Danyeli 11 - KITABU KITAKATIFU

¹ Aveeye nu vunyali kongonya kandi kosoola.

² Ganzizaa kokovoolera kalunu, gaveeye ga giligali.” Engelosi yavoola, “Avami vandi vavaga vazizaa kwamiiha kivala cha Pasia. Yava valakalondwe nu mwami wundi wa kane uliva nu vutugi kuvita vandi vosi. Lwu lusuma lqu vutugi vwivwe luliva lwakalanda ligali alakatange vulwani nu vwamihi vwa vandu va Guriki.

Vwamihi vwa Egebeti na Siria

³ “Maku mwami wengolo alakaze. Alakamiihi kivala kenene kandi alakakole choosi chaalienya.

⁴ Navuzwa mu ing'inga yu lusuma lwi zinguru zizie, vwamihi vwivwe vulakavukane mu vidonye vine. Avami valiamiiha ha vogono vwivwe si valakatuli mu visukululwi vivie mba, kandi si valakave ni zinguru kuli zia yaali nazio mba.

⁵ “Mwami wa Egebeti alakave nizinguru. Mulala ku vanene vi liihi lilie alakave kali ni zinguru kandi alakamiihi kivala kenene kuvita chiche.

⁶ Mihiga minyingi nijimali kuvita, mwami wa Egebeti alakalombe lihambana harara nu mwami wa Siria, kandi alakamuhe mukaana weve kuli mukali, navuzwa vuhambani yivu si vulihindila mba. Mukaana oyo, musaza weve, mwana weve, kandi vatumikiri veve avaazia naye vosi valakitwi.

⁷ Nonoho, mulala ku viko vu mukaana oyo alakave mwami. Alakingiliri liihi liu mwami wa Siria, na kwingira mu imbinga yaavo nu kuvaguuta.

⁸ Alakilanye mu Egebeti vifananyi via vanyasaye kandi viju vie izahabu ni ifeza viali ni viagimwa ku vanyasaye vaavo. Lwinyima, mihiga jiduuki ji mirembe jilakave nijakavita,

⁹ mwami wa Siria alakingiliri Egebeti, navuzwa alakanigwi kwirana inyima mu kivala chiche.

¹⁰ “Avayaayi vu mwami wa Siria valaketegekere uvulwani kandi valakavungizi avandu vi liihe vanyingi ligali. Mulala kuvo alakisundi imbiri ligali nu kwingilira zimbinga zia vasigu vaavo kuli migera ja mazi manyingi.

¹¹ Mwami wa Egebeti alakingiliri mwami wa Siria nu vutima nu kugumira vandu veve vi liihi vanyingi ligali

¹² Alakekonye nukwigingira kigira vuguuti vwivwe kandi kigira kwiita vasikari vanyingi, navuzwa si alakazizagiliri kuva muguuti mba.

¹³ “Mwami wa Siria alakilane nu kuvungiza liihi linene kuvita lia yaali nalio maziambiri. Lwi ing'inga indahi iliduuka, alakilane ni liihi linene ni viugi vingingi ligali.

¹⁴ Maku vandu vanyingi valakibaale ku mwami wa Egebeti. Avandu valala vi zinguru kandi avalulu ligali kutura mu kivala chicho, valakibaale kigira malola ga vamali kolola, navuzwa valakaguutwi.

¹⁵ Kunangwa mwami wa Siria alakingiliri lidaala linene lie imbinga nu kulivugula. Avasikari va Egebeti si valakazizagiliri kulwaana mba, kali vasikari valahi ligali viliihi si valakave ni zinguru ziu kulwaana mba.

¹⁶ Musigu wa Siria alakakole choosi cha alienya vugira kugaywa. Alakasingiri mu kivala chu vukumi nu kukiviika mu zinguru zizie ligali.

¹⁷ “Mwami wa Siria alakalohizi vulwani, alakatumikiri liihi lilie liosi. Maku, mulidiviza vwamihi vwu musigu weve, alakalombe lihambana naye nu kumuha mukaana weve kuli mukali; navuzwa lilohiza lilie si lilakanyaliki mba.

¹⁸ Inyima wa yaga, alakingiliri zihiiri ziveeye kundulu kwi inyanza nu kuguuta zinyingi kuzio. Navuzwa mwimiliri mugeni alakamuguuti nokuheliza vwigingiri vwivwe. Alakilanyili mwami wa Siria liegingira lilie.

¹⁹ Mwami alakilane mu imbinga yu mu kivala chiche, navuzwa alakaguutwi, hene yaho kilakave keheri chiche.

²⁰ “Mwami wundi alakalonde mwami oyo. Alakatumi munene weve kudambiza vandu kutunga vusuuru, kunangwa vaduuki komeeda vutugi mu vwamihi vwivwe. Mwami oyo alakitwi mu ing'inga ingekeeke, navuzwa si alakitilwi imbiri wa vandu anoho mu vulwani mba.”

Mwami Mudamanu wa Siria

²¹ Engelosi yaazizagilira kwivaala: “Mwami wa Siria ulilonda ku alakave mundu mudamanu ulivula kwenyeka kuva mwami, navuzwa alakaze vugira kumanyikana nu kuvugura vwami munzira yu vugadi.

²² Amahi galakadivizwi no kwononywa imbiri weve, kandi vasaalisi va malago valakatulizwi ho.

²³ Alakagade zihiiri zindi no kolomba vuhambani navo. Alakameede zinguru ligali kuduuka lwa aliamiha avandu vakekeeke.

