Ezara 8 - KITABU KITAKATIFU

Avandu viirana Kutura mu Vuhambe

¹ Yaga nigo amieta ga vimiliri vizihiiri avaari mu vuhambe mu Babiloni kandi aviranaa na Ezara mu Jerusalemi lwa Aritasakises yaali mwami:

² Gerishomu uwi ihiiri ya Finiasi, Danieli uwi ihiiri ya Izamara, Hatushi wi ihiiri ya Shekania uwi ihiiri ya Daudi.

³ Zakaria, uwi ihiiri ya Paroshi harara navasaza 150 avi ihiiri yeeye.

⁴ Eliehoenai wi ihiiri ya Zerahia uwi ihiiri ya Pahazi Moabu harara navasaza 200.

⁵ Shekania wi ihiiri ya Jahazieli uwi ihiiri ya Zatu harara navasaza 300.

⁶ Ebedi muyaayi wa Jonazani uwi ihiiri ya Adini harara navasaza 50.

⁷ Jeshaya muyaayi wa Azalia uwi ihiiri ya Elamu harara navasaza 70.

⁸ Zebadia muyaayi wa Mikaeli uwi ihiiri ya Shefatia harara navasaza 80.

⁹ Obadia muyaayi wa Jehieli uwi ihiiri ya Joabu harara navasaza 218.

¹⁰ Shelomizi muyaayi cha Josifia uwi ihiiri ya Bani harara navasaza 160.

¹¹ Zakaria muyaayi wa Bebai uwi ihiiri ya Bebai harara navasaza 28.

¹² Johanani muyaayi wa Hakatani uwi ihiiri ya Azigadi harara navasaza 110.

¹³ Elifeleti, Jeyuli, kandi Shemaya wi ihiiri ya Adonikamu harara navasaza sitini.

¹⁴ Uzai kandi Zakuri uwi ihiiri ya Bigivai harara navasaza sabwini.

Ezara Yanyoora Avandu va Levi mu Litembeli

¹⁵ Ndaavungiza muganda gwosi kumugera gwazizaa mu lidaala lia Ahava, kandi kwamenya yo madiku gavaga. Lwa ndahenzeriza mu muganda yigwo, avasaalisi vaali mu navuzwa avandu va Levi si valimu mba.

¹⁶ Ndaatumana aviimiliri tisa: Elieza, Arieli, Shemaya, Elinazani, Jaribu, Elinazani, Nazani, Zakaria, kandi Meshulami kandi avandu avaviri vageri, Joiaribu na Elinazani.

¹⁷ Ndaavatuma ku Ido, mwimiliri mu Kasifa kumuteeva harara navache veve, avasaza vatumikiri vumu Litembeli, vakutumiri avandu vakolere Nyasaye miyinzi mu Litembeli.

¹⁸ Muzimbavasi zia Nyasaye vaatumira Sherebia umundu winyaliza, mundu wa Levi kutura mu ihiiri ya Mahili, kandi avana veve vayaayi 18 navamwavo veve vaza harara naye.

¹⁹ Vaatuma kandi Hashabiahi na Jeshaya avi ihiiri ya Merari, harara naviiko vaavo sirini.

²⁰ Valeta kandi avayinziri vumu Litembeli 220 avu Mwami Daudi yatovola kokonyelera vandu va Levi. Vosi vang'odwa amieta gago.

Ezara Yimilira Avandu mu Lihonga lilia kandi Lisaala

²¹ Maku kumugera gwa Ahava ndahaana lilaga kukunyi vosi kohonga lilia kandi kusaala. Kunyi kwegehiza aveene kandi nikuteeva Nyasaye akwiranyie mu Jerusalemi ni mirembe harara navana viitu ni miandu jiitu josi.

²² Inzi ndakaveeye muzisoni okoteeva mwami akohe muganda gwavasikari vi liihi liuvulwani vakulindi kutura ku avasigu vosi ku ing'inga yologendo lwiitu; inzi ndaali nimuvoleeye ndi Nyasaye wiitu agasizaa vuli mundu usuviraa muye. Navuzwa ahaanaa mageri ku vosi avamwambakanaa.

²³ Kunangwa kwahonga lilia kandi nikoteeva Nyasaye mwene akukingi, kandi yahaana mativuli ku lisaala lietu.

Vihaanwa mu Litembeli

²⁴ Hene yaho ndaatovora Sherebia, Hashabia kandi aviiko vaavo likomi kutura mu aviimiliri va vasaalisi.

²⁵ Maku ndaagera ifeza, izahabu kandi iviju ni videri veve kandi avanene veve, na vandu va Isiraeli vaali ni vahaani vitumiki mu Litembeli. Ndaavugura vindu yivi nimbana ku vasaalisi.

²⁶ Ndahaana kuli ndi: Zitani sirini na mbiri zie ifeza, zikilo 70 zie viju 100 vie ifeza, zikilo 3,400 zie zahabu.

²⁷ Zikilo 8 zie bakuli yi izahabu, viju 2 viu mugasa viang'ereng'ananga kuli izahabu yu vuguli.

²⁸ Ndavavolera, “Munyi muveeye avatakatifu ku Yahova, Nyasaye wa vaguuga vinyu. Viju viosi vie ifeza kandi vie zahabu viamumali koleta ku Yahova kuli kihanwa viveeye vitakatifu.

²⁹ Muvilindi kandi muviiviki vulahi kuduuka lwa muvigera imbiri wa vasaalisi avanene, Avandu va Levi kandi aviimiliri va vandu va Isiraeli mu Jerusalemi mu keng'oze chi Litembeli.”

³⁰ Kunangwa avasaalisi harara na va Levi vaavugura ifeza, izahabu kandi iviju via vaali nivavagereye, nivavihila mu Litembeli lia Nyasaye mu Jerusalemi.

Kwirana mu Jerusalemi

³¹ Ku lidiku lia komi na mbiri liu mweli gwukutanga kwa tula ha mugera gwa Ahava nikuzia Jerusalemi. Nyasaye wiitu yaali harara nikunyi kandi yakohonyia kutura ku vasigu viitu kandi kuyavo avakogoneka kunzira.

³² Lwa kwaduka mu Jerusalemi, kwasosa ku madiku gavaga.

³³ Maku ku lidiku lia kane, kwazia mu Litembeli. Kwagera ifeza, izahabu kandi iviju ma nikuhaana ku Meremozi musaalisi, mwana wa Uria. Yaali harara na Elieza mwana wa Finiasi na vandu va Levi, Jozabadi mwana wa Joshua na Noadia mwana wa Binui.

³⁴ Vaavaliza vuli kindu choosi kandi nivagera. Vaang'oda ligera lia vuli kindu ku ing'inga ndala nzere.

³⁵ Avandu vosi avaari nivirani kutura mu vuhambe valeta vihaanwa viu kusambwa kuli visiuviliru ku Nyasaye wa Isiraeli. Vahaana zigiriki komi na mbiri kigira vandu va Isiraeli vosi, magondi makore tisaini na sita kandi vimeme sabwini na saba. Vahaana zimburi 12 kuva kuli kihanwa chu kwitakasa uvwoni vwavo. Yivi viosi viali vihaanwa viu kusambwa kuli kisiuviriru ku Yahova.

³⁶ Kandi vaavugura malago gu mwami yaali navaheeye, nivagahaana ku vamiihi kandi avanene vi kivala keveeye Imadioli wu mugera gwa Efurate. Maku vamanya kandi nivahaana ovokonyi vwavo ku vandu kandi ku Litembeli.