Ezekieli 13 - KITABU KITAKATIFU

Ovaporofeti ku Vaporofeti vasaza Vuvugadi

¹ Yahova yambolera,

² “Mwana wu Mundu, ukalagiri uvudamanu vwa vaporofeti va Isiraeli avaporofetaa amakuva gi zing'anagani ziavo aveene. Uvavoolere vahulirizi likuva liange.”

³ Yaga nigo aga Yahova Wuvunyali avoora: “Kivi keveeye ku vaporofeti vasiru yava! Vavoola makuva gi zing'anagani ziavo aveene kandi avelombera malola gaavo aveene.

⁴ Avandu va Isiraeli, avaporofeti vinyu vaveeye kuli vivwi vitaveeye novokonyi vimenya hagati ha mang'anye gi lidaala linene.

⁵ Sivinyala kulinda havundu ha madigi gaayavuguka mba, anoho sivinyala kwumbaka uvuhia madigi ga vandu va Isiraeli mba. Kulwayago Isiraeli sinyala kukingwa lwu vulwani navuuzi ku lidiku liange lia Yahova mba.

⁶ Amalola gaavo si gaveeye gagiligali mba, kandi ovoporofeti vwavo voveeye vwu vugadi. Vavoola ndi vamoloma makuva gange, navuzwa sindaavatuma mba. Venya makuva gaavo gaduuki kuva gagiligali.

⁷ Inzi mbavooleraa: Amalola gavaloraa sigaveeye gagiligali mba, kandi ovoporofeti vwavo voveeye vwu vugadi. Vavoola ndi, gaveeye amakuva gange, navuzwa sindamoloma navo mba!”

⁸ Kunangwa Yahova Wuvunyali avavoolera, “Amakuva ginyu sigaveeye gagiligali mba, kandi malola ginyu gaveeye gu vugadi. Mbeeye nu vusigu nimunyi; kandi

⁹ mbeeye himbi kuhaana mageri ku munyi, avaporofeti avaveeye na malola gataveeye gagiligali kandi avaveeye nu voporofeti vwu vugadi. Sinamuve harara nu muganda gwa vandu vange, anoho simulang'odwa harara namita ga vandu va Isiraeli mba, anoho simulakilane mu kivala cha Isiraeli mba. Maku mulakamanye ndi, inzi mbeeye Yahova Wuvunyali.

¹⁰ “Avaporofeti vagotiza avandu vange nu kuvavoolera ndi goosi gaveeye amalahi lwa goosi gataveeye amalahi mba! Avandu vange vumbaka lidigi lia magina, navuzwa avaporofeti yava vazaa mavalikunika novodohi uvulavu.

¹¹ Ovoolere avaporofeti ndi amadigi ga vaporofeti yava gazizaa kugwa. Nangubizi imbura enene ya magina, kandi imbuza enene kuhunguza lidigi yili.

¹² Lidigi lilavunguluka nu kugwa, kandi avandu valakateeve ndi, uvulahi vwa madohi ku lidigi voveeye ki?”

¹³ Kalunu yaga nigo gu Yahova Wuvunyali avoora, “Mu vutima vwange, ndatuma imbuza yi kiihi kandi, imbura enene ya magina kudiviza lidigi.

¹⁴ Ndasambura lidigi liavumbaka novodohi nukulidiviza, kandi ndaleka imise jalio jamagina hazwa. Lilamugwila na mwosi muladiva. Maku mulamanya ndi Inzi mbeeye Yahova.

¹⁵ “Uvutima vwange vulava ku lidigi harara ni yavo avavaka ovodohi kulio. Maku ndamuvolera ndi lidigi harara na vaavaka ovodohi kulio vamali kudivizwa,

¹⁶ avaporofeti va Isiraeli avasuuvirizaa avandu va Jerusalemi ndi goosi gaveeye amalahi, lwa gataveeye amalahi!” Yahova Wuvunyali umali kovora.

Ovoporofeti Uvudamanu ku Vakali Vaporofeti

¹⁷ Yahova yavoola, “Kalunu Mwana wu Mundu, henza avakali hagati ha vandu vovo avaporofetaa kolondekana ni zing'anagani ziavo. Uvakalagiri havulavu,

¹⁸ kandi uvavoolere ga Yahova Wuvunyali avoora kuvo. “Avakali munyi kivi keveeye kumunyi avanaviraa viuma viu vukumu ku videte viosi, kandi avalomba vitambaya ku mitwi ja vandu vulugano lwosi kulwukwenya kwita vandu! Mwenya kwita avandu vange navandi muvahonyie kuvukala vwinyu aveene?

¹⁹ Munyi mwavura kuhaana luyali ku inzi imbiri wa vandu vange kunangwa muduuki konyoora uvuswage vokekeeke kandi migadi mikekeeke. Mwita vandu vataduukanaa kwitwa kandi muhonyia vandu vataduukanaa vavuli kuva mwoyo. Kunangwa muvooraa makuva gu vugadi ku vandu vange, kandi vamusuuvira.”

²⁰ Kulwayago, yaga nigo gu Mwami Munene Yahova avoora, “Inzi mbeeye ni livihilirizwa ni viuma viuvukumu via mutumikiraa kwita vandu vange, kandi ndavituliza kutura ku makono jienyu. Ndaleka vandu va munyi mwitaa vave avavoholore kuli amanyonyi.

²¹ Ndatandura vitambaya kutura ku mitwi jienyu, kandi ndahonyia vandu vange kutura kuzinguru zienyu na simulavita kandi mba. Maku mulamanya ndi inzi mbeeye Yahova.

²² “Mumali kogotiza liluvirira lia vandu valungi nu vugadi vwinyu, ava inzi ndaveeye ni lienya vavuli kusalirizwa. Mwigalira vandu vadamanu vavuli koleka vudamanu vwavo, kandi muhonyia livamwoyo liavo.

²³ Kulwayago amalola ginyu gataveeye gagiligali kandi ovoporofeti vwu vugadi vumali koherizwa. Ndahonyia vandu vange kutura mu zinguru zienyu. Maku mulamanya ndi Inzi mbeeye Yahova.”