Ezekieli 12 - KITABU KITAKATIFU

Muporofeti Kuli Umuhaali

¹ Yahova yamoloma ninzi.

² Yavoola, “Mwana wu Mundu, ivi omenya na vandu vukwibaara. Vaveeye ni zimoni, navuzwa si valora kindu mba; vaveeye na matu, navuzwa si vahulira mba kigira vaveeye avandu vukwibaara.

³ “Kalunu, Mwana wu Mundu, vungiliza misigo jijo kuli uwilihaminywa kandi inyinga ya mbasu vandu nivaloraa. Oleke vuli mundu akolole nuzizaa havundu handi. Namusia avibaali yavo valakolola nuzizaa.

⁴ Ni vukikiri mbasu, lohiza, misigo jijo kuziamulihaminywa, kunangwa vaduuki kokolola. Maku mu ing'inga ya mugolova nivalora, utuli mulihaminywa, kunangwa vaduuki kokolola. Maku mu ing'inga ya mugolova, lwavaalora, utuli ichova kuli yavo avazizaa mu lihaminywa.

⁵ Lwa vava nivakolola ufuduli muluhu mu lidigi lie inyumba yooyo ma uvitizili mu musigo gugwo.

⁶ Leka vakolole nuviika misigo jijo kumavega kandi nuzizaa ichova mu kisundi na mumoni mumwo nimukunikiywi, kunangwa uvuli kolola wa uzizaa. Aga okolaa galakave lieganihiza ku vandu va Isiraeli.”

⁷ Ndaakola aga Yahova yambolera ngole. Ku lidiku yilio ndaavungiliza misigo jange kuli uwilihaminywa, kandi mugolova yigwo lwa isi yaali nimwamaa ndaafudula muluhu mu lidigi ma nimbitira mu. Ndaviika misigo jange ku mavega ma ninzia vuli umundu naandora.

⁸ Lidiku lia kaviri Yahova yamoloma na inzi.

⁹ Yavoola, “Mwana wu Mundu, kalunu avandu va Isiraeli avibaara yavo vateva icha okolaa,

¹⁰ uvavoolere aga Inzi, Yahova Wuvunyali mbavooleraa. Likuva yili liveeye ku munene wamihaa mu Jerusalemi nu ku vandu vosi avamenyi mu.

¹¹ Uvavoolere ndi, aga umali kokora nikelolero ku agaza gekoleke kuvo. Navazie mulihaminywa kuli avatugwa.

¹² Munene wamihaa nagiingi misigo jije mu kisundi kandi nahononoke kuvitira mu muluhu gwavamufudula mu lidigi. Alakakuniki mumoni mwimwe kandi sialinyala kolola uwaziza mba.

¹³ Navuzwa ndaavambura eneti yange kandi ndakamugimilimu. Maku ndakamuhili mu lidaala linene lia Babiloni, walikuzila vugira kulilola.

¹⁴ Ndakasalanyie avasangi vosi avumumugizi gwigwe muzimbega ziosi, niyavo avahaani viziganagani numusikali weve, na avandu valakavenye vaduuki kuvita.

¹⁵ “Lwa nambasalanyiri mu zihiiri zindi, kandi muvivala vigeni, navamanye ndi, inzi mbeeye Yahova.

¹⁶ Ndaleka vakekeeke kuvo vahononoke kutura muliihi, inzara kandi muvulwaye. Uwene yeyo mu zihiiri, navamanyirizi kuli vikolwa viavo viukuvihiliriza vimali kuva, kandi navamanye ndi inzi mbeeye Yahova.”

Kelolero Chu Muporofeti Odegelaa

¹⁷ Yahova yamoloma ninzi.

¹⁸ Yavoola, “Mwana wu Mundu, odegere lwa uliizaa chukulia kandi odegere nuvuti lwa unwezaa amazi.

¹⁹ Ovolere ihiiri yoosi ndi yili ni likuva lia Yahova Wuvunyali ku vandu va Jerusalemi avakemenyi mu kivala chavo: Valakadegere lwavalizaa kandi valakadegere nuvuti lwavanwezaa. Kivala chavo nakitigale hazwa, kigira vuli mundu omenyi mu aveeye vugira malago.

²⁰ Amadara manene agaveeye kalunu na vandu vanyingi nangadivizwi, kandi kivala nakigwi mwigendanyama. Maku navamanyirizi ndi, inzi mbeeye Yahova.”

Makuva ga Yahova Galakachuukizwi

²¹ Yahova yamoloma ninzi kandi.

²² Yavoola, “Mwana wu Mundu, ni lugano ki lwa umali kuva nalwo yilu kigira kivala cha vandu va Isiraeli, ‘Madiku gameedeka kandi vuli malola si gatwekizangwa mba?’

²³ Kalunu uvavoolere aga inzi, Mwami Munene Yahova, mali kovora kigira yaga. Ndigalira lugano yilwo. Si valalutumikira kuli lugano mu kivala cha Isiraeli mba. Uvavoolere muvogono yivwo, ing'inga imali kuduuka lwa vuli malola galakatwekizwi!

²⁴ “Malola govovehi anoho voporofeti vwukuchaminya si vulikaveho kandi mu vandu va Isiraeli mba.

²⁵ Inzi Yahova ndakamolome kuvo, kandi agandivoola galakekoleke. Lilindagilira si lilakaveho kandi mba. Mulimenya lienyu, munyi mwibaara, ndakakole agaamali kumwiganihiza ndi ndakora. Inzi mali kovora,” Yahova Wuvunyali avoora.

²⁶ Yahova yambolera,

²⁷ “Mwana wu Mundu, avandu va Isiraeli vaganagana ndi malola googo kandi voporofeti vuvwo voveeye kigira madiku gaaza.

²⁸ Kunangwa uvavoolere ndi, inzi, Yahova Wuvunyali mboraa: Lilindagilira si lilakaveho kandi mba. Aga inzi mali kovora galakekoleke. Inzi Yahova Wuvunyali mali kovora!”