Ezekieli 14 - KITABU KITAKATIFU

Nyasaye Yakalagira Vifananyi

¹ Valala ku vimiliri va Isiraeli vaza ku inzi kwenyeleriza zing'anagani kigira lienya lia Yahova.

² Maku Yahova yambolera,

³ “Mwana wu Mundu, avandu yava vaviiki mioyo jaavo ku vifananyi kandi vavimilira kokora uvwoni. Vaganagana inzi ndahaana mativuli kuvo?

⁴ “Kalunu, molomaa kuvo na uvavoolere aga Inzi, Yahova Wuvunyali mboraa kuvo: Vuli mundu woosi ku vandu va Isiraeli umali kuviika mwoyo gwigwe ku vifananyi nokoleka vamwimiliri mu likora uvwoni, maku vaza koteeva zing'anagani kutura ku vaporofeti, valanyora mativuli kutura ku inzi; galava mativuli gi vifananyi vivie vinyingi viduukana vinyoole!

⁵ Vifananyi yivi viosi vimali kugirung'anyia vandu va Isiraeli kuzia ihale kutura ku inzi, navuzwa kuvitira mumativuli gange mbe nilisuvira ndi valirana ku inzi.

⁶ “Kulwayago, ovoolere avandu va Isiraeli aga inzi, Mwami Munene Yahova mboraa: mwiganiri kandi mugirung'ane kutura ku vifananyi vinyu viu kuvihiliriza. Mugirung'ane kutura ku likora vudamanu vwosi.

⁷ “Lwa mulala ku vandu va Isiraeli, anoho mulala ku vageni vamenyi mu Isiraeli agirung'ana kutura ku inzi nukusigamira vifananyi, maku vazia koteeva zing'anagani kutura ku vaporofeti, Inzi Yahova ndahaana mativuli kuye.

⁸ Ndahingira mundu uyu. Ndamukora ave kelolero cha maduywa. Ndamutuliza mu kivala cha vandu vange Isiraeli. Maku mulamanya ndi Inzi mbeeye Yahova.

⁹ “Niiva muporofeti alagadwa nu kumoloma makuva gataveeye gagiligali, gaveeye kigira Inzi Yahova mali kumugada. Ndahaana mageri kuye kandi Ndamutuliza hagati ha vandu vange Isiraeli, kunangwa muduuki kumanya ndi mbeeye Yahova.

¹⁰ Vombi muporofeti kandi mundu uziyi koteeva zing'anagani kutura kuye valanyora mageri malala mere.

¹¹ Inzi ndakora yaga kunangwa vandu va Isiraeli vavuli kondeka, anoho vavuli kweyononyia nuvwoni vwavo. Valava avandu vange, na inzi ndava Nyasaye wavo.” Yahova Wuvunyali umali kovora.

Nuhu, Danieli na Ayubu

¹² Yahova yambolera,

¹³ “Mwana wu Mundu, niiva vandu valakola uvwoni kandi vavuli kuva vasuuvirifu ku inzi, ndahaana mageri kuvo nukwononyia linyola lie viukulia viavo. Ndatuma inzara kwita vandu harara ni zinyama.

¹⁴ Kali niiva vandu vavaga yava, Nuhu, Danieli na Ayubu vamenyi mu kivala yiki, valahona kigira uvulungi vwavo.” Yahova Wuvunyali umali kovora.

¹⁵ “Anoho niiva nyara kutuma zinyama ziu muvulimu kwita vandu, nokokola kivala kuva chere chu mundu avula kuvitira mu.

¹⁶ Kali niiva vandu vavaga yava vamenyi mu kivala yiki; gaveeye giligali inzi kuli Yahova Wuvunyali, nimbeeye Nyasaye omenya, avandu yava sinavanyala kohonyia avayaayi vaavo na vakana vaavo mba. Navahonyie livamwoyo liavo, navuzwa kivala nakitigale changalangwe.

¹⁷ “Anoho niiva ndaleta iliihi ku kivala yiki nukutuma iviugi viu kudiviza vandu, harara ni zinyama,

¹⁸ kali niiva vandu vavaga yava vamenyi mu kivala yiki, gaveeye giligali inzi kuli Yahova Wuvunyali, mbeeye Nyasaye omenya, avandu yava si navahonyie avayaayi vaavo na vakana vaavo mba, navuzwa navahonyie livamwoyo liavo.

¹⁹ “Anoho niiva ndatuma uvulwaye uvudamanu ku kivala yiki, na muvutima vwange nziti avandu ni zinyama,

²⁰ kali niiva Nuhu, Danieli na Ayubu vamenyi mu kivala yiki, gaveeye giligali inzi kuli Yahova Wuvunyali mbeeye Nyasaye omenya. Avandu yava sinavahonyie avayaayi vaavo na vakana vaavo mba. Valahona kigira uvulungi vwavo.”

²¹ Yaga nigo agu Mwami Munene Yahova avoora: “Ndahaana mageri malulu haali kane ku Jerusalemi; ndaleta iliihi, inzara, zinyama ziu muvulimu kandi uvulwaye vudamanu kudiviza vandu ni zinyama.

²² Kali niiva mulala ku vandu yava alatigala kandi ahonyie avana veve avakaana na vayaayi, lwa vaza ku ivi, uvahenze olole kuli vaveeye avadamanu, ulavugilira ndi amageri gambana ku Jerusalemi gaveeye malungi,

²³ Maku ulakalole vikolwa viavo, kandi ulakamanye ndi ndaali nikivuni chukuhaana mageri kuvo.” Yahova Wuvunyali umali kovora.