Danyeli 2 - KITABU KITAKATIFU

Amalooto gu mwami Nebukadineza

¹ Mwami Nebukadineza yaali na maloto mu muhiga gwa kaviri gwi liamiiha lilie. Maloto yaga gamuhendiza mwoyo ligali, kali si yagona mba.

² Kunangwa yalanga avavuuli, vakumu na valogi vaze kumwivaalira kivuni cha maloto geege. Vaza nivasingira imbiri wu mwami;

³ mwami yavavolera, “Mbeeye ni lihenda mwoyo ligali kigira maloto ga ndoti. Nyenya kumanya cha gavoora.”

⁴ Kunangwa vativulira mwami mu lulimi lwavo lwa Aramaiki nivavoora, “O, mwami wiitu, uhindili mihiga ni mihiga! Ligali okovolere maloto googo na kunyi kulakovoolera cha gavoora.”

⁵ Mwami yavavolera, “Nyenya mumbolere maloto gange kandi mumbolere cha gavoora. Nimutambolera, ndatandulanyia vivero vienyu kandi nduyanyie zinyumba zienyu zive vitumi via makindi.

⁶ Navuzwa nimumbolera maloto gange ni chagavolaa, ndamuha vihaanwa kandi luyali lunene. Kalunu mboleri maloto kandi chagavolaa.”

⁷ Vativulira mwami lwa kaviri nivavoora, “Niiva ivi mwami wiitu alakovolera cha aloti, kulamwivaalira cha maloto gavoora.”

⁸ Ing'inga yeyo, mwami yahanzuka navoora, “Kuli ng'anagana, mugerizaa konyoora vwiyangu vunyingi, kigira muloli ndi inzi mali kukalaga

⁹ kuhaana amageri ku munyi mwosi niiva si mulambolera maloto gange. Muvugilizani kuzizagilira kombolera vovehi kigira muganaganaa ndi hawundi ing'inga ilava ho lwa ngirung'ana. Mumbolere maloto gange, kunangwa manye munyala kombolera ichagavolaa.”

¹⁰ Avandu vovogeri vaativura nivavoora, “Sihaveeye ho nu mundu mulirova unyala kovoolera mwami cha yenya kumanya mba. Sihaveeye ho nu mwami, kali ave munene kandi wizingulu ligali wateva ku liteeva yili ku vavuuli, vakumu na valogi mba.

¹¹ Chu mwami ateeva keveeye kidinyu ligali kandi si haveeye ho nu mundu unyala kokora nivatali avanyasaye kandi sivamenyi na vandu mba.”

¹² Lwene yilwo mwami yizula vutima ligali kandi na haanaa malago ndi vandu vosi vo vogeri mu Babiloni viitwe.

¹³ Kunangwa malago gahaanwa vageri vosi viitwi harara na Danieli na valina veve.

Nyasaye avuuliraa Danieli cha maloto gavoora

¹⁴ Maku Danieli yazia ku Arioki mwimiliri wa valindi vu mwami, uwaali naalagiywi kokora kekolwa chu kwita vandu vo vogeri. Yaganagana kandi natovora makuva go kovora.

¹⁵ Yateeva Arioki kivuni chagira mwami nahaana malago malulu kuli yaga. Kunangwa Arioki yavolera Danieli chaali ni chekoleki.

¹⁶ Danieli yazia vwangu nanyoora munwa kutura ku mwami komeeda ing'inga, kunangwa aduuki kovoolera mwami cha maloto gavoora.

¹⁷ Maku Danieli yazia yengo navolera valina veve Hanania, Mishaeli na Azaria chaali ni chakwekoleka.

¹⁸ Danieli yavavolera vasaale ku Nyasaye wu Mwigulu kuvaha zimbavasi kandi kumuteeva avivaaliri a gimbisu gokogenyia kunangwa vavuli kwitwa harara na vageri vandi va Babiloni.

¹⁹ Maku vudiku yivwo agimbisu gokogenyia gavuulikira Danieli mu malola, na Danieli yizominya Nyasaye wu mwigulu.

²⁰ Yavoola, “Nyasaye aveeye mugeri kandi wizingulu. Kumwizominye mihiga ni mihiga.

²¹ Aveeye nu vunyali ku madiku ni zing'inga; avami kandi avatuliza, ni yie uhaana vageri kandi limanya.

²² Avuulaa ivindu viveeye musi kandi vievisu; amanyaa viosi viaviswa mu kisundi, naye mwene uvulavu vwa mukumberiza

²³ Ngwizominya nu kuhaana luyali kuivi Nyasaye wa vaguuga vange; umali kumba vogeri kandi zinguru; umali kuhaana mativuli gilisaala liange, kandi umali kukumanyia aga kovoolera mwami.”

Danieli Yivaala Kivuni cha Maloto

²⁴ Kunangwa Danieli yazia ku Arioki wu mwami yaali naheeye malago gu kwita avageri vosi mu Babiloni. Danieli yamuvolera, “Utaviita mba. Mbira imbiri wu mwami na inzi ndamuvolera cha maloto gavoora.”

²⁵ Nonoho Arioki yaahira Danieli imbiri wu mwami Nebukadineza namuvolera, “Mali konyoora mulala ku Vayuda vahambe unyala kokovoolera O, mwami wiitu cha maloto gavoora.”

²⁶ Mwami yavolera Danieli, walangwa kandi Beliteshaza, “Unyala kombolera maloto yaga, kandi chagavolaa?”

²⁷ Danieli yativura navoora, “Mwami sihaveeye ho nu mulogi, mukumu, muvuuli anoho avageri vi zing'ereng'ani vanyara kokovoolera yaga mba.

