Esther 6 - KITABU KITAKATIFU

Umwami ahaanaa uluyali ku Modekai

¹ Uvudiku vulala vwere yivwo, umwami siyaali unyala kogona zindoolo mba. Yalaga aleetelwi ivitabu via mang'oda gamanyia ivikolwa viu vwami viu kwizulizwa vie zing'inga ziavita visomerwe imbiri weve.

² Lwa vaali nivasoomaa, vanyoola havundu ha makuva gang'odwa kuli Modekai yaavuula agi viziri viviri Bigizana na Tereshi vaali ni valohizi ukwita umwami machiriri.

³ Umwami yateeva, “Ni liizominywa ki lia Modekai yahevwa kandi ni madanyi ki ga Modekai yanyoora kigira ageene yaga?” Avatumikiri veve vaativura, “Akikiri kokolerwa ku kindu choosi kilala mba.”

⁴ Umwami yateeva, “Vaveeyekuho ku vatumikiri vange mu mugizi?” Ku ing'inga yene yeyo Hamani yingira mu mugizi gwi inyumba yu vwami aduuki komoloma ku mwami kigira kusunga Modekai ku mwinuya ugwali nigolombeywi.

⁵ Kunangwa avatumikiri numwami vaamuvolera, “Hamani aveeye hano, yenya akolole.” Umwami yavoola, “Leki yingiri.”

⁶ Kunangwa Hamani yingira, na umwami yamuvolera, “Haveeye ho nu mundu wa inzi nyanza ligali kuha uluyali lonene. Nyara kokolera ki mundu mwene oyo?” Hamani yaganagana mu mwoyo gwigwe umwene, “Nivwaha wu mwami yakaheeye uluyali lonene kuli yilu kuvita inzi?”

⁷ Hamani yavolera umwami, “Kulwu mundu oyo uwu mwami ayaanza kuha uluyali,

⁸ leka ziganza ziu vwami ziu mwami mwene yiiviikanga zileetwe, kandi leka ibarasi isiahiywi yu mwami eleetwe.

⁹ Maku oleke mulala ku vatumikiri vu mwami aviiki mundu zana ziganza ziu vwami yizi, na amunyinyie ku ibarasi ma amwimiliri kuvitira hagati hi lidaala linene. Leka mutumikiri mwene oyo alandize, ‘Loli kuli mwami ahaanaa madanyi ku umundu wayaanza kuha uluyali lonene!’ ”

¹⁰ Maku mwami yavolera Hamani, “Kola vwangu ligali oleete ziganza ziu vwami harara ni barasi, na uhaane uluyali yilu ku Modekai, Muyuda. Mukolere vindu viosi via ivi umali kovora. Yikaye ha kirivwa chinyumba yu vwami.”

¹¹ Kunangwa Hamani yavugula ziganza ziu vwami kandi ibarasi, ma naviika Modekai zinguvu zana. Modekai yanina kubarasi, na Hamani yamwimilira kuvitira hagati hi lidaala linene, naalandizira avandu lwa vavita, “Loli kuli mwami ahaanaa madanyi ku umundu wayaanza kuha uluyali!”

¹² Kunangwa Modekai yamanya ni yirana ha kirivwa chi inyumba yu vwami, na Hamani yazia yengo vwangu nahenzi hasi mu zisoni zinene novovereri.

¹³ Yavolera mukali weve Zereshi harara na valina veve vosi ivindu viosi iviali nivikoleki kuye. Maku mukali weve harara na valina veve vahaani vi zing'anagani vaamuvolera, “Ivi utangi kogotizira zinguru zizio ku Modekai. Aveeye Muyuda, na ivi siunyala kumuguuta mba. Ivi uladiva ligali imbiri weve.”

¹⁴ Lwa vaali nivakemoloma naye, avatumikiri vu mwami vaza nivavugura Hamani nivamuhila mu lilia linene lia Esiteri yaali niyetegekizi.