Ezekieli 16 - KITABU KITAKATIFU

Avandu va Jerusalemi Avataveeye Vasuuvirifu

¹ Yahova yamoloma ninzi kandi.

² Yavoola, “Mwana wu Mundu, ovoolere avandu va Jerusalemi ivindu viukuvihiliriza via vamali kokora.

³ Ovavolere ga inzi Yahova Wuvunyali avavoolera: “Munyi mwivulwa mu kivala cha Kanaani. Baba winyu yaali Muamori, na mama winyu yaali Muhiti.

⁴ Lwa mwivulwa, umundu si yakala ululera lwinyu anoho kumwisaviza mba. Kandi mundu si yamuvohelera ni ijumbi anoho kumuvoha mu zinguvu mba.

⁵ Umundu kali mulala siyamuvererera ku nukumukolera kindu kali kilala ku vindu yivi mba. Lwa mwivulwa umundu kali mulala si yamuyanza mba. Mwasiuvwa ichova mu kivala nukwivililwa.

⁶ “Maku ndaavitiraho kandi nindora nimugaragaraa mu masahi ginyu. Mwaali nimwivaki masahi, navuzwa sindaali nyara koleka mukuzi mba.

⁷ Ndaamukora nimuviruka kuli kitagwa kinifu. Mwaviruka nizinguru nimutambiha kandi nimuva kuli magina guvuguli malahi ligali. Zimbeere zienyu zialombwa vulahi, kandi liisu lienyu liatambiha, munyi avaari chahonyo kandi vugira kindu.

⁸ “Lwa ndaavitira ho kandi, ndaalora ndi ing'inga iduuki munyi kuyanzwa. Ndaakunika chahonyo chienyu nilikoti liange, kandi ndavasuuviriza ndi ndamuyanza. Yee, ndalomba lilagana liange ni munyi kandi mwagwa avandu vange.” Yaga nigo aga Yahova Wuvunyali avoora.

⁹ “Maku ndaavugura mazi nimusinga, masahi gaturaa ku munyi ma niimuvaka maguta.

¹⁰ Ndaamuvika zigaanza ziamangilinya kandi nimuviika vilato viekeselo kilahi, igudwa yikatani kumutwi ni inguvu indahi yuvwoya.

¹¹ Ndaamusiaha na magina guvuguli vudinyu, ndamuviika zibangili ku makono kandi madongolo mumang'oti ginyu.

¹² Ndaamuha viuma viumumuulu kandi viuma viumumatu ni igudwa indahi yukwivika.

¹³ Mwisiaha viuma vie ifeza nizahabu kandi mwivika vuli ing'inga zinguvu ziamangilinya gi katani kandi zindahi ligali. Mwalia mugadi gwalombwa kutura ku vusie vulahi ligali. Mwaakomba uvwuki namaguta gamuzeituni. Uvulahi vwinyu vwang'ereng'ana kandi nimuduuka kuliiva liu Mwami wikikali.

¹⁴ Mwamanyikana mu vuli ihiiri kigira vulahi vwinyu vwuvuduukiru, kigira ndaamukora kuva avukuyaanzilira ligali.” Yaga nigo ga Yahova Wuvunyali avoora.

¹⁵ “Navuzwa mwasuuvira mu vulahi vwinyu ligali kandi nimutumikira limanyikana lienyu kokora uvulaya. Mwamanya nimwihaana ku mundu woosi wa mwanyoola.

¹⁶ Mwavugula zindala ku zigaanza zienyu nimulomba ahukusigamira vifananyi nanimukolelaku kuzio uvoheyi. Vindu kuli yivi sividukana viekoleke ku kali hakuzu mba.

¹⁷ Munyi kandi mwavugula magina guvuguli agandamuha, agalombwa ku ifeza nizahabu, ma nimwelombera vifananyi visaza kandi nimukora ovoheyi navio.

¹⁸ Mwavugula zinguvu zienyu ziamangilinya ziandamuha nimuviika ku vifananyi, nimuhaana ku ivisiuviliru yivio maguta gange nivifunya mwayu gandaali nimuheye.

¹⁹ Ndaamuha viukulia: Uvusie vulahi ligali, maguta gumuzeituni, kandi uvwuki, navuzwa mwavihaana kuli visiuviliru konyoora liyaanzilira lie vifananyi.” Yaga nigo ga Yahova Wuvunyali avoora.

²⁰ “Maku mwavugula avayaayi navakaana vinyu avamwanzivulira nimuvahaana vave kuli visiuviliru vie chukulia ku ivifananyi. Uvulaya vwinyu sivwaduukana mba?

²¹ Mwasinza avana vange nimuhaana vave kuli ivisiuviliru ku ivifananyi.

