Ezara 10 - KITABU KITAKATIFU

Lilohiza lio Kolekera Koleta Vakali Kutura mu Zihiiri Zing'eni

¹ Lwa Ezara yaali nasigami mu lisaala imbiri wi Litembeli lia Nyasaye, nalira kandi niyiyamaa uvwoni vwa avandu ku Nyasaye, muganda munene gwa vandu va Isiraeli vasaza, avakali kandi avana vaza nivamukumbiriza kandi nivalira vululu ligali.

² Maku Shekania mwana wa Jehieli wi ihiiri ya Elamu, yavolera Ezara ndi, “Kumali kuvunaga lisuuvira lietu na Nyasaye mu lileeta avakali kutura mu zihiiri zing'eni. Navuzwa mu likora yaga goosi, lisuuvirizwa likikiliho ku vandu va Isiraeli.

³ Kalunu, gakuduukiraa kolombe lilagana na Nyasaye wiitu ndi kulakunga avakali yava vosi harara na vana vaavo. Kulakola aga ivi kandi aga yavo avatia malago ga Nyasaye vakovolera kokole. Kulakola kolondekana ni lilaga lia Nyasaye.

⁴ Singira vudinyu kigira uvunyali voveeye ku ivi. Kunyi koveeye harara nivi na kulakokonya. Ove mugulu na okole miyinzi.”

⁵ Kunangwa Ezara yakola aviimiliri va vasaalisi kandi avandu vinyumba ya Levi harara na vandu vandi vosi va Isiraeli kwisuha ndi valakola aga Shekania yaali navooye.

⁶ Maku Ezara yazia kutura imbiri wi Litembeli lia Nyasaye, niyingira munyumba ya Jehohanani mwana wa Eliashibu. Yaali munyumba yiyi uvudiku vwosi vugira kulia kindu choosi anoho kunwa mazi goosi, kigira yaali naliliraa uvwoni vwa vandu vu muvuhambe.

⁷ Amakuva galandizwa mu Jerusalemi kandi Ivuyuda ndi, avandu vosi aviranaa kutura mu lihaminywa gavadukiraa kuvugana mu Jerusalemi

⁸ kulilaga lia vimiliri va vandu. Niiva mundu si alavula kuduuka ku madiku gavaga, alanyagwa miandu jije josi, kandi aliyahula umwene kutura mu livugana lia vandu vi lihaminywa.

⁹ Ku madiku gavaga, ku lidiku lia 20 liu mweli gwa tisa, avasaza vosi avaari nivamenyi mu kivala chi Ivuyuda kandi Benjamini vaza mu Jerusalemi kandi vavugana mu mugizi imbiri wi Litembeli lia Nyasaye. Vaali ni lidegera kigira makuva yaga kandi kigira imbura inyingi yaali nikubaa.

¹⁰ Ezara musaalisi yasingira navavoolera, “Munyi si muveeye avasuuvirifu mba. Mumali koleta avakali kutura mu zihiiri zing'eni, na mulikola ndio, mumali komeeda mahiolo mu Isiraeli.

¹¹ Maku kalunu, mwiyame uvwoni vwinyu ku Yahova, Nyasaye wa vaguuga vinyu. Mukore kolondekana ni lienya lilie kwiyahuli aveene kutura ku vandu avageni avamenyi mu kivala chienyu, kandi muleke avakali avageni.”

¹² Maku avandu vosi vi livugana vaativura nu mwoyo munene nivavoora, “Kulakola goosi aga umali kovora.

¹³ Navuzwa koveeye muganda gwa vandu avanyingi ligali, kandi imbura eveeye inyingi ligali. Kunyi si kunyala kusingira ichova mu mbula mba. Yigu si goveeye muyinzi gunyala kokoleka ku lidiku lilala anoho madiku gaviri mba, kigira avanyingi mu kunyi kwamala kokora uvwoni.

¹⁴ Koleke avanene viitu vatigale mu Jerusalemi vayinziri ku makuva yaga. Maku koleke vuli mundu woosi aveeye nu mukali mugeni yaaze ku ing'inga etovoleywe, harara na vimiliri kandi avakalagi vi lidaala lilie. Uvutima uvululu vwa Nyasaye wiitu vulatula ku kunyi nikokola makuva yaga.”

