Ezara 5 - KITABU KITAKATIFU

¹ Ku ing'inga yene yeyo, avaporofeti vaviri, Hagai na Zakaria mwana wa Ido, vatanga koporofeta mu lieta lia Nyasaye wa Isiraeli ku vandu vi Ivuyuda avamenya mu kivala chi Ivuyuda kandi mu Lidaala lia Jerusalemi.

² Lwa Zerubabeli mwana wa Shealitieli na Joshua mwana wa Jehozadaki vahulira makuva ga vaporofeti yava, vatanga kwumbaka uvuhia Litembeli mu Jerusalemi. Avaporofeti vaviri yava vakonyana navo.

³ Ku ing'inga yene yeyo, Tatenai, mwamihi wi kivala chi Imadioli wu mugera gwa Efurate, Shezari Bozenai, harara na vanene vaavo vazia mu Jerusalemi nivavateeva: “Nivwaha wamuha uvunyali kwumbaka uvuhia Litembeli yili kandi kuviikamu iviju?”

⁴ Kandi vateva amita ga vasaza vosi avakonyanaa kwumbaka Litembeli.

⁵ Navuzwa Nyasaye yalinda aviimiliri vi Ivuyuda, kandi avanene va Pasia sivali vanyara kuvagaya mba kuduuka lwa vang'oda ibarwa kuzia ku Dariasi kandi vanyoore amativuli.

⁶ Yiyi ni ibarwa ya Taenai mwamihi, Shezari Bozenai harara na vanene vaavo vang'oda nivatuma ku mwami Dariasi:

⁷ “Ku mwami Dariasi, yaanza wamihi mu mirembe.

⁸ “Ivi mwami wuluyali, kwakayaanzi kukumanyia ndi, kwazia kuduuka mu kivala chi Ivuyuda. Kwanyoora ndi Litembeli lia Nyasaye munene liumbakwa uvuhia na magina manene ligali, kandi zimbaho ziavikwa mu madigi galio. Miyinzi jikolekaa nilimanyiriza kandi jizizagilira vulahi ligali.

⁹ “Maku kwateeva aviimiliri va vandu vakovoolere nivwaha wavaha vunyali kwumbaka uvuhia Litembeli kandi kuviikamu iviju.

¹⁰ Kandi kwavateeva amita gaavo kunangwa kuduuki kokovoolera nivanga vwaha aviimiliri vi miyinzi yiji.

¹¹ “Avandu yava vaativura, ‘Kunyi koveeye avatumikiri va Nyasaye wi ligulu kandi wi lirova, kwumbakaa uvuhia Litembeli iliumwami munene wa Isiraeli yumbaka ku mihiga minyingi javita.

¹² Navuzwa kigira avaguuga viitu vaakora Nyasaye wi ligulu kuva nu vutima, yavakola nivaguutwa nu mwami Nebukadineza wa Babiloni, mwami wa Kalideani. Yadiviza Litembeli kandi navugura vandu naavahira Babiloni mu vuhambe

¹³ maku, mu muhiga gwukutanga gwi liamiiha liu mwami Sairasi wa Babiloni yahaana lilago ndi Litembeli lia Nyasaye liduuki kwumbakwa uvuhia.

¹⁴ Yiranyia viju vie izahabu kandi ifeza viu mwami Nebukadineza yaali niyavugula kutura mu Litembeli mu Jerusalemi, kandi naviviiki mu Litembeli mu Babiloni. Yaavituliza mu Litembeli lia Babiloni ma nahaana ku mundu mulala walangwa Sheshibazari, uwayaali natovoye kuva mwamihi wi Ivuyuda.

¹⁵ Mwami yamuvolera avuguli viju yivi ma aviranyie mu Litembeli mu Jerusalemi, kandi yumbake uvuhia Litembeli havundu ha lialange kale.

¹⁶ Maku Sheshibazari yazia naviika musingi gwi Litembeli mu Jerusalemi. Kutura ing'inga yene yeyo, Litembeli liazizagilira kwumbakwa uvuhia. Kuduuka lero Litembeli likikiri kumalirizwa.’

¹⁷ “Kunangwa kalunu, niiva galayaanziza ivi mwami, ahaane lilago kwenyeleriza mu vitabu viu vwami mu Babiloni kolola niiva mwami Sairasi yahaana lilago liu kwumbaka uvuhia Litembeli mu Jerusalemi. Kunangwa mwami okovolere zing'anagani zizio ku makuva yaga.”