Ezara 3 - KITABU KITAKATIFU

Litanga Lisigamira Nyasaye

¹ Ku mweli gwa saba lwa vaali nivakidikira kutura mu lihaminywa vandu va Isiraeli vosi vaali nivamenyi mu madaala gaavo. Maku vosi vavuganira Jerusalemi,

² harara na Joshua mwana wa Jehozadaki, avasaalisi vache, na Zerubabeli mwana wa Sheyalitieli, harara naviiko veve; vumbaka vuhia uvwali vwa Nyasaye wa vandu va Isiraeli, kunangwa vaduuki kusambira ku visiuviliru kuli gang'odwa mulilaga lia Musa umundu wa Nyasaye.

³ Kali niiva avandu viranaa kutura mulihaminywa vaatia avandu vamenya mu kivala yicho, vumbaka vuhia vwali ha vwaalange maziambiri. Maku vatanga kusambiraku kuli kazozo visiuviliru ku Yahova viamugambazuri kandi via mugorova.

⁴ Vasangalira Lisavo lia madiri kolondekana namalago. Vuli lidiku vahaana visiuviliru vienyeka ku lidiku yilio.

⁵ Inyima wa yago vahaana zisadaka zia vuli ing'inga ziukusambwa, nivisiuviliru viukuhaana viu mweli muhia numumavugano gandi goosi via Yahova asigamirwa, kandi na yivio viosi ivialetwa kuli vihaanwa viukwihaana ku Yahova.

⁶ Kali niiva avandu vaali nivakikiri kutanga kwumbaka vuhia Litembeli, vatanga ku lidiku liukutanga liu mweli gwa saba kusamba visiuviliru ku Yahova.

Liumbaka vuhia Litembeli

⁷ Avandu vahaana mabese kutunga avasiza vamagina nizimbaho. Vahaana viukulia, viukunwa namaguta ga muzeituni kuhilwa mu madaala manene ga Tiro na Sidoni kunangwa vahevwe misaala jimidalagwa kutura Lebanoni. Jaziira mu inyanza kuduuka Jopa. Yaga goosi gekoleka kigira mwami Sairasi wa Pasia yavugilira.

⁸ Kunangwa mu mweli gwakaviri ku muhiga gwakaviri inyima wa avandu vaali nivakilana kutura Babiloni, vatanga kwumbaka vuhia Litembeli lia Yahova. Zerubabeli mwana wa Sheyalitieli, Joshua mwana wa Jozadaka, avasaalisi, avandu vihiiri ya Levi, kandi vuli umundu woosi uwaali niyakirana yaatanga kokora miyinzi. Vatovora vandu vinyumba ya Levi avaari ni mihiga 20 kuzia igulu kuva avanene vimiyinzi jukwumbaka vuhia Litembeli.

⁹ Joshua winyumba ya Levi harara navana veve naviiko veve, kandi Kadimieli harara navana veve ihiiri ya Hodavia vasanga mulivugula vwimiliri vwukumbaka vuhia Litembeli. Vakonyelerwa na vandu vinyumba ya Levi avihiiri ya Henadadi.

¹⁰ Lwa avandu vatanga kuviika muse gwi Litembeli, avasaalisi niviviiki zinguvu ziavo vaali muvogono vwavo nikisiriva mumakono gaavo. Avandu vinyumba ya Levi avihiiri ya Asafu vasingira ho nivikuli. Vizominya Yahova kolondekana amalago gavaahevwa kutura ing'inga yu Mwami Daudi wa Isiraeli.

¹¹ Vimbira Yahova nilizominya kandi nilisandiza: “Yahova aveeye mulahi; uvuyanzi vwivwe ku avandu va Isiraeli vuhindiraa mihiga ni mihiga.” Vuli umundu yahanzuka nizinguru zizie ziosi: Vizominya Yahova kigira miyinzi jumusingi gwi Litembeli jaali nijimali kutanga.

¹² Avanyingi ku avasaalisi vakulundu, avandu vinyumba ya Levi, kandi aviimiliri vizihiiri vaali nivalora Litembeli liukutanga. Maku lwavaalora musingi gwi Litembeli yili niguvikwa, vaalira nivasioma. Navuzwa avandi vaaliho vahanzuka nuvuyanzi.

¹³ Siaveeye ho kali mulala waali anyala kumanyiriza liyoga liuvuyanzi nililira mba kigira liyoga liavakola liali linene ligali kandi liahulirika kuduuka ihale ligali.