²² Mu ing'inga yilimenya lienyu lielivihiliriza kuli avandu vataveeye avasuuvirifu, si mwizulizaa ku kali hakuzu madiku govosoleli mba; kali lwa mwaali chahonyo nimwivaki masahi ginyu.”

Limenya lia vandu va Jerusalemi kuli malaya

²³ Yahova Wuvunyali yavoola, “Munyi muveeye mu kivi! Muveeye mukivi! Mwakora uvudamanu yivu vwosi, kandi

²⁴ kolovega lwa vuli inzira, mwumbaka havundu hukusigamira ivifananyi nokokola uvulaya.

²⁵ Mwanogonyia miviri jienyu milahi. Mwihaana munyi aveene ku vuli umundu wavita vuli lidiku kuli liraya.

²⁶ Mwasigamira avanyasaye va avandu va Egebeti, avatende vinyu, kandi nimungola kuva nu vutima kigira livula kusuuvira.

²⁷ “Kalunu ndamuha mageri kandi ndavugura kedonye chiinyu chuvugasu vwange. Inzi mali kumuviika ku vandu va Filisitia, avavihilirwa munyi kandi vavihilirangwa ni vikolwa vienyu viu muviri.

²⁸ “Munyi mwakora uvulaya na vandu va Siria, navuzwa si mwanyoola via muduuka mba. Kali inyima wa gene yago, lienya lienyu si liadukizwa mba.

²⁹ Mwakora uvulaya kandi na vandu va Babiloni, ihiiri ya vandu vakoola uvukala, navuzwa si mwaduukiza lienya lienyu mba.”

³⁰ Yaga nigo ga Yahova Wuvunyali avoora: “Kandi kigira simwigutaa mba. Kali inyima wa gene yago, lienya lienyu siliaduukizwa mba.

³¹ Mwumbaka havundu hukusigamira ivifananyi ku vuli inzira kandi mwakora uvulaya. Navuzwa si mwaali nilienya mabese kuli liraya lia kase mba.

³² Munyi muveeye kuli mukali okolaa voheyi navandu vageni muvogono vwukuyaanza musaza weve.

³³ Liraya lihevwa mitungu, navuzwa munyi muheezaa avayaanze vinyu vihaanwa kandi muvahezaa viambeti vaze kutura havundu hoosi kunangwa vagone nimunyi,

³⁴ Munyi simuveeye kuli amalaya gandi mba. Avasaza sivamunigaa vagone nimunyi mba. Munyi mwihaana kuvatuunga.”

Likalaga lia Nyasaye ku vandu va Jerusalemi

³⁵ Kunangwa munyi avandu vataveeye avasuuvirifu, muhuliri likuva lia Yahova!

³⁶ Yaga nigo ga Yahova Wuvunyali avoora: “Munyi mwatuliza zinguvu zienyu kandi kuli liraya mwihaana munyi aveene kuvayaanze vinyu kandi ku vifananyi vinyu viosi viukuvihiliriza. Kandi mwitaa avana vinyu kuli visiuviliru ku vifananyi.

³⁷ Kigira yaga inzi nandete avayaanze vinyu vosi vamaziambiri harara; yavo avamwavula kuyaanza. Nambalete navamukumbilizi kandi namutulizi zinguvu zienyu ma nambakore navalole chahonyo chiinyu choosi.

³⁸ Inzi namukalagili kigira ovoheyi niliita, kandi muvutima vwange vululu namuhe mageri gi likuza.

³⁹ Maku na muviiki mu zinguru zia vayanze vinyu, kandi na vononyie havundu hamwakoleraa uvulaya nukusigamira ivifananyi. Na vamutulizi zinguvu zienyu kandi navavuguli magina ginyu guvuguli vudinyu ma navamuleke chahonyo ligali.

⁴⁰ “Navakole muganda gwa vandu kumwingilira nu kumulasa na magina kandi navamukalanyie mu vidonye ni vivavi viavo.

⁴¹ Navasambe zinyumba zienyu kandi navaleke muganda gwa vakali kolola amageri gamuhezaa. Ndaaza mukore kolekera kuva amalaya kandi na mukore namuleke kuhaana vihaanwa kuvayaanze vinyu.

⁴² Maku uvutima vwange navolekele kandi na ngiling'ane. Si ndaza mbe nu vutima anoho embodoka kandi mba.

⁴³ Mwamala kwivilira kuli ndamukolera lwa mwaali avasoleri, kandi mumali kongola kuva nu vutima kigira ivindu viosi viamumali kokora. Yiki nicho kigira mali kumukola mutungi viosi. Kigira ki munyi mwameeda miyinzi jumuviri kuvindu viosi viukuvihiliriza viamwakola?” Yahova Wuvunyali umali kovora.

