Ezekieli 17 - KITABU KITAKATIFU

Lugano lwi Zindizu nu Muzabibu

¹ Yahova yamoloma na inzi,

² “Mwana wu Mundu, ovoolere avandu va Isiraeli lugano

³ kunangwa vaduuki kumanya aga inzi Yahova Wuvunyali mboraa kuvo: Yaliho Indizu enene ligali na mavaha malahi ligali kandi zimbaha zindambi ligali ziavambuka. Indizu yiyi yaaburuka nizia ku vigulu via Lebanoni kandi nivunaga endongozi yu musaala gwu mudaragwa,

⁴ yagivugula nigihira mu kivala chu kukiranyia, ma ngiviika mu lidaala lia vakiranyi.

⁵ Maku yavugula kitagwa kedoto kutura mu kivala cha Isiraeli ma nikitaga mu malova magunamu, havundu ha mazi gaali kazozo kokelomba kiviruki. Yaagusimika kuli musaala gwa matu.

⁶ Kitagwa yiki chaamera, nikitavalara kandi nikivaambalara ma nikigwa muzabibu gwa makuyu. Zisia ziagwo ziaviruka kuzia igulu windizu yaali kandi niguhila imiri mu malova ligali. Muzabibu yigu gwazizagilira komeeda zisia kandi amatu manyingi ligali.

⁷ “Yaliho kandi Indizu yindi enene ligali nizimbaha zinene ligali kandi amavaha malahi amanyingi ligali. Muzabibu gwahila imiri jagwo wi indizu yaali, kandi nigirung'anyia matu gagwo kuzia wa yaali; nigusuuvira ndi indizu ilaguha mazi manyingi kuvita mazi gagwanyoola mu mulimi gwa gwasimikwa mu.

⁸ Navuzwa muzabibu gwaali nigumali kutagwa mu malova magunamu, mulimi gwasamwa vulahi na mazi kunangwa muzabibu guduuki kuva ni zisia kandi gwame amakuyu kandi gove muzabibu mulahi.

⁹ “Kunangwa inzi, Yahova Wuvunyali, ndateeva ndi: ‘Muzabibu yigu gulamenya kandi guviruki?’ Indizu yukutanga siliiha imiri, yaguli makuyu, ivunanye iziisia kandi eleke amatu gagwo amavisi niganiara? Si gulenya ihiiri ye zinguru anoho avandu vanyingi kugwiha ni miri mba.

¹⁰ Yee, muzabibu yigu gwatagwa, navuzwa gulamenya kandi guviruki? Sigulaniara lwi imbuza yu kudiviza kutura Ivugwi ihuuzaa? Si gulaniara kali hagwasimikwa?”

Yahova Yiivara Lugano

¹¹ Yahova yambolera,

¹² “Oteeve avandu vukwibaara yava ndi: munyi mwamanya lugano yilu chalovoolaa? Uvavoolere ndi, Mwami wa Babiloni yaza Jerusalemi ma navugura Mwami harara navatumikiri veve navahira Babiloni.

¹³ Yavugula mulala ku vandu vi inyumba yu Mwami, nalomba Lilagana naye kandi naamwisuuhiza. Yavugula avamihi vi kivala yiki naavahira ihale.

¹⁴ Kunangwa akole zihiiri zivuli kuhingira kandi kolola ndi lilagana liduukizwi.

¹⁵ Navuzwa Mwami wi Ivuyuda yibaala kandi natuma avatumwa kuzia Egebeti koleta zibarasi harara ni liihi lia vandu vanyingi. Alaguuta? Mundu okolaa vindu yivi anyala kohononoka? Anyala kuvunaga lilagano ma avuli konyoora mageri?”

¹⁶ Yahova Wuvunyali avoora, “Ligali inzi kuli mbeeye Nyasaye omenya, Mwami uyu alakuzira Babiloni kigira yaavunaga malagano geege kandi ni liesuuha lia yaali naalombi nu Mwami wa Babiloni, uwaamuvika kondeve yu Vwami.

¹⁷ Kali Mwami wa Egebeti harara ni liihi lilie lie zinguru sialamukonya kulwaana lwa vandu va Babiloni vumbaka vitumi nukuyava malina nukwita vandu vanyingi mba.

¹⁸ Yaavunaga lilagano kandi liesuuha lilie liayaali nalombi. Yakola vindu yivi viosi, na kalunu si alahona mba.”

¹⁹ Kulwayago, Yahova Wuvunyali avoora, “Ligali Inzi kuli mbeeye Nyasaye omenya, ndahaana mageri kuye kigira umali kuvunaga lilagana liayisuuha ku lieta liange.

²⁰ Ndaavambura mutego kumutega, na gulamugumila. Ndamuhila Babiloni nu kumuherayo amageri, kigira siyaali musuuvirifu ku inzi mba.

²¹ Avasikari veve avalahi vosi valitirwa mu liihi, nayavo avalihona valakasalanywe havundu hoosi. Maku mulakamanye ndi inzi Yahova mali kovora.”

Nyasaye Yalaga Kuvakonya

²² Yaga nigo ga Yahova Wuvunyali avoora: “Inzi mwene ndavugura esonga yu mudaragwa mutambi na; ndavunaga esonga endoto kutura kulusia; ndagisimika ku kiguru kitambi ligali.

²³ Ndagusimika kukigulu cha Isiraeli kitambi ligali. Gulasivuka zisia kandi gulama makuyu gulava mudaragwa mulahi ligali. Zinyama zing'ano ziosi zilamenya isi wagwo, kandi amanyonyi zing'ano ziosi zilalomba zinyumba mu zisia ziagwo.

²⁴ Misaala josi mu kivala jilamanya ndi Inzi mbeeye Yahova. Inzi ndemaa misaala mitambi kandi ngola misaala mimbi jiviruka kandi jitambiha. Nduminyaa misaala mivisi, kandi ngora misaala miumu kugwa mivisi. Inzi Yahova mali kovora kandi ndakora agaamali kovora ndakora.”