Ezara 6 - KITABU KITAKATIFU

Lilaga liu mwami Sairasi Linyooleki

¹ Maku Mwami Dariasi yahaana lilago kwenyeleriza hi vitabu vie zing'inga via viikwa munyumba yu vwami mu Babiloni.

² Likaratasi lialingwa lianyoreka ha Ekibatana munyumba yu vwami iyaali mu kivala cha Media. Likaratasi yili liali na mang'oda yaga:

³ “Mu muhiga gwu kutanga gwi liamiiha liu mwami Sairasi, umwami yahaana lilaga ndi Litembeli lia Nyasaye mu Jerusalemi yili lilava zimita 27 kuzia igulu kandi zimita 27 uvuvambalaru.

⁴ Madigi galio galumbakwa nulwalo lulala lie misaala igulu wa vuli vwalo vuvaga vwa magina. Mitungu josi jilatungwa kutura mu livikiru lie inyumba yu vwami.

⁵ Kandi viju viosi vie izahabu kandi ifeza viu mwami Nebukadineza yavugula kutura mu Litembeli lia Jerusalemi naahira mu Litembeli lia Babiloni, viranywa mu vogono vwavio mu Litembeli lia Jerusalemi.”

Mwami Dariasi Yalaga miyinzi ji Litembeli kuzizagilira

⁶ Maku mwami Dariasi yahaana mativuli yaga: “Ku Tatenai, mwamihi wi Imadioli wu mugera gwa Efurate, Shezari Bozenai harara na vache vanene vinyu avaveeye Imadioli wu mugera gwa Efurate mwisundi ihale kutura ku Litembeli;

⁷ kandi mutagoyanyia miyinzi ju kwumbaka Litembeli mba. Muleke mwamihi kandi vimiliri vi Ivuyuda vumbake uvuhia Litembeli lia Nyasaye havundu halialange kale.

⁸ Kulwayago, mbana lilago kolondekana na gamukolera vimiliri vi Ivuyuda kigira liumbaka uvuhia Litembeli lia Nyasaye. Avayinziri yava valanyora mitungu jaavo vugira kulindagilira kutura mu mavikiru gi inyumba yu vwami, amabesa ganyoolekaa kuturana nuvusuru vuturaa Imadioli wu mugera gwa Efurate.

⁹ Vuli lidiku, mulahaana ku avasaalisi mu Jerusalemi viosi viavava nivenya vugira kulindagilira: zigiriki zisoleri, amagondi anoho vimeme viamagondi, ingano, ijumbi, iwaini anoho amaguta ga muzeituni vive kuli vihaanwa viukusambwa ku Nyasaye wi Ligulu kandi musaale angasizi harara navayayi vange.

¹⁰ Yaga gaduuki kokoleka kunangwa vaduuki kuhaana visiuviliru vivugilirwa ku Nyasaye wi Ligulu, kandi vaduuki kusaala Nyasaye ahaane uvugasu ku Inzi harara na vana vange.

¹¹ Mbana kandi lilaga ndi, niiva mundu woosi alavula kutia malago yaga, mwaliru gwu musaala gulatulizwa munyumba yeeye na guvazwe lovega lulala, maku vamutoze nagwo mu muviri gwigwe. Inyumba yeeye ekolwe kitumi cha mavivi.

¹² Kusaala Nyasaye watovola Jerusalemi kuva havundu hu kumusigamira, ayaanze aguuti mwami woosi anoho ihiiri yoosi egerizaa kwonogonyia lilago yili kandi kudiviza Litembeli lia Nyasaye iliveeye mu Jerusalemi. Inzi mwami Dariasi mali kuhaana lilaga yili. Kuduuka lilaga yili liduukizwi.”

Litakasa lie Litembeli

¹³ Maku Tatenai mwamihi, Shezari Bozenai, harara na vache vanene vaavo, vaakora ligali kuli mwami Dariasi yaali naavalagi.

¹⁴ Aviimiliri vi Ivuyuda vazizagilira vulahi ni miyinzi ju vwumbaki vwi Litembeli. Muporofeti Hagai na Zakaria mwana wa Ido vaavadinyiriza. Vaamaliriza kwumbaka uvuhia Litembeli kuli Nyasaye wa Isiraeli kandi Sairasi, Dariasi na Atriasesesi avami va Pasia vaali ni vavalagi.

¹⁵ Vaamaliriza Litembeli yili ku lidiku lia kavaga liu mweli gwa Adari mu muhiga gwa sita gwi liamiiha liu mwami Dariasi.

¹⁶ Maku avandu va Isiraeli, avasaalisi, vandu va Levi kandi avandu vandi vosi avaari nivirani kutura mu vuhambe, vayaanza kandi nivasangalira litakasa lie Litembeli lia Nyasaye.

¹⁷ Mu litakasa lie Litembeli lia Nyasaye yili, vahaana zigiriki 100, amagondi 200, kandi vimeme 400 kuva kuli visiuviliru, kandi vahaana zimburi 12 kuva kuli kihanwa chu vwoni, imburi indala ku vuli ihiiri ya Isiraeli.

¹⁸ Valohiza avasaalisi vi hiiri ya Levi mu vika kigira uvutumiki vwa Nyasaye mu Litembeli lia Jerusalemi. Yaga gakolekaa kolondekana na malago gang'odwa mu kitabu cha Musa.

Lipasaka

¹⁹ Ku lidiku lia 14 liu mweli gwukutanga gwu muhiga gwalondaku, avandu vaali ni virani kutura mu vuhambe vasangalira lilia lie Lipasaka.

²⁰ Avasaalisi vosi kandi vandu va Levi vaali niviitakasi aveene, kandi vaali avanifu. Kunangwa vita ligondi lie Lipasaka kusangalira lirana lia vandu vosi avaari ni vazia mu vuhambe, kandi kigira avasaalisi vache vaavo kandi kigira aveene.

²¹ Avandu va Isiraeli vosi avaari ni virani kutura mu vuhambe, kandi vosi avaari niviyahuli kutura ku vudamanu vwa vandu vamenya mukivala, avaari nivaazi kusigamira Yahova Nyasaye wa Isiraeli, valia ligondi yili.

²² Avandu yava valia nivasangalira lisavo liu mugadi gutaveeye mu na mamera ku madiku saba. Vaali nuvusangali ligali kigira Yahova yaali nagirung'anyi zing'anagani ziu mwami wa Asiria kuva ni liyaanzilira kuvo. Yaavadinyiriza kandi navakonya ku miyinzi jaavo jukumbaka uvuhia Litembeli lia Nyasaye wa Isiraeli.