Danyeli 4 - KITABU KITAKATIFU

Amalooto ga kaviri gu mwami Nebukadineza

¹ Mwami Nebukadineza yatuma makuva yaga ku vandu vosi vi zihiiri ziosi kandi zinimi ziosi mu kivala. Yavoola, “Mirembe jimeedeke ku munyi!

² Hulirizi ku vindu viu kogenyia kandi vilolekizu via Nyasaye munene amali kumanyia.

³ “Gaveeye go kogenyia Nyasaye kukumanyia! Vilolekizu! Vilolekizu viakolaa viveeye vie zinguru ligali! Nyasaye aveeye mwami mihiga ni mihiga; alakamiihi zing'inga ziosi.

⁴ “Inzi ndaali nemenyi mulieremeliza hango hange hu vwamihi, ni sangaliraa vutugi vwange vonene.

⁵ Navuzwa ndaali na maloto gu kutihiza kandi ndaalora malola gu kutihiza ligali lwa ndaali ning'onaa.

⁶ Ndaalanga vahaani vi zing'anagani vosi vu vwamihi mu Babiloni valetwe imbiri wange kunangwa vaduuki kombolera cha maloto yaga gavoora.

⁷ Maku vasigitiri, valaguli, valogi harara na vageri vi zing'ereng'ani vosi valetwa kandi nimbavolera maloto gene yago, navuzwa si vaali vanyara kunzivaalira mba.

⁸ Mu limalirika, Danieli walangwa Baliteshaza wagulikwa lieta liu, munyasaye wange yaza imbiri wange. Roho gwa vanyasaye vatakatifu gwaali muye. Kunangwa ndamuvolera maloto gange.

⁹ Beliteshaza mwami wavasigitiri vosi, ndamanya ndi roho gwa vayasaye mutakatifu goveeye mu ivi kandi oveeye ni limanyiriza lie vilolekizu viosi. Yaga na maloto gange; mbolera cha gavoora.

¹⁰ “Lwa ndali ning'onaa ndalora malola gu musaala munene ligali hagati hi kivala.

¹¹ Musaala yigu gwaviluka ligali ni gugwa munene kuduuka zindogozi ziagwo ziduuka mwigulu, na vuli mundu woosi mu kivala yagolola.

¹² Matu gagwo gaali malahi na makuyu gagwo gaali manyingi muno kandi gaali chukulia ku vandu vosi, zinyama ziu muvurimu zia sosera muchiriri cha gwo, manyonyi gumbakaa zinyumba zia go muzinzago ziagwo kandi kindu choosi kiveeye mwoyo chaalia ku makuyu gagwo.

¹³ “Lwa ndaali ninganagana kigira malola yaga, ndaalora engelosi indakatifu yikaa kutura mwigulu.

¹⁴ Nevoola nu mwoyo munene, tema musaala yigu gugwi hasi kandi uhaluri iziisia na matu gagwo kandi usalanyie makuyu gagwo. Ukungi zinyama ziosi kutura isi wa gwo kandi manyonyi kutura ku zisia ziagwo.

¹⁵ Navuzwa oleke kitinya harara ni milii ja gwo mu malova. Ovohe ku mugoye gwi kivia kandi gwu mugasa. Ogoleke mu mulimi harara nu vunyasi. “ ‘Kalunu oleke lime ligwi ku mundu uyu kandi umuleke amenye ni zinyama kandi ni misaala.

¹⁶ Ku mihiga 7 sialava ni zing'anagani ziu mundu mba, navuzwa zing'anagani zie zinyama.

¹⁷ Yili ni likalaga lie zingelosi vetegeku kandi valindi. Maku oleke vandu vosi havundu hoosi vamanye ndi Nyasaye Wuvunyali aveeye ni zinguru ku vwamihi vwa vandu kandi anyala kuvuhaana ku mundu woosi watovoye kali ku oyo oveeye mukekeeke ku vosi.’ ”

¹⁸ Mwami Nebukadineza yavoola, “Yaga nigo maloto ga ndalora. Kalunu Beliteshaza mbolera cha maloto yaga gavoora avulaho kali mulala ku vageri vuluyali vange waali unyala kombolera mba, navuzwa yivi unyala kombolera kigira Roho gwa vayasaye vatakatifu vaveeye mu ivi.”

Danieli Yiivara Maloto

¹⁹ Maku Danieli, walangwa Beliteshaza yaali niligenya kandi siyavoola kindu mba. Mwami yavoola “Beliteshaza utaleka maloto ni livaala lia go gakogenyie mba.” Beliteshaza yamutivulira, “Mwami wange vwakaveeye vulahi maloto yaga ni livaala liago gave ku vasigu vovo vakudunyira.

