Danyeli 3 - KITABU KITAKATIFU

Nebukadineza yalaga vandu vosi kusigamira kifananyi

¹ Mwami Nebukadineza yaali ni kifananyi chizahabu zimita 27 kuzia igulu kandi vuvambalaru ahimbi zimita 3. Yalaga avandu vakisingilizi mu kereremo cha Dura mu kivala cha Babiloni.

² Maku mwami yahaana malago navungiza vanene harara; avana vu mwamihi, vasingiliri, avamihi, vaviiki va mabese, avakalagi, vayalizi, na vanene vandi vu mu kivala. Gavadukiraa vaze mu lisaaliswa lie kifananyi chu mwami Nebukadineza yaali nalombi.

³ Lwa vanene vaali ni vakavunga harara kusaalisa kandi kusigama imbiri wi kifananyi,

⁴ amakuva gavoolwa nu mwoyo munene, “Avandu vi vivala viosi, zihiiri ziosi, ni vi zinimi ziosi!

⁵ Lwa muhuliri mwoyo gwi kisiriva, kelondwa ku ni likuba lie lilele nu gwi lidienyi, nu gwi inangoli nu gwu vukana nu gwi lidulele harara ni vikuli vindi viosi ni vikubwa. Nonoho lwa vitanga kukubwa, gamuduukira mwiname haasi nu kusigamira kifananyi chi zahabu chu mwami Nebukadineza amali kusingiliza.

⁶ Mundu woosi uvula ku chinamira kandi kukisigamira, alasuuvwa mu lomemo lwu muliru.”

⁷ Lwa vahulira mwoyo gwi visiriva, vandu vi vivala viosi, zihiiri ziosi, kandi vamoloma zinimi ziosi vinama nivasigamira kifananyi chi izahabu chu mwami Nebukadineza yaali nalombi.

Valina va Danieli vavaga vayaalwa

⁸ Avandu va Babiloni vanyoola vwiyangu kuyaala vandu vi Ivuyuda.

⁹ Vavoolera mwami Nebukadineza, “O, mwami uhindili mihiga ni mihiga.

¹⁰ O, mwami, Ivi umali kuhaana malago ndi, nonoho lwu lwimbu lutanga kwimbwa, vuli mundu yiname hasi nu kusigamira kifananyi chi zahabu.

¹¹ Mundu woosi uvula kwinama hasi nu kusigamira kifananyi yiki, asiuvwi mu lomemo lwu muliru.

¹² Valala ku Vuyuda vu wavika vimiliri mu kivala cha Babiloni, ni: Sadaraka, Meshaka na Abedinego. Yava vavura kutia malago googo, O, mwami. Siva sigamira nyasaye woovo mba kandi sivinamira kifananyi cholombi mba.”

¹³ Lwene yilwo, mwami yaali nu vutima vonene kandi nalaga vasaza vavaga yava valetwe imbiri weve

¹⁴ Yavavolera, “Sadaraka, Meshaka, na Abedinego, gaveeye giligali musuyi kusigamira nyasaye wange kandi kwinamira kifananyi chizahabu chamali kolomba?

¹⁵ Nonoho lwa muhulira kisiriva, lilele, lidienyi, inangoli, lidulele, vukana ni mioyo ji vikubaa viosi mwiname hasi na musigamiri kifananyi. Niiva si mulakola ndio, hene yaho mulasiuvwa mu lomemo lwu muliru. Muganaganaa haveeye ho nu munyasaye unyala ku muhonya?”

¹⁶ Sadaraka, Meshaka, na Abedinego vativura nivavoora, “O, mwami, si kulageliza kwikinga aveene mba.

¹⁷ Niiva Nyasaye wakusaala aveeye nu vunyali kokohonyia kutura mu kisambiru cho lomemo lwu muliru kandi kutura ku vunyali vuvwo, maku alakola ndio.

¹⁸ Kali niiva sianyala kokora, O, mwami usuuviri ndi si kunyala kusigamira nyasaye woovo mba, kandi si kunyala kwinama hasi ku kifananyi chi zahabu cha olombi mba.”

Valina va Danieli vavaga vakalagirwa likuza

¹⁹ Maku Nebukadineza yaali nu vutima vonene ligali kali vwaloleka mu vweni vwivwe kigira Sadaraka, Meshaka, na Abedinego. Kunangwa yalagiza kesambilu kimedwe muliru keve kihiu papapa haali saba kuvita kazozo.

²⁰ Kandi yalagiza vasaza vizingulu kutura mu vandu vi liihi lilie vavohe vasaza vavaga yava nu kuvasiuva mu kisambiru cho lomemo lwu muliru,

²¹ kunangwa vavavoha ni viviki zinguvu ziavo! Mashati, ziganza, zikofia ni vindi viosi, ma nivavasiuva mu kisambiru cho lomemo lwu muliru.

²² Kigira mwami yaali nahaani malago madinyu kisambiru kemeedwe vuhiu, lomemo lwu muliru lwasamba valindi vaahira vasaza yava mu kisambiru.

²³ Maku Sadaraka, Meshaka, na Abedinego vaagwa mu lomemo lwu muliru ni vavoheywe.

²⁴ Nonoho Nebukadineza yatumatuma mu ligenya. Yateeva vayinziri veve, “Si kovohi vasaza vavaga yava kandi ni kuvasiuva mu kisambiru chu muliru?” Vativura “O, mwami, yee, kwakora ndio.”

²⁵ “Navuzwa kigira ki ndolaa vandu vane vagendagenda mu muliru? Si vavoheywe mba, kandi si vaveeye ku ne kelolero chu kumanyia ndi vasaliriziywi mba. Mundu wa kane, alolekaa kuli engelosi.”

Vasaza vavaga vavoholorwa no konenehizwa

²⁶ Kunangwa Nebukadineza yisunda ahimbi nu muliango gwi kisambiru cho lomemo lwu muliru nalaangaa, “Sadaraka! Meshaka! Abedinego! Avatumikiri va Nyasaye Munene! Tuli ichova!” Nonoho vatura ichova.

²⁷ Avana vu vwami vosi aviimiliri vu mwami, na vamiihi visunda himbi ha vasaza vavaga yava vavura kusalilizwa nu muliru. Muliru si gwasamba liisu liavo anoho zinguvu ziavo mba. Kandi sivali nu mwika gwu mwoki mba.

²⁸ Mwami yavoola, “Nyasaye wa Sadaraka, Meshaka na Abedinego yizominywe! Yatuma engelosi yeeye nesoola vandu yava avamusuuvira, si vaatia malago gange mba. Vaviika livamwoyo liavo mu vuhimwa mulivula kusigamira Nyasaye wundi nataveeye nyasaye wavo.

²⁹ “Kalunu ndagizaa ndi, mundu woosi wi kivala choosi, zihiiri ziosi, anoho lulimi lomoloma makuva gu kuchaya Nyasaye wa Sadaraka, Meshaka na Abedinego, vivero vivie viladonyanywa, na inyumba yeeye ilava kitumi cha makindi. Si aveeye ho na nyasaye wundi unyala kohonyia kuli ndi mba.”

³⁰ Maku mwami yahaana ku Sadaraka, Meshaka na Abedinego zidaraja zia higulu mu kivala cha Babiloni.