Ezekieli 18 - KITABU KITAKATIFU

Avandu Vakora Uvwoni Valakuza

¹ Yahova yamoloma na inzi

² navoora, “Lugano lwa vandu vavoola ni viranira yilu lovoolaki mu kivala cha Isiraeli? ‘Avababa valia makuyu malulu, Navuzwa avana vaavo vahulira uvululu mu minwa jaavo.’ ”

³ Yahova Wuvunyali avoora, “Ligali kuli Inzi mbeeye Nyasaye oveeye mwoyo, si mulavoola lugano yilu kandi mu kivala cha Isiraeli mba.

⁴ Henza, avandu vosi vaveeye avange, avababa kandi avana vosi vaveeye avange. Mundu okolaa uvwoni niyie ulikuza.

⁵ “Mundu musuuvirifu akolaa agaveeye amalahi kandi amalungi.

⁶ Mundu uyu siasigamiraa vifananyi via vandu va Isiraeli anoho kulia visiuviliru ku vigulu mba; anoho si yonogonyaa mukali wu mutende weve anoho kulia visiuviliru ku vigulu mba; anoho siagonaa nu mukali mu madiku geege gu mweli mba.

⁷ Mundu uyu siadambizaa mundu woosi mba, navuzwa atungaa magovi geege; siaveeye munuri, navuzwa ahaanaa viukulia ku vaveeye ninzara, kandi ahaanaa zinguvu ku vaveeye niviahonyo.

⁸ Mundu uyu siyegobizaa mabesa nu konyoolaku uvukala anoho kuvugura viambeti mba. Mundu uyu siakola uvudamanu mba, navuzwa ahaanaa likalaga liveeye lirungi hagati hu mundu nu wache;

⁹ Mundu kuli uyu atizaa lilaga kandi agumiraa malago gange, aveeye mulungi kandi alamenya ligali.” Yahova Wuvunyali avoora.

¹⁰ “Niiva mundu uyu aveeye nu muyaayi oveeye munuri kandi umwiti, anoho okolaa kilala ku vindu yivi,

¹¹ kali niiva baba weve si yaavikola mba: Alizaa visiuviliru vihananilwa ku vwali vwasuulwa, kwonogonyia mukali wu mutende weve

¹² kudambiza vadaka, kwiva, kuvula kutunga magovi, nu kuzia kusigamira misambwa kandi vifananyi viu kuvihiliriza

¹³ kandi kwegobiza mabesa nu konyoora vukala. Mundu uyu si alamenya mba, kigira yamala kokora vindu vinyingi viukuvihiliriza. Maku alakuza kandi aladulwa kigira likuza lilie.

¹⁴ “Navuzwa niiva mundu wundi wakaviri uyu alava nu muyaayi. Alole uvwoni vwosi vwa baba weve yakola ma avuli kovokola,

¹⁵ kuli kulia visiuviliru kuvigulu, anoho avuli kusigamira vifananyi via vandu va Isiraeli, anoho avuli kwonogonyia mukali wu mutende weve,

¹⁶ anoho kudambiza mundu woosi anoho kwiva, kandi atungi magovi geege, kandi ahaane viukulia ku vaveeye ninzara, kandi ahaane zinguvu ku vaveeye niviahonyo,

¹⁷ Asuuli kokora uvudamanu, kandi yegobiza mabesa nukuvula konyoolaku uvukala kandi atizaa malago gange; mundu uyu sialakuza kigira uvwoni vwa baba weve mba, navuzwa alamenya ligali.

¹⁸ Kigira baba weve yaakola uvugaadi kandi niyiva, kandi naakora uvudamanu hagati havandu, kunangwa yakuza kigira uvwoni vwivwe umwene.

¹⁹ “Navuzwa ivi otevaa, ‘Kigira ki mwana asaliri kigira vwoni vwa baba weve?’ Amativuli gaveeye ndi, umwana yakola agaali amalungi kandi amalahi. Yalinda lilaga kandi naatia malago, kulwayago alamenya ligali.

²⁰ Mundu okolaa uvwoni alakuza. Mwana sialasalira kigira uvwoni vwa baba weve mba, anoho baba sialasalira kigira uvwoni vwu mwana weve mba. Mundu mulungi alanyoola madanyi ku likora uvulungi, kandi mundu mudamanu alasalira kigira uvudamanu vwakolaa.

²¹ “Niiva mundu mudamanu alaleka kokora uvwoni kandi agumili amalago gange, kandi niiva alakola agaveeye amalahi kandi amalungi, sialakuza mba; mundu uyu alamenya ligali.

²² Ndasamiiha uvwoni vwivwe vwosi, na sindavwizuliza kandi mba, kigira yakola agaali amalahi kandi amalungi.”

²³ Mwami Munene Yahova ateeva ndi, “Uganagana inzi ndasangalira likuza liu mundu mudamanu? Awa! Ndakayanzi kolola niyiganiraa uvwoni vwivwe kandi amenye.

²⁴ “Navuzwa lwu mundu mulungi aleka kokora uvulungi na akole uvwoni vwa vandu vadamanu vakora, mundu uyu alamenya? Awa! Uvulahi kandi uvulungi vwivwe vwa yakola si ndizuliza kandi mba. Alakuza kigira umali kokora uvugadi kandi kigira uvwoni vwa mali kokora.

²⁵ “Navuzwa munyi muvooraa, ‘Likora lia Yahova si liveeye lirungi mba.’ Mumbulirizi kalunu, munyi avandu va Isiraeli. Muganaganaa likora liange si liveeye lirungi? Likora lienyu nilio litaveeye lirungi.

²⁶ Lwu mundu mulungi alekaa kokora uvulungi maakora uvudamanu, akuzaa kigira uvudamanu vwa mali kokora.

²⁷ Lwu mundu mudamanu alekaa kokora uvwoni, maakora uvulahi kandi uvulungi, yehonyia umwene.

²⁸ Yizuliza agakolaa ma yiganira uvwoni vwosi vwakolaa, mundu ligali sialakuza mba, navuzwa alazizagilira komenya.

²⁹ Navuzwa munyi avandu va Isiraeli muvooraa, ‘Likora lia Yahova siliveeye lirungi mba.’ Musuuviraa inzira yange sieveeye inungi? Inzira yenyu niye itaveeye inungi.

³⁰ “Kalunu Inzi Yahova Wuvunyali ndamukalagira avandu va Isiraeli, vuli mulala kolondekana ni likora lilie. Mwiganiri na muleke uvudamanu vwosi vwa mukoraa, kandi mutaleka uvwoni vwinyu vumudivizi mba.

³¹ Muleke uvudamanu vwosi vwa mwakoraa, na muve nu mwoyo muhia kandi Roho muhia. Kigira ki munyi avandu va Isiraeli mwenya kukuza?

³² Inzi sisangaliraa likuza liu mundu kali mulala mba. Mwiganiri uvwoni vwinyu na mumenye.” Yahova Wuvunyali avoora.