Ezekieli 15 - KITABU KITAKATIFU

Lugano Kigira Muzabibu

¹ Yahova yamoloma ninzi.

² Yavoola, “Mwana wu Mundu, muzabibu gunyala ndi kufananywa nu musaala? Ulusia lwu mukuyu gwu muzabibu loveeye na vulahi ki nufananyia nu musaala gwu mumulitu?

³ Unyala kutumikira ulusia lwumuzabibu kolomba ku kindu? Unyala kolomba ku kali kigutu chukusunga ku vindu?

⁴ Loveeye vuzwa lulahi mulifanila umuliru. Unyala kolomba ku kindu lwa lumali kusambwa ma lugwiyi amanda?

⁵ Lwali kindu kitaveeye novokonyi kali lwa lwali nilukikili kusambwa. Kalunu lwu muliru gumali kulusamba ma lugwiyi amanda, loveeye ligali kindu kitaveeye chuvokonyi.”

⁶ Kalunu yaga nigo agu Yahova Wuvunyali avoora, “Kuli Muzabibu guvugulwaa kutura mumulitu ma gusambwa, nindio inzi ndakavuguli avandu vamenya mu Jerusalemi

⁷ ma nambahe mageri. Vamali kohononoka mumuliru mulala, navuzwa kalunu muliru gundi gulavasamba ligali. Lwa nambahe mageri, ivi waza umanye ndi Inzi mbeeye Yahova.

⁸ Ndakora kivala chavo kugwa mwigendanyama kigira vamali kuva avandu vataveeye avasuuvirifu ku inzi.” Yahova Wuvunyali umali kovora.