Danyeli 8 - KITABU KITAKATIFU

Amalola ga Danieli gi Ligondi kandi Imburi

¹ Mu muhiga gwa kavaga lwa Belishaza yaali mwami, ndaalora malola ga kaviri.

² Mu malola yaga, ndalora ndi ndanyora nimbeeye mu lidaala lia Susa lia kumbelizwa ni lidigi, mu kivala cha Elamu. Ndaali nisingiyi ahimbi nu mugera gwa Ulai.

³ Lwa ndaali nimbeeye ku luginga lwu mugera yigu, ndaalora ligondi iliali ni zinziga ziviri zindambi, navuzwa lwiga lulala lwali lutambi kuvita lundi, kandi lwali lwu kumalirika komera.

⁴ Ndaalora ligondi yili ni liduyaa ni zinziga zialio kolovega lwi madioli, Ivaale kandi Isavaalu. Si yaliho niinyama yaali inyala kuligalira mba, kandi si yaali ho mundu waali unyala kohononoka kutura kuzinguru zialio mba. Liakora kuli lialalira kandi nilifuriana ni kirage.

⁵ Lwa ndaali ningiganagana kigira makuva gi ligondi, nonoho imburi yaali nu lwiga lulala lonene hagati hi zimoni ziayo, yaza kutura Imadioli. Yafuriana ligali, kali virenge viayo si viadiira hasi mba.

⁶ Imburi yiyi yazia wi ligondi lie zinziga ziviri liali niliveeye, iliandali nindoli ni lisingi ku lujinga lwu mugera. Imburi yafuriana nizinguru kandi nu vutima nizia wi ligondi liali.

⁷ Imburi yiyi yazia kulwaana ligondi. Yaali nu vutima ligali, yaduya ligondi kuduuka zinzinga zialio ziviri nizivunika. Ligondi si liali nizinguru ziu kulwaana imburi mba. Imburi yatura ligondi hasi, kandi niliduvagira kumalova. Si yaliho mundu waali unyala kosoola ligondi mba.

⁸ Imburi yaazizagilira kufuriana, navuzwa mu vunyingi vwi kirage chayo, ulwiga lwayo lulala lwavunika. Zinziga zine zinene ziamera mu vogono vwu lwiga lulala lwavunika, na vuli lwiga lwa henza igulu mu lovega lwalwo.

⁹ Lwiga lokekeeke lwamera ku lwiga lulala ku zinziga zine. Lwiga yilu lwaviruka nizinguru nilohenza kolovega lwi Isavaalu, Ivugwi, kandi mu kivala chu vukumi.

¹⁰ Lwiga yilu lwaviruka nizinguru ligali, kulwaana liihi liu mwigulu, kali nizing'ereng'ani; lwa siuva zindala hasi kumalova niluziduvagira ho.

¹¹ Lwononyia munene wi liihi liu mwigulu, lwigalira visiuviliru via vahaana kuye vuli lidiku, kandi nilwikiza luyali lwi Litembeli.

¹² Avandu vakora uvwoni havogono hu kuhaana visiuviliru vilahi via vuli kazozo, Idini ya giligali yonogonywa; lwiga yilu lwazizagilira vulahi mu vindu viosi via lwakola.

¹³ Maku ndaahulira engelosi indala neteeva iyindi, “Vindu vialoleka mu malola yivi vilazizagilira kuduuka ngi'ngaki? Uvwoni vwa vandu vakora vulazizagilira kuvugura vwiyangu vwi visiuviliru kuduuka ng'inga ki? Liihi liu mwigulu kandi Litembeli vilazizagilira kwonogonywa kuduuka ng'inga ki?”

¹⁴ Ndaahulira engelosi yindi nitivulaa, “Vindu yivi vilazizagilira ku madiku 2,300 hamugorova kandi mugambazuri. Ku ng'inga yene yiyi, visiuviliru si vilahaanwa mba. Maku Litembeli lilatakaswa kandi.”

Engelosi Gabirieli Yiivara Amalola

¹⁵ Lwa ndaali ninganagana cha malola yaga gavoora, nonoho mundu yaza nasingira imbiri wange.

¹⁶ Ndaahulira mwoyo gwu mundu kutura ku luginga lwu mugera gwa Ulai nigovoora, “Gabirieli, yiivalira mundu uyu cha malola yaga gavoora.”

¹⁷ Kunangwa Gabirieli yaza nasingira ahimbi na inzi; ndaali nuvuti ligali, kandi ndaagwa hasi. Yambolera, “Mwana wu mundu, gakuduukiraa umanye cha malola yaga gavoora. Gaveeye kigira keheri chi lirova.”

¹⁸ Lwa yaali nakimoloma, zindolo ziambila, kandi ningwa hasi. Navuzwa mundu oyo yang'umira kandi niyasingiliza.

¹⁹ Yambolera, “Ndakuvuulira mativuli gu vutima vwa Nyasaye kuli vulakave. Malola yaga gamanyiaa ing'inga ye keheri.

²⁰ “Ligondi lia walola niliveeye ni zinziga ziviri, limanyiaa vami vaviri va Media na Pasia.

²¹ Imburi imanyiaa, mwami wa Vagureki, nu lwiga lulala lonene hagati hi zimoni lumanyiaa mwami wu Kutanga.

²² Zinziga zine ziamera havogono hu lwiga lulala lwavunika, zimanyaa vwamihi vone vwi ihiiri indala yaza igavulanywemu, navuzwa si navove vwi zinguru kuli vwamihi vwu kutanga mba.

²³ “Lwe keheri chu vwamihi yivu kiliva himbi, kandi lwa navave nivaveeye avachamu ligali kali kuduuka kulinyoola mageri, halakaveho nu mwami mudamanu ligali kandi utaveeye nusuuvirifu.

²⁴ Alakave ni zinguru, navuzwa si zilivaa kigira vunyali vwivwe mba. Alakaleete lidiviza liu kutihiza kandi alakakole mu vindu viosi viakola. Alakadivizi vasaza vi zinguru kandi avandu va Nyasaye.

²⁵ Kigira aveeye mundu mugadi, alazizagilira kokora vulahi mu vugadi vwivwe. Alava ni lielola kandi aladiviza vandu vanyingi vugira lieganihiza. Kali alakachaye mwami munene ku vosi, navuzwa alakadivizwi vugira zinguru ziu mundu.

²⁶ Amalola yaga agaveeye kigira visiuviliru via mugolova kandi mugambazuri aga umali kwivalilwa, galakave gagiligali. Navuzwa ugavisi ligali, kigira ilakave ing'inga indambi nigakiri kuvuulika.”

²⁷ Ndaaluha ligali kandi nindwala ku madiku manyingi. Maku ndasingira ninzirana ku miyinzi ju mwami, navuzwa ndagenya kigira malola yaga; kandi si ndagamanya mba.