Danyeli 7 - KITABU KITAKATIFU

DANIELI YIIVARA MALOLA GEEGE 7:1—12:13 Malola ga Danieli gi ving'ang'a vine

¹ Mu muhiga gwu kutanga lwa Belishaza yaali mwami wa Babiloni, ndaali na maloto kandi malola vudiku ning'onaa mu kidali change. Maku ndang'oda hasi maloto yaga kuli ndi:

² Ndalora malola vudiku, imbuza inene yajukanyia inyanza.

³ Ving'ang'a vinene vine viatula mu inyanza. Vuli king'ang'a chaali lugano kutura ku vindi.

⁴ King'ang'a chu kutanga chaali kuli isimba, navuzwa chaali ni zimbaha kuli indizu. Lwa ndaali ningikiheenza, zimbaha ziifwa. King'ang'a yicho chahinulwa nikisingilizwa vulungi kuli mundu na chahevwa zing'anagani ziu mundu.

⁵ King'ang'a cha kaviri, chaali kuli iduba kisingiyi ku vilenge viacho vie inyima. Chaali ni kigumiyi zimbalu zivaga mu miinu gacho, kandi mwoyo gwavoola, “Zizagilira kulia inyama inyingi kuli ganyalika!”

⁶ Lwa ndaali ningiheenza, king'ang'a kindi chatulira. Chaali kuli engo, navuzwa chaali ni zimbaha zine ku mugongo gwacho, zimbaha yizio ziali kuli zie linyonyi kandi chaali ni mitwi jine. Chaloreka kuva nuvunyari.

⁷ Lwa ndaali ningiheenza, king'ang'a cha kane chatulira. Chaali chi zinguru, kidamanu ligali kandi chukutiihiza. Chaali na miinu gi kivia gachamenenera viachagumira, kandi chavisionolanyia ni vilenge. King'ang'a yiki chaali lugano ku vindi, kigira chaali ni zinziga likomi.

⁸ Lwa ndaali ningiheenza ku zinziga, ndaalora lwiga lundi lukekeeke lumeraa hagati mu zindi. Lwatandulanyia zinziga zivaga ziali nizimali komera. Lwiga yilu lwali ni zimoni kuli ziu mundu na munwa gwamolomaa nu vwelori.

Malola gu mundu Wamenyia Mihiga ni Mihiga

⁹ Lwa ndaali ningiheenza, zindeve ziu vwami ziavikwa hene yaho. Mundu waali namenyi mihiga ni mihiga yikala ku endeve indala. Zinguvu zizie ziali zindavu kuli likonza, kandi liisu lilie liali kuli ipamba indahi. Endeve yeeye yu vukumi yavofwa ku vilenge viu muliru, endeve yiyi yaduuka lomemo lwu muliru,

¹⁰ mugera gwu muliru gwasundukaa kutura muyo. Vaali ho vandu zielefu zinyingi vamutumikira kandi vandi zimilioni vasingira imbiri weve. Kiyaalo chatanga miyinzi, kandi vitabu viakunulwa.

¹¹ Lwa ndaali ningiheenza, ndahulira lwiga lokekeeke ni lwidayaa kandi nukwigingira. Lwa ndaali ningiheenza, king'ang'a cha kane chiitwa, kandi muviri gwacho gwasiuvwa mu lomemo lwu muliru ni gudivizwa.

¹² Zinguru zie ving'ang'a vindi ziatulizwaho, navuzwa vihevwa vwiyangu vwo komenya ing'inga engekeeke.

¹³ Lwa ndaali nindoraa malola yaga vudiku, ndalora kindu ichaali kuli mundu. Mundu oyo yaali niyazaa kuinzi, malesi gaali nigamukumbelizi, kandi yazia ku mundu waali namenyi mihiga ni mihiga. Yahilwa imbiri weve.

¹⁴ Yahevwa zinguru, luyali kandi vukumi vwo luyali, kunangwa vandu vi vivala viosi, zihiiri ziosi, kandi zinimi ziosi vamutumikiri. Zinguru zizie zilava ho mihiga ni mihiga, kandi vwamihi vwivwe si vulahera mba.

Livaala lia malola

¹⁵ Malola ga ndalora gangenyia ligali, kandi ndaanyangizwa ligali.

¹⁶ Ndazia ku mundu mulala waali nasingiyi hene yaho, ndamuteva yanzivaliri malola yaga. Kunangwa yambolera cha malola yaga gavoora.

¹⁷ Yavoola, “Ving'ang'a vinene vine yivi viveeye vwamihi vonene vone vulakaze mu kivala.

¹⁸ Avandu va Nyasaye Wuvunyali valanyora zinguru ziu vukumi, kandi valava nazio mihiga ni mihiga.”

¹⁹ Maku ndeenya kumanya makuva kigira king'ang'a cha kane, chaali lugano kutura ku ving'ang'a vindi, king'ang'a chukutiihiza, chamenena via chagumila na masanda gu mugasa na miinu gi kivia kandi nikivisionoranyia.

²⁰ Ndeenya kandi kumanya kigira zinziga likomi ku mutwi nu lwiga lwamera lwinyima nu kutuura zinziga zindi zivaga. Lwali ni zimoni kandi munwa gwu kwidaya no kwevoora. Chaali king'ang'a chu kutihiza kuvita ving'ang'a vindi.

²¹ Lwa ndaali ningiheenza, lwiga yilwo lwaloomba liihi na vandu va Nyasaye kandi lwavaguuta.

²² Maku mundu waali namenyi mihiga ni mihiga yaza nahaana likalaga ku lwiga yilu mu liyanzilira lia vandu va Nyasaye wu mwigulu. Ing'inga yaali niduki ku vandu va Nyasaye kunyoola zinguru ziu vukumi.

²³ Yili nilio livaala lia ndaheevwa: “King'ang'a chakane kiveeye vwamihi vwakane vuliva mu kivala na vulava lugano kutura ku vwamihi vundi. Vuladuyanya kivala choosi na kukiduvaga kandi nu kuchatanyia mu vidonye.

²⁴ Zinziga likomi na vami likomi valiamiiha mu vwamihi yivu. Maku mwami wundi alakaze; alakave lugano kutura ku vami vo kutanga kandi alakaguuti avami vavaga.

²⁵ Alakachaye Nyasaye wu mwigulu kandi kudambiza vandu veve. Alakagelizi kugirung'anyia malago gi dini kandi masavo. Alakimiliri vandu va Nyasaye ku mihiga givaga ni nusu.

²⁶ Maku kiyaalo chu mwigulu kilakakalage, nu kutulizaho zinguru zizie nu kumudiviza ligali.

²⁷ Zinguru no vonene vwu vwamihi ku lirova vulakahevwe ku vandu va Nyasaye Wuvunyali. Zinguru ziavo ziu vukumi si zilakahere mba kandi vamiihi vosi vi kivala valakavatumikiri nu kuvatia.”

²⁸ Yiki nicho keheri cha makuva ga ndang'oda. Ndaali nu vuti vonene, kali ligondo liange liagirung'ana, kandi ndaviika makuva yaga mu mwoyo gwange.