Esther 7 - KITABU KITAKATIFU

Liitwa lya Hamani

¹ Kunangwa mwami na Hamani vazia mu lilia linene munyumba ya Esiteri.

² Mulilia lia kaviri yili, lwa vaali nivanweza iwaini, mwami yateeva Esiteri kandi, “Ni ki cha wenyaa ngokolere? Mbolera cha wenya na ulakenyoola, kali niiva ni inusu yu vwami vwange, ulanyora.”

³ Maku Esiteri yativura navoora, “Mwaza, niiva inzi nyooye liyaanzilirwa imbiri woovo, O, mwami, kandi niiva galayaanziza ivi, leka avandu vange harara ninzi kove mwoyo.

⁴ Avandu vange ninzi kumali kugulizwa kuduuki kusinzwa. Kulava ni kwaagulizwa vuzwa kuli avatugwa, ndaali nyara kukiring'ana machiriri na mburi kohendizwa mwoyo, kigira agene yaga, navuzwa koveeye ahimbi kudivizwa nukweywa ligali kutura ku lirova.”

⁵ Maku mwami Ahasuero yateeva Esiteri, “Nivwaha unyala kokora kindu kuli chene yiki? Umundu mwene oyo aveeye hayi?”

⁶ Esiteri yativura, “Musigu wiitu, ukudambizaa, nu mundu mudamanu Hamani uyu!” Hamani yumika mwami harara nu mwami wikikali nu vuti vonene ligali.

⁷ Umwami yasingira vwangu mu vutima vonene, naleka emesa yi lilia, nazia ichova mu mulimi gwinyumba yu vwami. Hamani yalora ndi mwami usaaviyi kumusaliriza kigira amakuva yaga. Kunangwa yaatigara inyima kogoonya Esiteri zimbavasi mbula avuli kwitwa.

⁸ Hamani yaali ni yakagwa haasi imbiri wa Esiteri namuteeva amuveere zimbavasi, lwa umwami yirana kutura mu mulimi gwinyumba yu vwami. Lwumwami yalora yaga, yahanzuka, “Mundu uyu yenya kwonongonyia mukali wange kuzingulu imbiri wange, kandi munyumba yange!” Mwami nakikiri kumala kovora yaga, vatumikiri vu mwami vagumira nonoho nukufuuma mutwi gwa Hamani vwangu.

⁹ Maku mulala ku viziri vatumikira mwami walangwa Haribona yavoola, “Kali ndio, Hamani yetegekiza umwinuya gwu kusunga ku Modekai, uwahonyia umwami kutura mu likuza. Umwinuya yigu goveeye zimita isirini na mbiri, munyumba yeeye.” Umwami yalaga; “Musuungi ku mwinuya gwene yigwo!”

¹⁰ Kunangwa vaasunga Hamani ku mwinuya gwu mwene yaali yalombeye Modekai. Hene yaho, uvutima vwumwami vwahomata.