Ezekieli 20 - KITABU KITAKATIFU

Avandu va Isiraeli vibaara ku Yahova

¹ Ku lidiku lie likomi ku mweli gwa katano mu muhiga gwa saba gwu muvuhambe vwitu, valala ku vimiliri va Isiraeli vaza nivikara imbiri wange. Venyeleriza kutura ku inzi kigira lienya lia Yahova.

² Maku Yahova yambolera,

³ “Mwana wu Mundu, moloma ku vimiliri va Isiraeli na uvavoolere aga inzi Yahova Wuvunyali mboraa: Munyi muuzi ku inzi kwenyeleriza vulaliri vwange? Kuli inzi mbeeye ligali Nyasaye omenya, sindavugilira munyi kondeeva kindu kali kilala mba. Inzi Mwami Munene Yahova mali kovora.

⁴ “Mwana wu Mundu, oveeye mwetegeke kuvakalagira? Maku kola ndio, uvizulizi uvudamanu vwa vababa vaavo vaakora.

⁵ Uvavoolere aga Inzi mboraa. Lwa ndaatovora vandu va Isiraeli, ndaalomba lilagana liange navo. Inzi mwene ndivuura kuvo mu Egebeti kandi nimbavolera: Inzi mbeeye Yahova Nyasaye wavo.

⁶ Ku lidiku yilio lwa ndaavalaga ndi ndavatuliza mu kivala cha Egebeti nu kuvahila mu kivala cha ndaali nimbatovoleye, kivala kenoru kandi kigunamu ligali, kivala chaali kilahi ligali kuvita vivala vindi viosi.

⁷ Ndaavavoolera valeke avanyasaye vukuvihiliriza, avavaali ni vayaanza kandi vavuli kweyononyia na vanyasaye va Egebeti vuvugadi, kigira Inzi mbeeye Yahova Nyasaye wavo.

⁸ Navuzwa vibaara ku inzi kandi sivenya kumbulira mba. Si venya koleka anoho kusiuva ihale vifananyi viukuvihiliriza viavo anoho koleka vanyasaye va Egebeti avavaali ni vayaanza mba. Mu vutima vwange uvululu, inzi ndaatovora kuhaana mageri ku vandu va Isiraeli mu kivala cha Egebeti.

⁹ Navuzwa sindaakola ndio mba, kigira yaga gaali ganyala kwikiza luyali lwange, kandi imbiri wi ihiiri yavamenyi hagati haavo, avandaali ninandizi mu vandu va Isiraeli ndi, nziza kuvatuliza mu kivala cha Egebeti.

¹⁰ “Kunangwa ndaavimilira kutura mu kivala cha Egebeti ma nimbaleeta mwigendanyama.

¹¹ Ndaavaha malago gange kandi mimbigiza lilago liange, agaleetaa livamwoyo ku mundu woosi vegehiza kugo.

¹² Kandi ndaavaha lidiku liange lie Lisabato live kuli kelolero hagati haavo ninzi; kunangwa vaduuki kwizuliza ndi Inzi Yahova, ndaavakora kuva avatakatifu.

¹³ Navuzwa avandu va Isiraeli vibaara ku Inzi mwigendanyama. Sivagumira lilago liange mba, kandi vasuura malago gange agaleetaa livamwoyo ku mundu woosi wegehiza kugo. Vamali kwononyia lidiku liange lie Lisabato. Ndavika kuva nu vutima vwange vululu mwigendanyama kandi ndavadiviza ligali.

¹⁴ Navuzwa si ndaakola ndio mba, kigira yaga gaali ganyala kwikiza luyali lwange hagati hi zihiiri zialola ninyimiliraa avandu va Isiraeli kutura mu kivala cha Egebeti.

¹⁵ Kandi ndavisuuhira mwigendanyama ndi, sindavahila mu kivala chandaali nindavaha mba, kivala kenoru kandi kigunamu ligali, kivala chaali kilahi ligali kuvita vivala vindi viosi.

¹⁶ Inzi ndalomba lilagana kigira vaali nivasuyi lilago liange kandi vasuyi kugumira malago gange kandi nivononyia lidiku liange lie Lisabato. Kunangwa vayanzilira kusigamira vifananyi viavo.

