Ezekieli 11 - KITABU KITAKATIFU

Avandu va Jerusalemi Vakalagirwa

¹ Roho wa Nyasaye yang'inga igulu kandi nambira mu kirivwa chi Ivugwi chi Litembeli. Hene yaho ahimbi nikilivwa ndaalora avasaza 25, harara na Jaazania mwana wa Azuri, Pelatia mwana wa Benaya na aviimiliri vaviri vi kivala.

² Nyasaye yambolera, “Mwana wu Mundu, avandu yava valomba lilohiza lidamanu kandi vahaana zing'anagani zindamanu mu lidaala linene yili.

³ Vavola, ‘Koveeye ahimbi kwumbaka zinyumba kandi. Lidaala linene yili liveeye kuli inyingu yokodekeramu, na kunyi koveeye kuli inyama muyo, navuzwa kali ndio kikukingaa kutura ku muliru.’

⁴ Kunangwa kalunu Mwana wu Mundu oporofete vudamanu vwavo.”

⁵ Roho wa Yahova yanzimilira, kandi Yahova yambolere mbolere avandu likuva yili: “Avandu va Isiraeli, ndaamanya agamuvolaa kandi agamulohizaa.

⁶ Munyi mumali kwita vandu vanyingi mu lidaala linene yili kunangwa miviri javakuzu jizuyi muzinzira du.

⁷ “Kunangwa yaga nigo aga inzi, Yahova Wuvunyali mboraa. Lidaala linene yili liveeye ligali inyingu yokodekeramu, navuzwa inyama eveeye ki? Inyama yiyi eveeye miviri jayavo avamumali kwita. Munyi si mulava hano mba, ndamusiuva ichova wi lidaala linene!

⁸ Munyi mutiizaa vivavi? Ndaleta vandu vamwingiliri ni vivavi.

⁹ Ndamuvugura kutura mu lidaala linene nukumuhira kuvageni. Inzi mali kumukalagira likuza,

¹⁰ kandi na mwitilwi mu vulwani mu kivala chiinyu. Maku vuli mundu namanye ndi inzi mbeeye Yahova.

¹¹ Lidaala linene yili si lilamukinga kuli inyingu ikingaa inyama muyo mba. Ndahaana mageri ku munyi hoosi ahamuliva mu kivala cha Isiraeli.

¹² Munyi mulakamanye ndi inzi mbeeye yahova kandi simwalonda malago givivala viveeye ahimbi ni munyi mba, mwavunanyia malago nukuvula kutia malagano gange.”

¹³ Lwa ndaali nemporofetaa, Pelatia yagwa hasi nakuza. Ndaagwa hasi mamumama kandi nimbanzuka nimbora, “Awa Mwami munene Yahova! Uzizaa kwita vuli mundu watigala mu Isiraeli?”

Lilagana lia Nyasaye Ku vandu vaali muvuhambe

¹⁴ Yahova yamoloma na inzi.

¹⁵ Yavoola, “Mwana wu Mundu, avandu vamenyi mu Jerusalemi vamoloma kigira munyi kandi kigira avandu va Isiraeli avaveeye mu vuhambe. Vavoola, ‘Avandu vumuvuhambe vaveeye ihale ligali ku lisigamira Yahova. Umali kukuha kivala yiki kuli mwandu gwitu.’

¹⁶ “Kalunu ovoolere avandu vilihaminywa vache agambooraa. Ni inzi wavahila komenya mu zihiiri zie ihale kandi nimbasalanyira muvivala vindi. Nitali, ku ing'inga engekeeke ndava harara navo muvivala via vazia mu.

¹⁷ “Kunangwa uvavoolere aga inzi, Mwami Munene Yahova mboraa. Ndavavungiza kutura muvivala uwa ndavasalanyira, kandi ndakavilanyili kivala cha Isiraeli.

¹⁸ Lwa na viirane, navatuliziho ivifananyi viosi viukuvihiliriza vifunya vugunda viavanyoola mu.

¹⁹ Inzi ndakavahe mwoyo muhia kandi zing'anagani zimbia. Ndakatulizi muvo mwoyo gwiligina kandi ndakavahe mwoyo gwukutia.

²⁰ Maku valakalonde malago gange muvusuuvirifu vwosi valakave avandu vange na inzi ndakave Nyasaye wavo.

²¹ Navuzwa nambane amageri ku vandu vayaanza kusigamira ivifananyi viukuvihiliriza vifunya vugundu. Ndakavahe mageri kigira agavamali kokora.” Yahova Wuvunyali amali kovora.

Uvukumi vwa Nyasaye vwatula ku Jerusalemi

²² Vakerubi vaveeye mwoyo vatanga kuburuka, kandi magurudumu gaazia harara navo. Vukumi vwa Nyasaye wa Isiraeli vwali kuvo.

²³ Maku vukumi vwatula mu lidaala linene kandi nivuzia mu kiguru Ivugwi walio.

²⁴ Mu amalola, roho wa Nyasaye yang'inga igulu kandi niyanziranyia inyima ku vandu vaali nuvuhambe mu Babiloni. Maku malola gatulizwaho,

²⁵ kandi ndavolera vandu vaali muvuhambe vuli kindu cha Yahova yaali niyamanyi.