Danyeli 12 - KITABU KITAKATIFU

Ing'inga ye Keheri

¹ Engelosi yaali ni yiviiki iganza yavoola, “Ing'inga yene yeyo, Mikaeli engelosi enene, ulindaa vandu vovo, alakaloleke. Maku ilakave ho ing'inga yu vudinyu, indamanu ligali kali kutura zihiiri ziu kutanga nizivaho. Lwi ing'inga yene yeyo iliduuka, avandu vosi vi ihiiri yooyo, avamita gaavo gang'odwa mu kitabu cha Nyasaye valakahonywi.

² Avanyingi kuvo avaliva nivakuzi valakasimuguki; valala kuvo valakasangaliri livamwoyo lie mihiga ni mihiga, na vandi valakaduuki mu zisioni zie mihiga ni mihiga.

³ Avageri valakang'ereng'ane kuli vulavu vwu muvwerefu. Yavo avaliva nivigiza avandu vanyingi kokora agaveeye malungi, valakang'ereng'ane kuli zing'ereng'ani mihiga ni mihiga.”

⁴ Yamuvolera, “Danieli kunika kitabu, kandi ukevohe vudinyu ligali kandi uviiki ku muhuri, kuduuka ing'inga yi keheri chi lirova. Avandu vanyingi valakanyaguli yiyi ni yiyi kandi limanya lilakameedeke.”

⁵ Maku ndaalora avandu vaviri vasingiyi ku mugera, mulala ku vuli luginga.

⁶ Mulala kuvo yateeva engelosi yaali ni singiyi ihale ku luginga lwu mugera niyiviiki inguvu yi ikatani, “Vindu viu kogenya yivi vilavaho kuduuka ing'inga ki?”

⁷ Engelosi uwaali niyiviiki inguvu yikatani yaginga makono gombi mwigulu kandi nilomba lilagana mulieta lia Nyasaye omenya mihiga ni mihiga. Ndaahulira navoora, “Gilakave mihiga givaga ninusu. Lwi lidambizwa lia vandu va Nyasaye liliduuka ku keheri, vindu yivi vilakave ni vie kooleki.”

⁸ Ndaahulira gayavoola, navuzwa si ndagamanya mba. Maku ndateeva, “Navuzwa, Munene wange, ivindu yivi viosi vilakaduukizwi kuli ndi?”

⁹ Yandivulira, “Kalunu gakuduukiraa, uzie Danieli, kigira makuva yaga galakunikwa kandi gaviswi kuduuka ing'inga ye keheri.

¹⁰ Avandu vanyingi valakitakase kandi valakekole kuva valungi kandi vasiyiku, navuzwa vandu vachamu valakakole vuchamu, kandi sialakaveho mundu muchamu ulakamanye mba. Navuzwa vandu vageri veng'ine nivo avalimanya.

¹¹ “Galakave madiku 1,290 kutura ing'inga yi visiuviliru via vuli lidiku vilakahere, kuduuka ing'inga yu mundu alakaviiki ho kindu kidamanu ligali, kilakalete lidiviza.

¹² Vaveeye nu vugasu yavo avaveeye avasuuvirifu kuduuka madiku 1,335 galihera!

¹³ “Ivi, Danieli, ove musuuvirifu kuduuka ku keheri. Maku ulakakuzi, navuzwa ulakasimuguki ing'inga ye keheri nokonyoora madanyi googo.”