Miima Ju Mukaana Jiveeye kuli ja mama weve

⁴⁴ Yahova yavoola, “Avandu valatumikira lugano yilu kigira munyi, avandu va Jerusalemi: ‘Niiva mama aveeye mudamanu, nindio mukaana weve aveeye.’

⁴⁵ Munyi muveeye kuli mukaana wa mama winyu yasura musaza weve kandi navana veve. Munyi muveeye kuli avakaana vinyu avavihilirwa vasaza vaavo kandi vana vaavo. Baba winyu yaali Muamori na mama winyu yaali Muhiti.

⁴⁶ “Mukaana winyu munene ni Samaria omenyi na vakana veve Ivaale winyu; mukaana winyu mukekeeke ni Sodoma omenyi Isavaalu harara na vakana veve.

⁴⁷ Munyi si mwagenda mu zinzira ziavo nokolonda likora liavo lidamanu lieng'ine mba, navuzwa mu zinzira zienyu ziosi mwaali avandu vadamanu ligali kuvita yavo.”

⁴⁸ Yahova Wuvunyali avoora, “Nagiligali kuli mbeeye Nyasaye oveeye mwoyo,” mukaana winyu wa Sodoma kandi navandu vu tudaala twitwe si vaakora ku uvudamanu vwa ivi navandu vutudaala tutwo vamali kokora mba.

⁴⁹ Oyo harara navakaana veve velola kigira vaali niviukulia vinyingi kandi vamenya mu mirembe, navuzwa si vahendera mwoyo avadaka navandu vaali nilienya mba.

⁵⁰ Vaali avelori kandi vahindagirizi kandi vakora vindu viambihiliriza, kunangwa ndaavadiviza ligali.

⁵¹ “Vwoni vwa vandu va Samaria vakora si voveeye inusu yu vwoni mba. Munyi mwakora ivindu viukuvihiliriza ligali kuvita aga yavo vakora. Uvwoneku vwinyu vwalomba avakaana vinyu kufana avataveeye nimbala.

⁵² Kandi kalunu ivi ulava muzisoni ligali. Avakaana vinyu vafana avataveeye nimbala lwavaveeye ahimbi nivi, kigira uvwoni vuvwo voveeye vudamanu ligali kuvita vwavo. Kalunu odegere kandi ove muzisoni, kigira okolaa avakaana vinyu kufana avalahi.”

Amadara ga Sodoma na Samaria galagaasizwa kandi

⁵³ Yahova yavolera avandu va Jerusalemi, “Inzi ndagasiza avandu va Sodoma navandu vutudaala twalio kandi avandu va Samaria navandu vutudaala twalio. Yee, ivi ulagasizwa kandi.

⁵⁴ Kunangwa na muve muzisoni munyi aveene kigira kugoosi aga mumali kokora mu livaleminya mwoyo.

⁵⁵ Lwi ing'inga yeyo iliduuka, munyi harara navandu va Sodoma na Samaria mulakagasizwi kandi. Avandu vutudaala twosi toveeye ahimbi valakiranywe.

⁵⁶ Munyi si mwakolera mukaana winyu Sodoma kehenyahenye mu madiku gamwaali nimwelora

⁵⁷ kandi inyima wi zimbi ziamwali nimwakola nizikikiri kulang'aminywa? Kalunu muveeye vuzwa kuli yavo; kehenyahenye ku vandu va Edomu, avandu va Filisitia, kandi navatende vinyu vandi ava muvihilira.

⁵⁸ Kuduuka munyi musalirizwi ku manyego, nivindu viukuvihiliriza viamumali kokora.” Yahova umali kovora.

Lilagana Lihindiraa Mihiga Ni mihiga

⁵⁹ Yahova Wuvunyali avoora, “Inzi ndamukolera kuli gamuduukira, kigira mwaregeliza lilagana lienyu kandi nimuvunanyia Lilagana Liandalomba.

⁶⁰ Navuzwa nambane luyali ku lilagana liandalomba ni munyi lwa mwaali nimukikiri vasoleri. Nanombe lilagana ni munyi liaza lihindiri mihiga ni mihiga.

⁶¹ Munyi mwaza mwizurizi kuli mumali kokora lwa mwaza mwiranyilwi avakaana vinyu vakulundu navakaana vinyu vakekeeke. Ndaaza mbakole na vave kuli avavozo ku munyi, kali niiva yili si liali lilagana liange ni munyi mba.

⁶² Inzi nanombe uvuhia Lilagana Liange ni munyi, kandi na mumanyirizi ndi inzi mbeeye Yahova.

⁶³ Nasamihi uvwoni vwinyu vwosi vwa mumali kokora, navuzwa nimuvwizulizi kandi namuve muzizoni ligali kali sinamutivuli ku kindu mba.” Yahova Wuvunyali umali kovora.