Ezekieli 2 - KITABU KITAKATIFU

Nyasaye Yalanga Zacheli Kuva Muporofeti

¹ Mundu uyu yambolera, “Mwana wu Mundu, singira nyenya komoloma ku ivi.”

² Lwa ndahulira mwoyo nigumoloma na inzi, Roho yaza mu inzi kandi niyasingiliza nu mwoyo gwazizagilira kovora,

³ “Mwana wu Mundu, ngutumaa ku avandu va Isiraeli. Vamali kwibaala nukugirung'ana kutura ku inzi, kandi vakikiri avibaali kuli avaguuga vaavo vaali.

⁴ Vaveeye avahindagirizi kandi sivambezaa luyali mba. Kunangwa ngutumaa uvavoolere aga inzi, Yahova Wuvunyali mboraa kuvo.

⁵ Kali niiva avandu vibaali yavo valakuhulira anoho valasura kukuhulira, valakamanye ndi muporofeti yaali harara navo.

⁶ “Navuzwa ivi, Mwana wu Mundu, utavatia, anoho utatia gavavoraa mba. Utatia mba, kali niiva vigunzanguva kandi amafa vikukumberizi kandi kali niiva omenyi hagati hi zinzoka. Utatia vandu vibaali yavo anoho kindu choosi chavavolaa mba.

⁷ Ivi kuduuka ulavavolera amakuva gange, kali niiva valahulira anoho valasura kuhulira, kigira vaveeye avandu vibaali.

⁸ “Mwana wu Mundu, uhulirizi agangovoolera. Utava mwibaali kuli yavo mba. Kunuura munwa gugwo ma ulie chanzizaa kukuha.”

⁹ Kandi lwa ndahenza, ndaalora mukono nigunyiriywi kuuza ku inzi, gwaali nigoveeye nilikaradasi liamang'oda;

¹⁰ kandi yalivambuura imbiri wange; na liali namang'oda zimbega ziosi, na makuva gang'odwa gaali gi lilira, lisioma kandi likenya.