Danyeli 5 - KITABU KITAKATIFU

Amakuva gang'odwa ku lidigi

¹ Vudiku vulala mwami Belishaza yagenihiza vandu vanene 1,000 kutura munyumba yu vwami mu lilia linene, na vanwa iwaini harara.

² Lwa vaali nivanweza iwaini, mwami Belishaza yahaana lilago valeete vikombe kandi zibakuli zia lombwa kuzahabu ni feza via baba weve Nebukadineza yaginga kutura mu Litembeli ha Jerusalemi. Mwami Belishaza yatumana vizi kunangwa vandu vu munyumba yu vwami, vakali veve kandi vakali veve vayavika vaduuki kuvitumikira mulinwa iwaini.

³ Maku yaleeta vindu vialombwa kuzahabu ni feza viali viavugulwa kutura mu Litembeli. Mwami na vanene veve, vakali veve kandi vakali veve vayavika vatumikiri kunwa iwaini.

⁴ Vizominya avanyasaye valombwa ku izahabu, ifeza, magina gu mugasa, vivia, misaala kandi magina.

⁵ Nonoho mukono gwu mundu gwa loleka kandi ni gutanga kong'oda kulidigi munyumba yu vwami halovega hu vulavu vwi taya vwaka vunyingi. Mwami yalora mukono lwa gwang'odaa.

⁶ Maku ligodo lilie lia girung'ana, kandi zing'anagani zizie ziagota, vivero vivie viadegera kandi amalu geege gakubagana.

⁷ Mwami yalanga mundu amuletele avakumu, avalogi kandi avageri vi zing'ereng'ani. Lwa viingira mugati, mwami yavavolera, “Mundu woosi unyala kosoma mang'oda yaga kandi umbolera cha gavoora alaviikwa iganza yi rangi yu musambarao kandi munyororo gwi zahabu guviikwi mwigoti mwimwe, kandi alava wakavaga mu vwamihi.”

⁸ Maku vahaani vi zing'anagani vosi vu mwami vaza; navuzwa si yaali ho kali mulala waali unyala kosoma mang'oda anoho kumuvolera livaala liago mba.

⁹ Maku mwami Belishaza yaali niligenya linene, ligodo lilie liagirung'ana, kandi avandu vi inyumba yu vwamihi si vaali ni chavanyala kokora mba.

¹⁰ Lwu mukali wu mwami yahulira liyoga yingira mu keng'oze chi lilia ma navoora, “O, mwami omenye mihiga ni mihiga! Nuyanza utanyang'ana mba, kandi utaleka ligondo liilio ligilungane mba.

¹¹ Aveeye ho nu mundu mu vwamihi vuvwo oveeye na roho gwa vanyasaye. Lwa baba woovo yaali mwami, mundu uyu ya muha ovogeri, limanya kandi vogeri kuli vwa Nyasaye. Mwami Nebukadineza yamukola kuva munene wa valoli, avakumu, avalogi kandi avageri vi zing'ereng'ani.

¹² Kigira Roho mulahi ligali, limanya kandi livaala lia maloto, livoora lie zing'ano, harara ni lilohiza makuva gaveeye madinyu ligali lianyoreka mu Danieli wu mwami yagulika Belishaza, kalunu oleke Danieli alangwe na alakovolera livaala lia mang'oda yaga.”

Danieli yiivara mang'oda

¹³ Nonoho Danieli yaletwa imbiri wu mwami. Mwami yamuvolera “Ivi oveeye Danieli, mulala kuvahambe vi Vuyuda ava baba wange mwami yaatuliza mu kivala chi Ivuyuda?

¹⁴ Mali kuhulira ndi roho gwa vanyasaye mutakatifu goveeye mu ivi kandi vulavu, lihulira harara no vogeri vulahi voveeye mu Ivi.

¹⁵ Avahaani vi zing'anagani kandi avakumu valetwa vasome mang'oda kandi vambolere livoora liago, navuzwa si vanyola mba.