¹⁷ “Navuzwa ndaavavererera. Sindaavadiviza anoho si ndaaviitira mwigendanyama mba.

¹⁸ Mu vogono yivwo, ndiganihiza vana vaavo mwigendanyama nimbora: mutagumiri amalago ga vaguuga vinyu valomba mba; mutalondi miima jaavo mba, anoho muteyonogonyi ni vifananyi viavo mba.

¹⁹ Inzi mbeeye Yahova Nyasaye winyu. Mutie kandi mugumiri amalago gange.

²⁰ Mukore lidiku lie Lisabato kuva Litakatifu, kunangwa liduuki kuva kelolero cha lilagana lia ndaalomba nimunyi, kandi galamwizuliza ndi, Inzi mbeeye Yahova Nyasaye winyu.

²¹ “Navuzwa vana vaavo vibaara ku Inzi; vaavunanyia lilago liange kandi sivagumira malago gange agaleetaa livamwoyo ku mundu woosi wegehiza kugo mba. Vonogonyia Lidiku liange lie Lisabato. Ndaaganagana kuva nu vutima vululu kuvo mu changalangwi nu kuviita vosi.

²² Navuzwa si ndaakola ndio mba, kigira yaga gaali ganyala kwikiza luyali lwange hagati hi zihiiri zialola ninyimiliraa vandu va Isiraeli kutura mu kivala cha Egebeti.

²³ Kunangwa ndalomba lilagana lindi navo mwigendanyama. Ndisuuha ndi ndakavasalanyiri hagati hi zihiiri muvivala viosi.

²⁴ Ndaakola yaga kigira vaali nivavunamyi lilago liange kandi nivasuyi amalago gange, kandi vaali nivononyi lidiku liange lie Lisabato, kandi nivasigamiri vifananyi vilala viere via vaguuga vaavo vaasigamira.

²⁵ “Maku ndaavaha lilago litaveeye lilahi kandi amalago gavula koleta livamwoyo.

²⁶ Ndaaleka veyonogonye ni vihaanwa viavo, kandi nivahaana vana vaavo vayaayi vukutanga kwivulwa kuva kisiuviriru. Ndaakola yaga kunangwa vaduuki konyoora mageri kandi vaduuki kumanya ndi inzi mbeeye Yahova.

²⁷ “Maku kalunu, Mwana wu Mundu, ovoolere avandu va Isiraeli aga Inzi Yahova Wuvunyali mboraa. Yili ni liiva lindi lia vaguuga vaavo vaanyegera mu likora uvugadi.

²⁸ Ndaavaleta mu kivala cha ndaali nindaviisuhira ndavaha, valora vigulu vitambi kandi misaala ja matu mavisi, nivahaana visiuviliru kuvio viosi. Vaangora kuva nu vutima kigira visiuviliru via vasamba kandi iwaini ya valeta kuva kihanwa.

²⁹ Ndavateeva: Havundu hadiguluku hamuzizaa yaaha haveeyeki? Havundu yaaha halangwa ‘Havundu hu kusigamira misambwa’ kali kuduuka kalunu.

³⁰ Kalunu ovoolere avandu va Isiraeli aga Inzi Yahova Wuvunyali mboraa: Kigira ki mukoraa uvwoni vulala vwere vwa vaguuga vinyu vaakora, nu kusigamira vifananyi viavo?

³¹ Kali kalunu muhaanaa vihaanwa vilala viere kandi mweyonogonyia munyi aveene ni vifananyi vilala viere nu kuhaana vana vinyu avayaayi kuvio mu muliru. Maku munyi avandu va Isiraeli mukizizagiliraa koteeva ndi lienya liange liveeki? Inzi ligali kuli mbeeye Mwami Munene Yahova, mbeeye Nyasaye omenya, si ndavugilira munyi kondeeva kindu mba.

³² Munyi muveeye ni zing'anagani ndi mwenya kuva kuli zihiiri zindi, kandi kuli avandu vamenyi muvivala vindi nu kusigamira misaala kandi amagina. Navuzwa yaga sigalava ndio mba.

