Danyeli 6 - KITABU KITAKATIFU

Danieli mu luhangaywa lwi zisimba

¹ Mwami Dariasi yasavira kutovola vamiihi 120 kulinda vwami mu kivala choosi cha yamiha.

² Komeeda ku yaga, yatovola Danieli na vandi vaviri kusingilira vamiihi ni lienya liu mwami.

³ Nonoho Danieli yamanyia ndi yaali unyala kokora miyinzi vulahi kuvita vasingiliri vandi anoho vamiihi vandi: Kigira Danieli yaali ni lihulira lia vwangu, mwami yaganagana ku muviika alindi vwamihi vwivwe vwosi.

⁴ Maku vasingiliri vandi na vamiihi vaageriza kwenyeleriza vudamanu mu liamiiha lia Danieli lwa yamiha kivala, navuzwa si vanyoola kindu mba, kigira yaali musuuvirifu kandi si yakola kindu kidamanu kandi kitaveeye chu vulungi mba.

⁵ Vavolerana vene ku vene ndi, “Si kunyala konyora kwenyeleriza kivuni kindi cha kunyala kuyalila ku Danieli mba nikitaveeye kolondekana ni idini yeeye.”

⁶ Kunangwa vazia kolola mwami ni vavoola, “Mwami Dariasi, uhindiri mihiga ni mihiga!

⁷ Kunyi vosi avamihaa kivala, vasingiliri, vamiihi, na vamiihi avatumwa kandi vanene vandi vavugirizani ndi mwami ahaane lilago kandi alidinyilizi ligali: Ahaane malago ndi ku madiku 30 mundu avuli kuteva ku kindu kutura ku nyasaye woosi, anoho kutura ku mundu wundi nitali ivi mwami. Mundu woosi uvula kolonda lilago yili, asiuvwi mu luhangaywa lwizura zisimba.

⁸ O, mwami haana lilago kandi uviiki ku mukono, kandi live liezingulu, lilago lia vandu va Medi na vandu va Pasia, litanyala kugilunganywa.”

⁹ Kunangwa mwami Dariasi yavika ku lilago yili mukono.

¹⁰ Lwa Danieli yahulira ndi mwami umali kuviika mukono ku lilago yili, yazia yengo. Munyumba yeeye yaali mu ne keng'oze chaali higulu na chaali ni lidirisia liahenza Jerusalemi. Hene yaho kuli yakola kazozo, yasigama hasi ha yaali yiguyi lidirisia nasaara ku Nyasaye haali kavaga ku lidiku.

¹¹ Lwa vasigu va Danieli vamulora nasaara ku Nyasaye,

¹² vosi vazia ku mwami nivamuyaala. Vavoola, “Mwami, ivi umali kuviika mukono ku lilago ndi ku madiku 30 gaaza, mundu woosi niyenya kuteva kindu kutura ku nyasaye anoho kutura ku mundu wundi nataveeye ivi, alasiuvwa mu luhangaywa lwizuyi zisimba.” Mwami yativura navoora, “Yee yili ni lilago lidinyu lia vandu va Medi na vandu va Pasia livula kugirung'anywa mba.”

¹³ Maku vavoolera mwami, “Danieli mulala ku vahambe vatura Ivuyuda, siatizaa mwami anoho kuhulira malago ga uhaani mba. Asaalaa kazozo haali kavaga vuli lidiku.”

¹⁴ Lwu mwami yahulira yaga, yavelera ligali kandi yageliza kuli anyala konyoora inzira yanyala kohonyera mu Danieli. Mwami yaazizagilira kogeriza kohonyia Danieli muvasu gwosi.

¹⁵ Maku avasigu va Danieli viirana ku mwami nivamuvoolera, “Mwami umanyi ndi kolondekana na malago ga vandu va Medi na vandu va Pasia, sihaveeye ho ni lilago liu mwami ahaani linyala kugirung'anywa mba.”

¹⁶ Kunangwa mwami yahaana malago gu kugumira Danieli kandi nukusiuvwa mu luhangaywa lwizura zisimba. Mwami yavolera Danieli, “Nyasaye woovo wa usaala mu giligali ayaanze akosole.”

¹⁷ Ligina lialetwa ni livikwa ku munwa gwu luhangaywa, kandi mwami yavika ku ligina muhuri gwu luyali kandi vosi vamenya munyumba yu vwami vakora ndio; kunangwa havuli kuva nu mundu unyala kosola Danieli.

¹⁸ Maku mwami yirana munyumba yeeye yu vwami, navuzwa si yagona vudiku vwosi anoho, si yaalia kandi si haali ho ni vindu viu kumuyanziza mba.

¹⁹ Mwami yavuka mu mavwevwe na adidikana, ma nazia ha luhangaywa.

²⁰ Lwa yaduuka ho, yalanga nu vuti, “Danieli, muyinziri wa Nyasaye oveeye mwoyo! Nyasaye woovo wa usaala mu giligali aveeye nu vunyali kokosola kutura mu zisimba?”

²¹ Danieli yativura navoora, “O, mwami uhindiri mihiga ni mihiga.

²² O, Mwami Nyasaye utumi engelosi yeeye kukunika minwa ji zisimba kunangwa zivuli kuusaliliza. Nyasaye okoli yaga kigira amanyi ndi inzi mbeeye vugira imbara kandi kigira si ndakokolera vudamanu vwosi mba.”

²³ Mwami yaali nu vusangali vonene ligali, kandi nahaana malago go kovora Danieli atulizwi mu luhangaywa. Kunangwa vatuliza Danieli mu luhangaywa kandi valora ndi si yasalirizwa ni zisimba mba, kigira yasuuvira Nyasaye weve.

²⁴ Maku mwami yahaana malago vandu vosi vayaala Danieli vagumirwi kandi vasiuvwi harara na vakali vaavo na vana vaavo mu luhangaywa lwizura zisimba. Lwa vaali ni vakikiri kotonya mu luhangaywa, zisimba ziavamamira kandi nizivunanyia vigumba viavo viosi.

²⁵ Maku mwami Dariasi yang'odera vivala viosi, zihiiri ziosi ni zinimi ziosi navoora, “Mirembe!

²⁶ Mbana malago ndi mu vwamihi vwange vwosi vuli mundu gamuduukira atie kandi ahaane luyali ku Nyasaye wa Danieli. Aveeye Nyasaye oveeye mwoyo, kandi alamiiha mihiga ni mihiga. Vwamihi vwivwe si vuladivizwa mba, kandi zinguru zizie si zilahera mba.

²⁷ Ahonyia kandi asolaa; akolaa go kogenya, kandi vilolekizu mwigulu nu ku lirova yahonyia Danieli kuvula kwitwa ni zisimba.”

²⁸ Danieli yaali nu vukumi vwu kuzizagilira mu vwamihi vwa Dariasi nu vwamihi vwa Sairasi wi kivala cha Pasia.