¹⁶ Kalunu mali kuhulira ndi ivi unyala kuhaana livaala liago kandi unyala kuvuula makuva gu muvwivisu no gokogenyia. Niiva unyala kosoma mang'oda yaga kandi uhaane livaala liago valakuviika inguvu yi rangi yu musambarao kandi vakuviiki munyororo gwi zahabu mu ligoti liilio kandi ulava mwami wa kavaga mu vwamihi.”

¹⁷ Maku Danieli yativura imbiri wu mwami navoora, “Omwami wange, nuyanza yiviikiri vihaanwa vivio, anoho uhaane madanyi yaga ku mundu wundi, navuzwa inzi ndasoma mang'oda kandi mbane livaala liago.

¹⁸ “O, Mwami, Nyasaye Wuvunyali yakola Nebukadineza baba woovo mwami munene naamuha vukumi.

¹⁹ Yaali munene ligali kali avandu vu muvivala viosi, zihiiri ziosi, kandi zinimi ziosi va mutia kandi vadegera imbiri weve. Yaali anyala kwita mundu woosi, kandi yaali anyala koleka mundu ave mwoyo. Yahaana luyali anoho yaali anyala kusura mundu woosi.

²⁰ Navuzwa kigira yaali ni liegingira, kilage kandi nava mululu, yatulizwa ku vwami kandi naagotiza luyali lwilwe.

²¹ Yakungwa kutura hagati ha vandu, kandi zing'anagani zizie zia kolwa kuva kuli zie zinyama. Yamenya harara ni zibunda, yaya kuli eng'ombe kandi ya gona mu vukindu vugira chu kumukinga kutura ku lime. Mu limalirika yavugilira ndi Nyasaye Wuvunyali aveeye nu vunyali ku vwamihi vwu mwami woosi kandi anyala kuvuhaana ku mundu woosi watovoye.

²² “Navuzwa ivi muyaayi weve Belishaza, si oveeye ni liegehiza mba, kali niiva wamanya yaga.

²³ Oveeye ni liegingira ku Yahova wu mwigulu, kandi wavugula viju kutura munyumba ya Nyasaye wavileeta imbiri woovo. Wavihaana ku vandu vu munyumba yu vwamihi, avakali vovo kandi vakali vovo vaviika vanweramu iwaini. Wizominya avanyasaye valombwa kutura ku ifeza, izahabu, magina gu mugasa, vivia, misaala kandi magina; vanyasaye vatalolaa anoho kuhulira anoho vatamanyi, navuzwa si wahaana luyali ku Nyasaye oveeye ni litovola ku limenya anoho likuza mba; kandi oveeye nu vunyali ku vindu viosi via okolaa.

²⁴ Yiki nicho kigira Nyasaye atumi mukono gwigwe kong'oda makuva yaga.

²⁵ “Yaga nigo gang'odwa: MENE, MENE, TEKELI kandi PARISINI:

²⁶ Yili nilio livaala lia makuva yaga. MENE, Nyasaye umali kuvaliza madiku gu vwamihi vuvwo nu kuvuduukiza ku keheri chavwo.

²⁷ TEKELI livoora, Ligera, umali kogerwa ku kegero, umali konyooleka kuva mwangu ligali.

²⁸ PERISI livoora ligavula: vwamihi vuvwo vumali kugavulanywa kandi vumali kuhanwa ku vandu va Medisina vandu va Pasia.”

²⁹ Nonoho mwami Belishaza yahaana lilago ku vatumikiri veve vaviiki Danieli inguvu yu vwami yi rangi yu musambarao, kandi nivamwavala mu ligoti lilie munyororo gwa lombwa ku izahabu. Yamukola kuva munene wa kavaga mu vwamihi.

³⁰ Vudiku vwene yivwo, mwami Belishaza wa Babiloni yitwa.

³¹ Dariasi kutura mu kivala cha Medi, waali naveeye ni mihiga 62 ya vugula vwami.