²⁸ Navuzwa aveeye ho na Nyasaye wu Mwigulu, uvula viokogenyia viaviswa. Akovoleraa O, mwami wiitu agazizaa kwekoleka mu madiku gaaza. Kalunu ndakovolera maloto googo, amalola ga walola lwa waali nogonaa.

²⁹ “O, Mwami wiitu, lwa waali nogonaa, walota kigira madiku gaaza: Nyasaye uvula viokogenyia vie mbisu, umali kukumanyia kizizaa kwekoleka.

³⁰ Henze agokogenyia yaga sigakuvulika kuinze kigira inzi mbeeye mugeri kuvita vandi vosi mba, navuzwa O, mwami wiitu gakuduukiraa umanye kivuni cha maloto googo kandi uduuki kumanya zing'anagani zimali kuduuka kuivi.

³¹ “O, mwami wiitu, mu maloto googo walola kifananyi kenene ni kisingiyi imbiri woovo. Chaali chaku king'ereng'anu, kandi chu kutihiza.

³² Mutwi gwacho gwalombwa kutura ku izahabu inyuki ligali; kilitu chacho na makono vialombwa kutura ku ifeza; kekenge ni zivazwa zia cho vialombwa kutura ku umugasa

³³ vilenge via cho vialombwa kutura ku kivia na zinduvatiru ziacho zialombwa lovega lulala ku kivia kandi luvega lundi lidohi.

³⁴ Lwa waali nohenza kifananyi yiki, ligina linene liadika kutura ku lwanda vugira mundu kulidiira; liaduya vilenge vie kivia kandi zinduvatiru zie kifananyi yiki, kandi liavisionoranyia ligali.

³⁵ Nonoho kivia, lidohi, mugasa, ifeza kandi izahabu viavunguluka nivigwa kuli luguki ku loze mu madiku gu muvasu. Imbuza yaginga luguki yilu lwosi, na yaleka loze lwere. Navuzwa ligina liamera niliviluka ni ligwa kiguru kenene chafuma lirova liosi.

³⁶ “Yaga nigo maloto gu mwami. Kalunu ndakovolera O, mwami wiitu, maloto yaga gavoora.

³⁷ O, mwami wiitu, cha ivi oveeye mwami munene ku vami vosi. Nyasaye wu mwigulu yakokola mwami kandi yakuha zinguru Zinene, vunyali kandi luyali.

³⁸ Yakokola wamihi avandu vosi mu lirova zinyama ziosi na manyonyi. Ivi oveeye omwutwi gwi izahabu zana yigwo.

³⁹ Uvwamihi wundi vulaza inyima woovo, navwo sivulakave ovonene kuli ivi mba. Kandi vulakave uvwamihi vwa kavaga, vwamihi vwu mugasa, vulakamiihi lirova liosi.

⁴⁰ Kandi vulakave ho uvwamihi vwa kane vwizinguru kuli kivia, vulakatanyie, kandi vulakavunanyie vindu viosi; kandi kuli kivia chatanyia ivindu viosi, vulakatanyie no kosionoranyia uvwami viosi viali ho kale,

⁴¹ kandi walola zinduvatiru ni vino viveeye halovega kivia kandi halovega madohi. Yaga ni kovora ndi vwamihi vulakavukane. Vulakave ni zinguru zie kivia kigira haveeye ho ni kivia kizuganyiywi na madohi.

⁴² Ivino viveeye halovega kivia, kandi halovega madohi, gavoora ndi vwamihi yivu vulakave halovega ni zinguru kandi halovega vulakave vodedekere.

⁴³ Walola kivia kandi nikizuganyiywi na madohi. Yaga gavoora ndi avami vu vwamihi valakagelizi kuhambanyia zinyumba ziavo mu liletana, navuzwa si valakanyale mba, kigira kivia sikihambanaa na madohi mba.

⁴⁴ Nyasaye wu mwigulu alakasingilizi vwamihi vulivula kohera ing'inga ya vami yavo. Vwami yivu si vuliguutwa mba, navuzwa vulakadivizi vwamihi vundi vwosi, maku vulakave ho mihiga ni mihiga.

⁴⁵ Walola kuli ligina liadika kutura ku lwanda vugira umundu kulidiira, kandi kuli liaduya kifananyi chalombwa kutura ku kivia, mugasa, madohi, ifeza, kandi izahabu. Nyasaye akovoleraa O, mwami wiitu ichawalota kandi ngovooleye kivuni cha maloto zana.”

Mwami Yahaana ku Danieli Madanyi

⁴⁶ Maku mwami Nebukadineza yinama kuduuka kumalova kandi nahaana malago ndi, visiuviliru ni vihaanwa vihanwe ku Danieli.

⁴⁷ Mwami yavoola, “Nyasaye woovo aveeye munene kuvita vanyasaye vandi vosi, kandi aveeye munene kuvita avami, kandi niyie uvula viokogenyia vievisa. Inzi manyi yaga kigira waali nu vunyali kwivaala viokogenyia vievisu yivi.”

⁴⁸ Maku yakola Danieli kuva mwimiliri munene, kandi naamuha vihaanwa vilahi, namukora mwimiliri wi kivala cha Babiloni kandi mwimiliri wa vahaani vi zing'anagani munyumba yu vwami.

⁴⁹ Danieli yateeva mwami aviiki Sadaraka, Meshaka, na Abedinego kwimilira makuva gi kivala cha Babiloni, navuzwa Danieli yaatigara munyumba yu vwami.