galadegera. Ing'inga imali kuduuka; eveeye hano.” Yahova Wuvunyali umali kovora.

⁸ Yahova yambolera,

⁹ “Mwana wu Mundu, oporofete. Ovoolere avandu aga Inzi, Yahova mboraa, Kivavi, kivavi kimali kushagalwa kandi kehemahemaa.

¹⁰ Kishagaliywi kiduuki kwita, keng'ereng'anaa nokohemahema kuli loheni. Vusangali si voveeye ho mba, kigira avandu vange vamali kusura kuhulira lieganihiza liosi kandi nilihevwa mageri.

¹¹ Kivavi kishagaliywi kiduuki kutumikirwa. Kishagalilwi, kiduuki kuvikwa mu makono gumwiti.

¹² Uliri kandi usiome, Mwana wu Mundu; kivavi yiki keveeye ho kulwa vandu vange, kandi ku vimiliri vosi va Isiraeli. Vazizaa kwitwa harara na vandu vange vandi vosi. Kunangwa ulava novovereri vunyingi ligali.

¹³ Inzi ngerizaa avandu vange, niiva valasura kwiganira, ivindu yivi viosi vilekoleka kuvo.

¹⁴ “Kalunu, Mwana wu Mundu, oporofete. Ukubage makono googo na kivavi kilatema haali kanyingi. Keveeye kivavi chitaa kitihizaa, kandi kisinzaa.

¹⁵ Yaga gakoraa avandu vange kogeeha vuluviliri kandi kwikigatira. Inzi ndihizaa avandu vi lidaala liavo ni kivavi kehemahemaa kuli loheni kandi chetegeki kwita.

¹⁶ O, kivavi, oteme ku mukono mulungi kandi ku mumosi, havundu hoosi huvwugi vuvwo vugirung'anira.

¹⁷ Inzi ndakubaga makono gange kandi, nu vutima vwange vulafa. Inzi, Yahova mali kovora.”

Kivavi chu Mwami wa Babiloni

¹⁸ Yahova yamoloma na inzi.

¹⁹ Yavoola, “Mwana wu Mundu uviiki vilolero kuzinzira ziviri ziu mwami wa Babiloni naavitiri mu ni kivavi chiche. Viombi vitangiri mu kivala kilala chere. Kandi olombe kelolero ukiviiki mu vwavukaniru vwi zinzira mu lidaala linene.

²⁰ Kelolero kilala kilamanyia Mwami inzira izizaa mu lidaala linene lia Raba lia vandu va Amoni, ni kindi kilamanyia inzira izizaa Ivuyuda kuduuka mu lidaala linene lie imbinga ya Jerusalemi.

²¹ Mwami wa Babiloni asingiyi hakelolero mu vwavukaniru vwi zinzira. Kumanyiriza inzira yukuziraku, kuduuka akole yaga: Asungusi uvuta, azie kuvasigitili kandi ahenzerizi mu ingudumani yinyama yi kisiuviriru.

²² Kalunu! Mukono gwigwe mulungi goveeye nu vuta vwang'odwa ku ‘Jerusalemi!’ Vumuvooleraa azie asingilizi viugi viukusambula kuvilivwa, yumbake vitumi, kandi yumbake minaara jukukumbiliza.

²³ Avandu va Jerusalemi vasuuvira yaga mba, kigira lilagana lia vamali kolomba. Navuzwa lievuula yili lilavizuliza uvwoni vwavo kandi kuviganihiza ndi valakagumilwi.

²⁴ Yaga nigo aga Inzi, Yahova Wuvunyali, mboraa: Uvwoni vwinyu vuvikiywi havulavu. Mahiolo ginyu gamanyikani ku vuli mundu. Mumanyia uvwoni vwinyu mu vuli kindu choosi chamukolaa. Gamuduukira mukalagilwi, kandi inzi ndamuviika ku vasigu vinyu.

²⁵ “Ivi mwimiliri muchamu wa vandu va Isiraeli, lidiku liilio lizaa, ing'inga yukumalirika yooyo yokohevwa mageri.

²⁶ Inzi, Yahova Wuvunyali mali kovora. Utulizi igudwa yooyo nekelemba chicho. Vindu si vilava kuli vivezaa mba. Vadedekere valanenehizwa kandi avigingiri valikizwa.

²⁷ Hazwa! Hazwa! Inzi ndakora lidaala yili kuva hazwa! Navuzwa yaga si galakoleka mba kuduuka mundu uwa inzi mali kotovola kuhaana mageri ku lidaala yaza. Maku inzi ndakamuhe.

Likalagira Vandu va Amoni

²⁸ “Mwana wu Mundu, oporofete. Ulandizi aga Inzi, Yahova Wuvunyali, mbolera avandu va Amoni avanyegaa vandu va Isiraeli. Uvavoolere: ‘Kivavi chetegeki kwita; kishagaliywi, kehemahemaa kuli loheni.

²⁹ Malola aga munyi muloraa gaveeye aguvugaadi, kandi vusigitiri vwinyu voveeye ovovehi. Munyi muveeye avandu vachamu kandi vadamanu. Lidiku lienyu liukumalirika kohevwa mageri lizaa. Inzi ndamwita ni kivavi.

³⁰ “ ‘Viika kivavi muchura cha cho! Inzi ndamukalagira havundu hamwivulirwa, kandi mu kivala cha vaguuga viinyu.

³¹ Vutima vwange vululu vulamusaliriza kuli muliru. Ndakuvika mu makono gavandu valulu avamanya kudiviza ligali.

³² Muliru gulamudiviza. Ndamwitira mu kivala chiinyu aveene, umundu kali mulala sinamwizulizi kandi mba.’ ” Yahova umali kovora.