Esther 8 - KITABU KITAKATIFU

Avayuda vavolerwa viikingi aveene

¹ Lidiku lilala liere yilio mwami Ahasuero yahaana ku mukali weve Esiteri, miandu josi ja Hamani, umusigu munene wa Vayuda. Esiteri yavolera mwami ndi aveeye umwiko wa Modekai, na kutura ulwene yilwo, Modekai yaavugilirwa kuzia imbiri wu mwami.

² Umwami yavugula imingiri yeeye yo kokedete iyaali ku nu muhuri gwigwe ya yanyaga Hamani ma naha Modekai. Esiteri yatovola Modekai kulinda miandu jaali ja Hamani.

³ Esiteri yamoloma ku mwami kandi, naagwa havirenge vivie nalira. Yagoonya mwami kwigalira uvudamanu vwosi vwa Hamani, mwisukulu wa Agagi, yaali naalohizi kudiviza Avayuda vosi.

⁴ Umwami yamugingira imbimbu yeeye yizahabu yigulu naye yasingira navoora,

⁵ “Niiva galayaanziza ivi, mwami wuluyali, kandi niiva ombendelaa mwoyo, kandi niiva galoleka kuva malungi imbiri woovo, mwaza tuliza lilago kwigalira uvudamanu vwosi vwa Hamani yaali ni yalaga vuvuli kokoleka, amalago gu mwana wa Hamedaza, wi kisukururwi cha Agagi yahaana, kigira lidiviza Avayuda vosi muvivala viosi via yivi wamihaa.

⁶ Inzi nyara kwikuzira ndi niiva ikivi yiki choosi kiiza ku avandu vange, kandi aviiko vange vene viitwi?”

⁷ Mwami Ahasuero yavolera Esiteri na Modekai, Umuyuda, “Inzi mali kwiita Hamani kigira lilohiza lilie lidamanu liu kudiviza Avayuda, kandi mali kuha Esiteri imiandu josi ijaali jije.

⁸ Navuzwa lilaga limali kulandizwa mu lieta liu mwami nu kuduywa ku umuhuri gwu vwami, silinyala kugirung'anywa mba. Nitali, munyala kung'odera Avayuda goosi aga mwenya mu lieta liange nu kuduya ku muhuri gwange.”

⁹ Kunangwa, ku lidiku lia 23 liu mweli gwa kavaga ugulanga Sivani, Modekai yalanga avang'odi vumwami vosi, naavalaga vang'ode ibarwa ku Avayuda, ku vatumikiri, avamihi na avinyumba yu vwami vwi vivala 127 kutura India kuduuka Ezopia. Zibarwa zie Lilago yizio ziang'oderwa vuli kivala mu lulimi lwacho lwene kandi kuli ling'oda liacho liene, kandi ku Vayuda mu lulimi lwavo kandi kuli aveene vang'oda.

¹⁰ Modekai yang'oda amalago yaga mu lieta liu mwami Ahasuero, kandi gaaduywa ku muhuri nimingiri yu mwami. Zibarwa ziatumwa na vatumwa vanina ku zibarasi zindahi kandi zie zimbiru ligali ziatumikaa mu vutumwa vwu mwami, iziavirukizilwa mu lugala lwu vwami lwi zibarasi zie zimbiru.

¹¹ Zibarwa yizi zivaala ndi, mwami umali kuvugilira Avayuda kwagana harara nukwetegeka ukwikinga ku vasigu vaavo. Niiva avandu vi zihiiri zindi muvivala viosi viu mwami Ahasuero yamiha alingilira nu kutindira avasaza Vayuda, avana, anoho avakali vaavo, Avayuda vaveeye nuvunyari kwikinga aveene nu kuvononyia; valavalwaana nukuviita; Kali valavugula imiandu jaavo josi.

¹² Lilaga yili liadukanaa litwekizwi mu vwamihi vwa Pasia ku lidiku liali ni liavikwa halovega liu kwiita nu kudiviza Avayuda vosi, lidiku lia kumi na tatu, lia Adari mweli gwa komi na mbiri.

¹³ Liadukanaa lilandizwi kuli lilago, kandi limanyikane ku vuli mundu mu vuli kivala, kunangwa Avayuda vaduuki kwetegeka kuvaanza kisaalia ku vasigu vaavo lwi lidiku zana yilio liduka.

¹⁴ Umwami yalaga avahiri vi zibarasi ziu vwami vatuli vwangu ligali na vanyagulizi amalandizu yaga vugira kogotiza uvwiyangu. Ililandiza lia vwangu yili lialandizwa kandi mu lidaala linene lia Susa.

¹⁵ Modekai yatura munyumba yu vwami, niyiviichi zinguvu zia bulu nu vulavu, kandi nitaji enene yi zahabu ku mutwi gwigwe, harara ni inguvu yu kwigulu yikatani indahi yu muzambarao. Maku avandu vosi mu lidaala linene lia Susa vasangala ni vayaanza ligali.

¹⁶ Avayuda vaali nu vusangali kandi ovovoholore, uvuyanzi harara nukwihulira ndi vaveeye avaguuti.

¹⁷ Vuli kivala kandi lidaala linene, na hoosi hi lilaga liu mwami liasomwa, Avayuda vaali nu vuyanzi nu vusangali harara ni lilia lie lisosa. Kali avandu vanyingi vaatovora kugwa Avayuda kigira vaatia Avayuda.