Ezekieli 10 - KITABU KITAKATIFU

Vukumi Vwa Yahova Vuturaa mu Litembeli

¹ Ndahenza igulu mu vwerefu, na ndaalora kindu kuli endeve yu vwami iyalombwa ni safiro neveeye igulu wi mitwi ja Vakerubi.

² Nyasaye yavolera mundu yaali ni yiviiki inguvu yuluvaala, “Uzie hagati ha magurudumu isi wa vakerubi ma uvuguli amanda gu muliru ugasalanyie mu lidaala linene.” Ndaalora mundu uyu nazizaa.

³ Vakerubi vaali nivasiingiyi Isavaalu wi Litembeli lwu mundu uyu yingilamu. Kandi amalesi gakunikaa mugizi gwu mugati gwi Litembeli.

⁴ Uvukumi vwa Yahova vwatula ku vakerubi nivuzia mu vwingiliru vwi Litembeli. Maku amalesi gakunikaa Litembeli, no vong'ereng'anu vwu vukumi vwa Yahova vwakunika mugizi gwi Litembeli.

⁵ Liyoga lia vakerubi liahulirika kali kuduuka mu mugizi gwi chova. Gwahulirika kuli umwoyo gwa Nyasaye Wuvunyali.

⁶ Lwa Yahova yalaga mundu waali ni yiviiki zinguvu ziu luvaala kuvugura manda gu muliru kutura hagati ha magurudumu agaali isi wa vakerubi, mundu uyu yazia nasingira ahimbi ni ligurudumu.

⁷ Mulala ku vakerubi yavika mukono gwigwe mu muliru gwaali hagati haavo, navugura manda gu muliru, nagaviika mu makono gu mundu waali niyiviiki zinguvu ziu luvaala. Mundu uyu yavugula manda ma nazia.

⁸ Vuli kelombe chaali ni kindu chafana mukono gwu mundu isi wi zimbaha ziacho.

⁹ Kandi ndahenza nindora magurudumu gane kolovega lwa vakerubi; vuli ligurudumu liali kolovega lwa vuli mukerubi. Amagurudumu goosi gane gaali ni lifana lilala; galoleka kuli ling'ereng'ana lie ligina liu vuguli.

¹⁰ Amagurudumu goosi gane gafanana; galoleka kuli ligurudumu lingila mu ligurudumu lindi.

¹¹ Lwa vakerubi yava vagenda, vaali vanyara kuzia mu zimbega ziosi zine vugira kwirana inyima. Vosi vagenda harara kuzia mu lovega lwosi lwa venya, vugira kugirung'ana.

¹² Miviri, migongo, amakono harar ani zimbaha zia vakerubi yava ziali nizikunikiywi ni zimoni ku zimbega ziosi.

¹³ Amagurudumu yaga gaali kuli agandaali nindoli mu malola gange gukutanga.

¹⁴ Vuli makerubi yaali ni lifana liu mumoni haali kane. Mumoni mwukutanga mwali mwi giriki, mumoni mwa kaviri mwali mwu mundu, munoni mwakavaga mwali mwi simba na mumoni mwakane mwali indizu.

¹⁵ Yivi viali vilombe vilala viere viandaali nindoli ha mugera gwa Kebari. Lwa viasingira igulu

¹⁶ nokogenda, amagurudumu kandi gagendaa harara navio. Lwa vakerubi vavambula zimbaha ziavio kuburuka, amagurudumu kandi gaazia harara navio.

¹⁷ Lwa vakerubi vasingilaa, amagurudumu nago kandi gasingira; lwa vakerubi vaburuka, amagurudumu gaaburukaa harara navio kigira roho wa vakerubi yaali mugo.

¹⁸ Maku uvukumi vwa Yahova vwatula mu vwingiliru vwi Litembeli ma nivuzia igulu wa vakerubi.

¹⁹ Vakerubi vavambula zimbaha ziavio ma niviburuka kutura ku lirova imbiri wange nivizia muligulu, kandi amagurudumu gaazia harara navo. Vasingira Ivugwi wi kirivwa chi Litembeli, kandi uvukumi vwa Nyasaye wa Isiraeli vwali kuvio.

²⁰ Yivi ni vilombe viveeye mwoyo iviandaali nindoli isi wa Nyasaye wa Isiraeli ha mugera gwa Kebari, kandi ndaamanya ndi vaali vakerubi.

²¹ Vuli mukerubi yaali ni lifana liu mumoni haali kane, zimbaha zine, kandi lifana lia makono gwu mundu isi wa vuli luvaha.

²² Mumoni mwavio mwaloleka kuli mwa vakerubi vandaali nendoli ha mugera gwa Kebari. Vuli mukerubi yagenda kuzia imbiri.