Ezekieli 19 - KITABU KITAKATIFU

Lwimbu Lwovovereri

¹ Yahova yambolera nyimbiri aviimiliri vaviri vavandu va Isiraeli lwimbu lwovovereri yilu:

² Mama wenyu yaali isimba yi kikali ya lugano ki! Yagona hasi hagati hi zisimba zinyana kandi nalela avana veve.

³ Yaavirukiza indala kuvaana vayo, kandi yagwa isimba yizingulu. Kandi yiiga kuhima kandi nalia avandu.

⁴ Zihiiri ziahulira makuva kigira isimba yeyo, vamanya nivamutegera muliliina liavo. Vamanya nivamungusa nizindohani kuduuka mu kivala cha Egebeti.

⁵ Lwa yalora lisuuvirizwa lilie litaduukizwa, yavugula mwana weve wundi wi isimba namukora kuva isimba induru kandi yizingulu.

⁶ Lwa yaali niyakaviruka, yagendera mu zisimba zindi. Kandi yagwa isimba yizingulu. Yiiga kuhima kandi nalia avandu.

⁷ Yadiviza zimbinga kandi madaala; lihuuma lilie liezingulu liatiihiza vuli umundu.

⁸ Maku zihiiri ziamutega mitego mu zimbega ziosi; vamukunika eneti kandi vamanya nagumirwa mu liliina liavo.

⁹ Vaamuvika mu kifuli kandi nivamuhila ku mwami wa Babiloni. Vaamuvika muvuhambe kunangwa lihuuma lilie livuli kuhulirika ku vigulu via Isiraeli.

¹⁰ Mama woovo yaali kuli kizabibu mu mulimi gwi kizabibu gugwo, gwasimikwa ahimbi kumugera. Kigira mazi gaaliho amanyingi, kizabibu chaali na matu manyingi kandi makuyu manyingi ligali.

¹¹ Zisia ziagwo ziali nizinguru, kandi gwaviruka nigugwa kuli imbimbu yu vwami. Muzabibu gwaviruka nigutambiha kuduuka mu malesi; kandi vuli mundu yalora kuli gwaali mutambi na matu manyingi.

¹² Navuzwa gwamanya nigwifwa muvutima vululu, kandi nigusiuvwa ku marova. Imbuza yi kivi yi Ivugwi yuminya makuyu gagwo. Zisia ziagwo ziavunanywa; ziamanya niziuma kandi nizisambwa.

¹³ Kalunu gwatagwa muchangalangwe, havundu ahumu kandi kivala kitaveeyemu na mazi.

¹⁴ Kitinya chu muzabibu yigu chaali nu muliru, muliru gwasamba zisia ziagwo na makuyu gagwo. Zisia si zilakave nizinguru kandi mba, si zilakave imbimbu yizingulu yu vwami kandi mba. Yilu nulwimbu lwovovereri; lumali kwimbwa haali kanyingi.