Ezara 7 - KITABU KITAKATIFU

Ezara Aduukaa mu Jerusalemi

¹ Inyima wi mihiga minyingi, lwa Aritasakises yaali mwami wa Pasia, yaali ho umundu uwalangwa Ezara. Yenyeleriza avaguuga veve kuduuka inyima ku Haruni musaalisi munene kuli ndi: Ezara yaali muyaayi wa Seraya, na Seraya yaali muyaayi wa Hilikia,

² na Hilikia yaali muyaayi wa Shalumu na Shalumu yaali muyaayi wa Zadoku, na Zadoku yaali muyaayi wa Ahitubu,

³ na Ahitubu yaali muyaayi wa Amaria, na Amaria yaali muyaayi wa Azaria, na Azaria yaali muyaayi wa Merayozi,

⁴ na Merazozi yaali muyaayi wa Zerahia na Zerahia yaali muyaayi wa Uzi, na Uzi yaali muyaayi wa Buki,

⁵ na Buki yaali muyaayi wa Abishua, na Abishua yaali muyaayi wa Finiasi, na Finiasi yaali muyaayi cha Elieza, na Elieza yaali muyaayi wa Haruni musaalisi munene.

⁶ Ezara uyu yaza kutura Babiloni. Yaali mwigizi wamanyiriza ligali lilaga lia Yahova, Nyasaye wa Isiraeli yaali nahaani ku Musa. Mwami yamuha choosi chayateva kigira Yahova Nyasaye yaali harara naye.

⁷ Mu muhiga gokolaa saba gwi liamiiha liu mwami Aritasakises, Ezara yazia kutura Babiloni kuduuka Jerusalemi harara numuganda gwa vandu va Isiraeli harara na avasaalisi, vandu va Levi, aviimbi vi zinyimbu mu Litembeli, avalindi vikirivwa, kandi avatumikiri vi Litembeli.

⁸ Ezara yaduuka mu Jerusalemi ku mweli gwa katano gwu muhiga gwa saba gwu mwami.

⁹ Yaatanga logendo kutura Babiloni ku lidiku liu kutanga ku mweli, kandi yaduuka mu Jerusalemi ku lidiku liu kutanga liu mweli gwa katano kigira Nyasaye yamukonya.

¹⁰ Ezara yihaana kosooma nokohenzeriza mu mang'oda gi lilaga lia Yahova, kugaviika mu vikolwa, kandi kwigiza malago galio goosi ku vandu va Isiraeli.

Ibarwa yu Mwami Aritasakises Yahaana ku Ezara

¹¹ Mwami Aritasakises yahaana ibarwa yiyi ku Ezara musaalisi, nu mwigizi, uwaali nilimanyiriza linyingi liamalago aga Yahova yaali niyahaana ku vandu va Isiraeli:

¹² “Kutura ku mwami Aritasakises kuzia ku musaalisi Ezara, mung'odi wililaga lia Nyasaye wu mwigulu.

¹³ “Kalunu ndaaga ndi, umundu woosi ku vandu va Isiraeli oveeye mu kivala change, harara navasaalisi kandi na vandu va Levi, uwenya kuzia Jerusalemi harara na ivi, anyala kuzia.

¹⁴ Inzi harara na aviideli vange saba, mutumaa kutunyiriza iliiva mu Jerusalemi kandi Ivuyuda kunangwa mulole lilaga lia Nyasaye winyu liamwahevwa nililondagwa.

¹⁵ Munyi mulavugula vihaanwa viezahabu kandi ifeza ivia inzi harara naviideli vange kwegomba kuhanira Nyasaye wa avandu va Isiraeli, uwi Litembeli lilie liveeye Jerusalemi.

¹⁶ Munyi mulavugula kandi izahabu kandi ifeza yoosi iyamwavungiza kutura mukivala choosi cha Babiloni kandi nivihaanwa via avandu va Isiraeli navasaalisi vaavo vahaana kigira Litembeli lia Nyasaye wavo mu Jerusalemi.

¹⁷ “Munyi mutumikiraa mabese yaga vulahi ma muguli zigiriki, magondi makore, vimeme via magondi, vuswage niwaini kandi muvihaane ku vwali vwi Litembeli mu Jerusalemi.

¹⁸ Munyi munyala kutumikira izahabu kandi ifeza yaatigara ku goosi agamunyi harara naveche vinyu venya, kolondekana ni lienya lia Nyasaye winyu.

¹⁹ Munyi mulahaana ku Nyasaye mu Jerusalemi iviju viosi viamwahevwa kutumikira muvutumiki vwu mu Litembeli.

²⁰ Kandi kindu choosi ichamweenya kigira Litembeli, munyala konyoora kutura mumavikiru gi inyumba yu vwami.

²¹ “Inzi mwami Aritasakises, ndagaa mavikiru goosi gavanene mu kivala, Imadioli wa Efurate vahane ku Ezara musaalisi kandi mwigizi wililaga lia Nyasaye wu mwigulu, choosi icha ateeva,

²² kuduuka ku zikilo 3,400 zie izahabu, zikilo 10,000 zie ingano, zilita 2,000 ziewaini, zilita 2,000 ziamaguta kandi ijumbi inyingi ligali.

²³ Kuduuka muhaane kindu choosi icha Nyasaye wu mwigulu yenya kigira Litembeli lilie, kunangwa avuli kuva nu vutima ninzi noho na vami vamiiha inyima wange.

²⁴ Munyi simuveeye nuvunyari kosolola vusuuru vwosi kutura ku avasaalisi, avandu va Levi, avimbi vi zinyimbu, avalindi viviliango, avayinziri vumu Litembeli anoho umundu woosi oveeye ahimbi ku Litembeli yili mba.

²⁵ “Ivi Ezara, utumikiri ovogeri vwa Nyasaye yakuha, ma otovole aviimiliri kandi vakalagi kwamiiha vandu vosi vi Imadioli wa Efurate avamenyaa kigira lilaga lia Nyasaye woovo. Ivi kuduuka wigizi lilaga yilio ku umundu woosi utalimanyi mba.

²⁶ Niiva umundu kali mulala si alatia malago ga Nyasaye woovo anoho malago gu mwami, oleke akalagirwi vwangu ku likuza anoho ahaminywi anoho imiandu jije jivugulwi anoho avikwi mu vuhambe.”

Ezara Yizominya Nyasaye

²⁷ Ezara yavoola, “Yahova yizominywi, Nyasaye wa vaguuga viitu! Amali kokora mwami kuvugilira kuhaana luyali ku Litembeli lia Yahova mu Jerusalemi.

²⁸ Kigira zimbavasi zia Nyasaye, inzi mali konyoora uvuyanzi vutaveeye nekeheri kutura ku mwami, aviideli veve kandi avanene veve vosi avizingulu. Yahova Nyasaye wange umali kumba uvuluviliri, kandi inzi mali kuva nuvunyari vwokogoonya aviimiliri vanyingi avizihiiri zia Isiraeli kwirana harara ninzi.”