Ezara 1 - KITABU KITAKATIFU

Mwami Sairasi alaangaa Avayuda kwirana

¹ Mu muhiga gwu kutanga gwa Sairasi yaali mwami wa Pasia, Yahova yaduukiza agayaali navooye kuvitira ku muporofeti Jeremia. Yakola Sairasi kuhaana lilaga yili kandi aviiki mu mang'oda nu kugatuma galandizwi havundu hoosi mu vwami vwivwe:

² “Yili ni lilaga lia Sairasi, mwami wa Pasia. Yahova, Nyasaye wu mwigulu, umali kokora inzi mwamihi wi lirova liosi kandi umali kuhaana ku inzi uvunyali vwu kumwumbakira Litembeli mu Jerusalemi, lidaala liveeye mu Ivuyuda.

³ Kusaala Nyasaye ayaanze ave harara nimunyi vosi avaveeye avandu veve. Gamuduukira muzie Jerusalemi na mwumbake uvuhia Litembeli lia Yahova, Nyasaye wa Isiraeli, ni Nyasaye usigamirawa mu Jerusalemi.

⁴ Niiva vandu vaatigara mu kivala chu vuhambe aleenya vokonyi kwirana, avatende vaavo valavakonya kuvaha ifeza, izahabu, uvutugi kandi mitugu harara nuvwihaani vundi vwosi kuhaana mu Litembeli lia Nyasaye mu Jerusalemi.”

⁵ Maku aviimiliri vi zihiiri zie Ivuyuda kandi Benjamini, avasaalisi na vandu va Levi, kandi vosi ava Roho wa Nyasaye yaayugiza, vetegeka kuzia kwumbaka uvuhia Litembeli lia Yahova mu Jerusalemi.

⁶ Avatende vaavo vavakonya ni viju vie ifeza, izahabu, uvutugi, kandi imitugu harara ni viju vindi viu vuguli ovonene, komeeda ku viosi viavaali nivanyooye maziambiri.

⁷ Mwami Sairasi kandi yiranyia viju vie Litembeli lia Yahova viu mwami Nebukadineza yaali nagingi kutura Jerusalemi navihili kuviviika mu Litembeli lia vanyasaye veve.

⁸ Mwami Sairasi yavugula viju yivi nahaana ku Miziredazi mulindi wi livikiru. Miziredazi yavaliza viju yivi ma nahaana ku Sheshibazari mwamihi wi Ivuyuda.

⁹ Livaliza lie viju yivi viali kuli ndi: Zisahani zie izahabu 30, Zisahani zie ifeza 1,000, Vifuria vie ifeza 29,

¹⁰ Zimbago zie izahabu 30 Zimbago zie ifeza 410, Viju vindi viosi 1,000.

¹¹ Viju viosi vie izahabu kandi ifeza viali 5,469, via sheshebaru yavugula harara na vandu vi lihaminywa kutura Babiloni kuzia Jerusalemi.