Nyasaye Ahaanaa Mageri kandi Asamiiha

³³ “Ligali kuli Inzi mbeeye Yahova Wuvunyali, mbeeye Nyasaye omenya. Mwiganihizaa ndi, Inzi ndamwamiiha mu vutima vwange kandi ni zinguru ziange ziosi.

³⁴ Ndamumanyia vutima vwange kandi zinguru ziange lwa muvungiza harara nukumwiranyia kutura muvivala viosi uwa mwaali ni mwasalanyirwa.

³⁵ Ndamuhila mwigendanyama mwa vandu vi zihiiri, uwene yeyo ndamukalagira havulavu.

³⁶ Kalunu ndamukalagira kuli ndakalagira avaguuga vinyu muchangalangwe cha Sinai,” Yahova Wuvunyali avoora.

³⁷ “Ndahaana mageri ku munyi kandi ndamukora mutie lilagano liange.

³⁸ Ndatuliza hagati hinyu yavo avaveeye vukwibaara kandi avoni nu kuvahila ihale ligali. Ndavatuliza muvivala viavamenyimu kalunu, navuzwa si ndaleka viirane mu kivala cha Isiraeli mba. Maku mulamanya ndi Inzi mbeeye Yahova.”

³⁹ Yahova Wuvunyali avoora, “Kalunu munyi mwosi avandu va Isiraeli, muzie mundu mulala samulala atumikiri vifananyi vivie! Navuzwa mwiganihizaa ndi, inyima wa yaga, mulatia Inzi kandi mulalekera kwonogonyia lieta liange litakatifu nu kuhaana vihaanwa ku vifananyi vienyu.

⁴⁰ Mu kivala yicho, ku kiguru change kitakatifu, kiguru cha Isiraeli kitambi, munyi mwosi avandu va Isiraeli mulakasigamiri. Ndakamuvugiliri kandi ndaakayanzwi ni munyi koleta ku Inzi visiuviliru vienyu, Isadaka yinyu indahi ligali kandi vihaanwa vienyu vitakatifu.

⁴¹ Inyima wa nambe ni ndakamuleeta kutura muvivala uwandaali nimali kumusalanyira, nu kumuviika harara, ndakavugiliri visiuviliru vienyu via musambaa, kandi ndakamanyie uvutakatifu vwange imbiri winyu hagati hi zihiiri.

⁴² Lwa ndakamwiranye mu kivala cha Isiraeli, ichandisuuha kuhaana ku vaguuga vinyu, mulakamanye ndi Inzi mbeeye Yahova.

⁴³ Maku mulakizulizi vindu viosi vie zisoni via mwakora kandi kuli mweyonogonyia. Mulakave ni livihiririzwa aveene kigira vindu vidamanu viosi via mwakora.

⁴⁴ Mulakamanye ndi Inzi mbeeye Yahova, lwa namukolere vulahi kigira lieta liange. Sinangole ndio kolondekana nu vudamanu vwinyu, anoho uvuchamu vwinyu mba, O, munyi avandu va Isiraeli.” Mwami Munene Yahova umali kovora.

Muliru kutura Isavaalu

⁴⁵ Yahova yambolera,

⁴⁶ “Mwana wu Mundu, henza kolovega lwi Isavaalu. Omolome kigira uvudamanu vwi Isavaalu kandi oporofete kigira uvudamanu vwa vandu vi kivala chi Isavaalu wa Negebu.

⁴⁷ Ovolere avandu visavalu vahuliri aga inzi Yahova Wuvunyali mboraa: Henza! Ndahambiza muliru, kandi gulasamba nukudiviza vuli musaala muvisi kandi vuli musaala mwumu. Muliru yigu sigulakasiminywi mba, gulakalande kutura Isavaalu kuduuka Ivaale, na gulakasambe vuli mundu.

⁴⁸ Avandu vosi valakalore ndi Inzi Yahova mali kuhambiza muliru, na siaveeye ho mundu unyala kugusiminya mba.”

⁴⁹ Maku ndaavoora, “O, Yahova Wuvunyali! Avandu vavoola ndi, uyu aveeye mundu omoloma mu zing'ano?”