²⁰ Musaala gwa walola, gwaviruka kandi niguva ni zinguru, endongozi ya gwo nidiira mu ligulu, kandi niguloleka mu lirova liosi;

²¹ Amatu gagwo gaali malahi ligali, kandi makuyu gagwo gaali manyingi, kandi guva chukulia ku vandu vosi mu kivala. Manyonyi galombaa zinyumba zia go muzisia ziagwo, kandi zinyama ziasosa mu chiriri cha gwo.

²² “O, mwami, ivi oveeye musaala yigu goveeye mutambi kandi gwi zinguru. Waviluka ligali kali waduuka mwigulu kandi zinguru zizio ziamedeka kuduuka mu kivala choosi.

²³ Lwa ivi O, mwami, waheenza engelosi yika kutura mwigulu kandi nevoola, ‘Uteme musaala yigu gugwi hasi kandi ugudivizi, navuzwa oleke kitinya chagwo mu malova. Okevohe nu mugoye gwi kivia kandi gwu mugasa kandi ogoleke mu mulimi harara nu vunyasi. Oleke lime ligwi ku mundu uyu kandi omuleke amenye harara ni zinyama ku mihiga 7.’

²⁴ “O, mwami, yili nilio livaala lia maloto yaga kandi yaga nigo ga Nyasaye Wuvunyali amali kulaga gekoleke kuivi.

²⁵ Ulakungwa kutura mu vandu na uzie komenya ni zinyama. Ku mihiga 7 ulayaa vunyasi kuli igiriki yu kulima. Ulagona mu kiguti ni lime lilagwa kuivi. Maku ulavugilira ndi Nyasaye Wuvunyali alindaa vwamihi kandi anyala ku vuhaana ku mundu woosi watovoye.

²⁶ Kandi kuli yalaga engelosi ndi kitinya kitigale mu malova, yaga gavoora ndi ulava mwami kandi lwa wiyama ndi Nyasaye niye wamihaa kivala choosi.

²⁷ Kunangwa O, Mwami, olonde miigizu gange oleke kokora uvwoni, okole gaveeye malungi kandi ove nizimbavasi ku vadaka. Maku ulazizagilira kuva mu vutugi vunyingi.”

²⁸ Yaga goosi gekoleka ku mwami Nebukadineza.

²⁹ Inyima wi mieli 12, lwa yaali nagenda kwigulu kwi nyumba yu vwami mu Babiloni,

³⁰ yavoola, “Henza kuli Babiloni eveeye enene! Ndajumbaka kuli lidaala linene kumanyia zinguru nu vunyali vwange, kandi vukumi harara nu vwami vwange.”

³¹ Lwa yaali nakikiri kumala komoloma mwoyo gwamoloma kutura mwigulu ni govoora, “Mwami Nebukadineza, huliriza gambolaa! Uvwamihi vwuvwo vumali kuvugulwa kutura kuivi.

³² Ulakungwa kutura mu vandu kandi ulazia komenya harara ni zinyama ziu mumilimi, kandi ulalia vunyasi ku mihiga 7 kuli igiriki yu kulima. Maku ulamanya ndi Nyasaye Wuvunyali aveeye ni zinguru ku vwamihi vwu mundu kandi anyala ku vuhaana ku mundu woosi watovoye.”

³³ Makuva yaga gaamanya ni gaava giligali. Mwami Nebukadineza ya kungwa mu vandu kandi yaya vunyasi kuli igiriki yu kulima. Lime liaguluka kuye, kandi liisu lilie liaviruka ligwa litambi kuli mavaha gi indizu, kandi masanda geege gatambiha kuli ga manyonyi.

Nebukadineza Yizominya Nyasaye

³⁴ Mwami yavoola, “Lwi mihiga 7 jaali ni jakavita,” ndahenza mu ligulu, kandi vulamu vwange vwirana. Ndizominya Nyasaye Wuvunyali kandi ndahaana luyali nu vukumi ku omenya mihiga ni mihiga. Alakamiihi mihiga ni mihiga kandi vwamihi vwivwe vulakahindili zing'inga ziosi.

³⁵ Alolaa vandu vu mulirova kuva ikindu vuzwa, zingelosi mwigulu harara na vandu vaveeye kulilova, vaveeye hasi hu vwimiliri vwivwe. Siaveeyeho kali mulala unyala kuhing'ana nu vulaliri vwivwe mba, anoho unyala koteva mateeva kolondekana na gakoraa mba.

³⁶ “Lwu vulamu vwange vwirana, luyali lwange, vonene vwange kandi vukumi vwange vwirana ku inzi. Vamiihi vange kandi vandu vamenyi munyumba yu vwami, vanzingiliza kandi ndilanyilwa zinguru ziu vwamihi vwange kali nu luyali lonene ligali kuvita maziambiri.

³⁷ “Kalunu, Inzi Nebukadineza ndizominya, nimbana luyali kandi nu vukumi ku mwami wu mwigulu. Vuli kindu choosi chakolaa keveeye kilungi kandi chi likalaga lirungi, kandi agehizaa vuli mundu woosi oveeye ni liegingira.”