Ezara 4 - KITABU KITAKATIFU

Kwigalira Liumbaka Litembeli Vuhia

¹ Avasigu va vandu vi Ivuyuda na Benjamini vahulira ndi yavo avilanaa kutura mu lihaminywa vumbaka vuhia Litembeli lia Yahova, Nyasaye wa avandu va Isiraeli.

² Kunangwa vazia kolola Zerubabeli navimiliri vizihiiri ma nivavoora, “Leki kusange nimunyi mu liumbaka Litembeli. Kunyi kusigamira Nyasaye mulala mwere wa munyi musigamira, kandi kunyi kuhaana visiuviliru kuye kutura ing'inga ya Esarihadoni mwami wa Asiria yakutuma komenye hano.”

³ Zerubabeli, Joshua, kandi navimiliri vizihiiri vavavolera, “Kunyi sikwenya ovokonyi vwinyu kunangwa kwumbakiri Yahova Nyasaye witu Litembeli mba. Kunyi kulumbaka aveene, kuli Sairasi mwami wa Pasia yakulaga.”

⁴ Maku avandu vamenya mukivala yicho vaageriza kolomba avandu vi Ivuyuda kukuza mwoyo nukutia vavuli kwumbaka.

⁵ Mu ing'inga ya Sairasi yaali mwami wa Pasia kandi kali kuduuka lwa Dariasi yagwa mwami wa Pasia, vazizagilira kuha avanene vu vwamihi viambeti kunangwa vakole miyinzi jivuli kuzizagilira.

Kwigalira kwi liumbaka Vuhia lia Jerusalemi

⁶ Mu litanga liu vwamihi vwu Mwami Zerikisezi, avasigu va vandu vamenya mu Ivuyuda na Jerusalemi vaali namayalo gang'odwa kuvo.

⁷ Mu liamiiha liu mwami Aritasakises wa Pasia, Bishilamu, Miziredazi, Tabeeli, kandi navache vaavo vang'odera mwami ibarwa. Ibarwa yiyi yang'odwa mu lulimi lwa Vaharabu ma nigirung'anywa lwa yasomwa.

⁸ Rehumu munene wi liihi, kandi Shimushai mung'odi wi kivala, yang'odera mwami Aritasakises ibarwa yiyi kigira Jerusalemi:

⁹ “Kutura ku Rehumu, munene wi kivala, kutura ku Shimushai mung'odi wi kivala, kutura ku avache veve, avakalagi, kandi kutura ku avanene vandi vosi, avaveeye avandu vaturaa Ereki, Babiloni kandi Susa mu kivala cha Elamu,

¹⁰ harara navandu vandi ava Ashuribanipali wizingulu kandi wuluyali yakunga kutura mu kivala chavo kandi naavamenyia mu madaala ga Samaria kandi havundu handi mu kivala Imadioli wa Efurate.”

¹¹ Yaga nigo agaveeye mu ibarwa: “Ku mwami Aritasakises kutura ku avatumikiri veve, avandu vi Imadioli wa Efurate.

¹² “Kunyi kwenya mwami amanye ndi avandu vi Ivuyuda avaazaa ku kunyi kutura ku ivi vamali kuzia Jerusalemi kandi vumbaka vuhia lidaala linene liu kwibaala kandi liuvuchamu yilio. Vaveeye ahimbi kumala kwumbaka vuhia madigi kandi kudigulura imisingi.

¹³ Mwami, niiva lidaala linene yili lilumbakwa vuhia kandi madigi galio kumalirizwa, avandu valalekela kutunga uvusuru, kandi uvusuru vuzaa ku ivi vulageha.

¹⁴ Kalunu koveeye hasi hizingulu ziu vwami kandi sivoveeye vulahi kunyi kolole yaga nigekoleka ku mwami mba, kunangwa kutumaa makuva yaga kovoolera mwami,

¹⁵ kunangwa alage lienyeleriza likolwe numang'oda aga avaguuga vovo vaviika. Niiva ulakola ndio, ulanyora ndi lidaala linene yili liali liukwibaala kandi kutura muzing'inga ziakale liadambiza avami kandi navamiihi vi vivala. Avandu valio vaveza vadinyu kwamiiha kazozo. Yiki nicho chagira lidaala linene yili nilidivizwa.

¹⁶ Kunangwa kunyi koveeye nilisuvira ndi niiva lidaala linene yili lilumbakwa vuhia kandi madigi galio kumalirizwa, ivi sinunyalizi kwamiiha kivala chi Imadioli wa Efurate mba.”

¹⁷ Mwami yatuma mativuli yaga: “Mirembe ku ivi Rehumu munene wi liihi, Shimushai, mung'odi wikivala, kandi ku avache veve avamenya mu Samaria kandi Imadioli wa Efurate woosi.

¹⁸ “Ibarwa yawatuma imali kosomwa nukugirung'anywa imbiri wange.

¹⁹ Inzi ndahaana lilago vatunyirizi, kandi gamali konyooleka ndi kutura mu zing'inga ziakale avandu va Jerusalemi vahing'anu nu vwamihi kandi avandu vibaara nivaleeta kivi vaveeye vanyingi.

²⁰ Avami vizingulu vamali kwamiiha yo kandi vamali kwamiiha ku kivala choosi chi Imadioli wa Efurate nivasolola uvusuru.

²¹ Kunangwa ulahaana lilago ndi, avandu yavo valekele kwumbaka lidaala linene vuhia kuduuka lwa inzi mbana malago gandi.

²² Mukore yaga kalunu, kunangwa uvwamihi vuvuli kusalilizwa.”

²³ Nonoho lwa ibarwa kutura ku mwami Aritasakises yasomwa imbiri wa Rehumu, Shimushai, navache, vazia vwangu Jerusalemi nivaniga Avayuda kolekera kwumbaka vuhia lidaala linene.

Litanga lie Miyinzi ku Litembeli

²⁴ Miyinzi ku Litembeli jaali nijimali kolekelizwa kuduuka mu muhiga gwa kaviri gwi liamiiha lia Daria mwami wa Pasia.