Ezara 9 - KITABU KITAKATIFU

Avayuda Kugaywa Koletana ni zihiiri Zing'eni

¹ Inyima wa yaga goosi gaali ni gaakoleki, aviimiliri va vandu va Isiraeli vaza ku inzi nivavoora ndi, avasaalisi kandi avandu vinyumba ya Levi si vayiyahula aveene kutura ku vandu vi vivala via Kanaani, Hiti, Perizi, Jebusi, Amoni, Moabu, Egebeti kandi Amori mba. Vakora vindu vilala viere viu kuvihiliriza via vandu yavo vaakora.

² Avasaza vaavugura vakana kutura mu zihiiri yizi kuva avakali vayaayi vaavo kandi avakali navana vaavo. Kali avandu va Nyasaye avatakatifu vazugana harara na vandu vi vivala yivi. Avanene vaavo aviimiliri kandi avamihi nivo vaakora uvudamanu vwu kumaliriza.

³ Lwa ndaahulira yaga, ndaatandura zinguvu ziange kandi nimanyula liisu kandi zinderu ziange kandi ninzikala hasi muligenya kandi muvovereri vonene ligali.

⁴ Ndikala ahene yaho mu vovereri kuduuka ing'inga ya mugorova yu kuhaana kisiuviriru. Avandu vosi vaali nuvuti vaza nivangumberiza kigira aga Nyasaye wa Isiraeli yaali navooye kigira uvwoni vwa yavo avaari nivirani kutura mulihaminywa.

⁵ Lwing'inga yaduuka yu kuhaana kisiuviriru cha mugorova, ndaasingira kutura handaali ninzikaye mu vovereri, kandi ndaali ningikiri ni zinguvu ziatanduka. Ndaasigama hasi mu lisaala kandi ning'inga makono gange ku Yahova Nyasaye wange.

⁶ Inzi ndaavoora, “O, Nyasaye, inzi mbeeye ni zisoni kuginga mutwi gwange igulu imbiri woovo. Uvwoni vwitu vumali kuva vunyingi ligali, imbiri woovo.

⁷ Kutura mu madiku ga vaguuga viitu kuduuka lero, kunyi avandu vovo, kwakora uvwoni vonene ligali. Kigira uvwoni vwitu, kunyi harara na vami viitu kandi avasaalisi viitu kumali kuvikwa mu zinguru zia vami vi vivala vigeni. Kumali kwitwa, kunuurwa kandi kuhilwa ihale kuli avahambe. Kumali kuvikwa mu zisoni ligali kali kuduuka na lero.

⁸ O, Yahova Nyasaye wiitu, kalunu ku ing'inga engekeeke, ivi umali kukumanyia liyaanzilira kandi okoli valala kukunyi kohononoka kutura mu vuhambe nokomenya mu mirembe havundu hatakatifu hano. Ivi umali kokovoholora kutura mu vuhambe kandi okoheeye livamwoyo lihia.

⁹ Kunyi kwali avatugwa navuzwa ivi si wakoleka mu vutugwa mba. Wakola mwami wa Pasia nakuyaanza kandi na kuvugilira kuzizagilira komenya kandi nu kwumbaka uvuhia kandi nu kwumbaka uvuhia Litembeli liilio, iliali niliagwa mang'anye. Wahaana kukunyi likingwa kandi nikomenya mu mirembe mu Ivuyuda kandi Jerusalemi.

¹⁰ “O, Nyasaye wiitu, kalunu kunyi kunyala kovora kindiki inyima wayaga? Kunyi kumali kuvunaga malago googo kandi

¹¹ agawahaana kukunyi kuvitira ku vatumikiri vovo, avaporofeti. Vaakovolera ndi kivala chakuziza komenya mucho keveeye kidamanu kigira vandu vamenya mu kivala yiki vayizuliza mu uvudamanu vwosi kandi vindu viukuvihiliriza.

¹² Vaakovolera kuvuli kuhaana vakana viitu ku vayaayi vi zihiiri zindi kuva vakali vaavo, anoho kuvuli kuvugura vakana vaavo kuva vakali va vayaayi viitu. Vaakovolera kuvuli kwenya mirembe jukuvugilizana kutura kuvo, kunangwa kuduuki kuva ni zinguru kandi kuduuki konyoora ivindu vilahi mu kivala yiki; kandi vakovolera kuvuli kuva imiandu ku visukululwi vietu mihiga ni mihiga.

¹³ Kali inyima wi vindu yivi viosi vimali kokoleka ku kunyi mu lihevwa mageri kigira uvwoni vwitu nu vudamanu vwitu koveeye ni limanya ndi, ivi Nyasaye wiitu, umali kuhaana mageri ku kunyi. Navuzwa uvwoni vwitu vwali uvunyingi ligali kuvita mageri ga kumali konyoora. Nitali mulikola yaga goosi, umali kuvugilira kunyi komenya.

¹⁴ Kunyala kuvunaga malago googo kandi nukuhambana mu lileeta vakali na vandu vakora uvudamanu? Niiva kulakola ndio, ivi ulava nu vutima nikunyi kuduuka lwukudiviza. Mundu kali mulala sialatigala anoho kohononoka mba.

¹⁵ O, Yahova Nyasaye wa Isiraeli, ivi oveeye wi likalaga lirungi, kigira umali kuvugilira komenya. Kwiyama uvwoni vwitu ku ivi na sikoveeye nuvulungi kusingira imbiri woovo mba.”