²⁴ Alakingiliri kivala chu vutugi vugira kuviganihiza, kandi alakakole vindu viokogenyia via vaguuga veve vukutanga vavura kokora mba, maku alakagavulanyile valondi veve vilaanye via yavugula mu liihi. Alakave ni lilohiza liokwingilira zimbinga, navuzwa ing'inga yeye iladuuka ku keheri vwangu.

²⁵ “Alakavungizi liihi linene liu kulwaana mwami wa Egebeti uliva ni yetegeki kulwaana ni liihi linene lie zinguru. Navuzwa mwami wa Egebeti alakagadwe, kandi si alakaguuti mba.

²⁶ Avagerihizi veve va himbi valakamudivizi. Avasikari veve vanyingi valakitwi, kandi liihi lilie lilakadivizwi.

²⁷ Maku avami vaviri yava valakikale nu kulira komesa indala, navuzwa zing'anagani ziavo zilakave zindamanu, kandi mulala alakagade wache. Si valakanyore chavenyaa mba, kigira ing'inga ya cho ilakave nikikiri kuduuka.

²⁸ Mwami wa Siria alakilane yengo ni vilaanye via yavugula natovoye kudiviza idini ya vandu va Nyasaye. Alakakole kuli yenya ma lirane mu kivala chiche.

²⁹ “Lwinyima, alakingiliri Egebeti kandi navuzwa ing'inga yiyi vindu vilakagilungane.

³⁰ Avandu kutura Roma valakazili mu zimeri nu kumwigalira; kandi alakave nu vuti ligali. “Maku alakagirungane mu vutima no kogeliza kudiviza idini ya vandu va Nyasaye. Alakalonde amigizu ga vandu valeka idini.

³¹ Valala ku vasikari veve valakononyie Litembeli. Valakasingilizi visiuviliru via vuli lidiku nu kuviika ho kindu kidamanu ligali keletaa lidiviza.

³² Mwami alakatumikiri vugadi kunyoola lidinyiriza kutura ku yavo avaleka idini yaavo, navuzwa yavo avaloonda Nyasaye, valakavalwaane.

³³ Aviimiliri vageri va vandu valakasange vogeri vwavo na vandi vanyingi. Navuzwa ku ing'inga engekeeke valala kuvo valakitwi mu vulwani anoho valakasambwe kuduuka ku likuza, na vandi valakanuulwi kandi valakakolwe avahambe.

³⁴ Lwi liitwa lilakave nilizizagiliraa, vandu va Nyasaye valakakonywe hakekeke kali niiva avanyingi kuvo valiva niviyunga navo kigira lieyenyela liavo.

³⁵ Valala ku vimiliri vageri valakitwi, navuzwa kigira yaga vandu vanyingi valakatakaswe. Yiki kilakazizagiliri kuduuka lwe keheri kilakaduuki, ing'inga ya Nyasaye amali kotovola.

³⁶ “Mwami wa Siria alakakole kuli aliyaanza. Alakigingiliri no kovora ndi oyo, aveeye munene kali kuvita munyasaye Wundi woosi, munene kali kuvita Nyasaye Wuvunyali. Alakave nuvunyari kokora ndio kuduuka lwi ing'inga iliduuka lwa Nyasaye alakahaane kuye mageri. Nyasaye alakakole kuli yamali kolohiza.

³⁷ Mwami alakasuuli nyasaye wa vaguuga veve vaasigamira kandi nyasaye wa vakali vayaanza. Mu giligali, alakasuuli vuli nyasaye kigira alakaganagane ndi aveeye munene kuvita vanyasaye vosi.

³⁸ Mu vugono vwene yivwo, alakahaane luyali ku vanyasaye vakingaa zimbinga. Alakahaane kihanwa chi izahabu, ifeza, magina guvuguli, kandi vihaanwa vindi viu vuguli ku nyasaye wa vaguuga veve vavura kusigamira.

³⁹ Alakatumikiri avandu vasigamira vanyasaye vageni kukinga zimbinga zizie. Alakahaane luyali lonene ku yavo valimuvugilira kuli mwami kandi alakavaviiki kulinda miyinzi minene, kandi alakavahe mulimi kuli madanyi.

⁴⁰ “Lwi ing'inga yu mwami wa Siria yu kumalirika iliva ahimbi kuduuka, mwami wa Egebeti alakamwingiliri, na mwami wa Siria alakamulwaane ni zinguru zizie ziosi. Alakatumikiri magare gu vulwani, zibarasi, kandi zimeri zinyingi Alakingiliri vivala vinyingi kuli amazi gi migelera.

⁴¹ Alakingiliri kivala cha valagilwa nu kwiita makomi gi zielefu, navuzwa vivala via Edomu, Moabu kandi kivala cha Amoni chaali ni kitigaye, viosi vilakahononoke.

⁴² Lwa lingilira vivala yivi viosi, kali kivala cha Egebeti si kilakatigale mba.

⁴³ Alakavuguri vutugi vwa vandu va Egebeti vavisa kuli izahabu, ifeza ni miandu jindi minyingi ju vuguli. Alakaguuti kivala cha Libia na Ezopia.

⁴⁴ Maku Amakuva galitulira Ivugwi kandi Ivaale; galakamudegelizi kandi kumukola kulwaana nu vutima vunyingi ligali; alakiti vandu vanyingi ligali.

⁴⁵ Alakumbake mahema manene gu vukumi hagati hi inyanza ni kiguru, havundu hi Litembeli liumbakwa. Navuzwa alakakuzi vugira mundu kumukonya.”