¹⁵ Avandu vosi kwavugilira lilohiza yili, nitaveeye Jonazani mwana wa Asaheli na Jahazeya mwana wa Tikiva vaali ni lihing'ana; vadinyirizwa na Meshulami na Shabezai, mundu winyumba ya Levi.

¹⁶ Maku avandu viirana kutura mu lihaminywa vavugilira lilohiza yili, kunangwa Ezara musaalisi yatovola avasaza kutura ku vimiliri vi zihiiri nang'oda amita gaavo. Ku lidiku liukutanga liu mweli gwi likomi, vatanga Kohenzeriza ku makuva yaga.

¹⁷ Ku lidiku liu kutanga liu mweli gwu kutanga, valekera kohenzeriza vasaza vosi avaari nivaleeta vakali avageni.

Avasaza vaali na Vakali Avageni

¹⁸ Yaga na mita ga vasaza vaali na vakali avageni: Avasaalisi: Kutura mu ihiiri ya Joshua mwana wa Zadoku na vamwavo veve vaali: Maaseia, Elieza, Jaribu na Gedalia.

¹⁹ Vosi visuhizana kandi nivalaga ndi valaleka vakali vaavo. Vahaana magondi mamigu kuva kuli kisiuviriru chu vwoni vwavo.

²⁰ Kutura mu ihiiri ya Imeri vaali: Hanani na Zebadia.

²¹ Kutura mu ihiiri ya Harimu vaali: Maaseia, Elija, Shemaya, Jehieli na Uzia.

²² Kutura mu ihiiri ya Pashuri vaali: Elioenai, Maaseia, Ishimaeli, Nazaneli, Jozabadi na Elasa.

²³ Hiiri ya Levi: Kutura mu ihiiri ya va Levi vaali: Jozabadi, Shimei, Kelaya uwalangwa Kelita, Pezahia, Yuda na Elieza.

²⁴ Avimbi vi zinyimbu: Kutura mu ihiiri ya vimbi yaali Eliashibu. Avalindi vi virivwa vie Litembeli: Kutura mu ihiiri ya valindi vi Litembeli vaali: Shalumu, Teleimu na Uri.

²⁵ Avasaza vandi va Isiraeli: Kutura mu visukululwi via Paroshi vaali, Ramia, Izia, Malikija, Mijamini, Elieza, Malikija wundi uwalangwa Hashabia na Benaya.

²⁶ Kutura mu visukululwi via Elamu vaali: Matania, Zakaria, Jehieli, Abidi, Jeremozi na Elija.

²⁷ Kutura mu ihiiri ya Zatu vaali: Elioenai, Eliashibu, Matania, Jeremozi, Zabadi na Azizaa.

²⁸ Kutura mu ihiiri ya Bebai vaali: Jehohanani, Hanania, Zabai na Azilai.

²⁹ Kutura mu ihiiri ya Bani vaali: Meshulami Maluki, Adaya, Jashubu, Sheali na Jeremozi.

³⁰ Kutura mu ihiiri ya Pahazi Moabu vaali: Adina, Kelali, Benaya, Maaseia, Matania, Bezaleli, Binui na Manase.

³¹ Kutura mu ihiiri ya Harimu vaali: Elieza, Ishija, Malikija, Shemaya, Shimeoni,

³² Benjamini, Maluki, na Shemaria.

³³ Kutura mu ihiiri ya Hashumu vaali: Matenia, Matata, Zabadi, Elifeleti, Jeremai, Manase na Shimei.

³⁴ Kutura mu ihiiri ya Bani vaali: Maadai, Amuramu, Ueli,

³⁵ Benaya, Bedeya, Keluhi,

³⁶ Vania, Meremozi, Eliashibu,

³⁷ Matania, Matenai, na Jaasu.

³⁸ Kutura mu ihiiri ya Binui vaali: Shimei,

³⁹ Shelemia, Nazani, Adaya,

⁴⁰ Makinadebai, Shashai, Sharai,

⁴¹ Azareli, Shelemia, Shemaria,

⁴² Shalumu, Amaria na Josefu.

⁴³ Kutura mu ihiiri ya Nebo vaali: Jeyeli, Matizia, Zabadi, Zebina, Jadai, Joeli na Benaya.

⁴⁴ Avandu yava vosi vaali ni valeta vakali avageni. Vaalekana navo kandi nivavakunga harara na vana vaavo.