Danyeli 10 - KITABU KITAKATIFU

Malola ga Danieli Ku mugera gwa Tigurisi

¹ Mu muhiga gwa kavaga lwa Sairasi yaali mwami wa Pasia, Danieli ulangwa Beliteshaza yavulilwa likuva. Likuva yili liali liagiligali; navuzwa lidinyu ligali kulimanya. Likuva yili livaalwa kuye mu malola.

² Mu ing'inga yene yeyo, ndaali nisioma ku ing'inga ya masiza gavaga.

³ Si ndaalia chukulia kilahi, anoho kunwa iwaini, anoho kusanula liisu mba, kuduuka lwa masiza gavaga gaavita.

⁴ Ku lidiku lia 24 liu mweli gwu kutanga ku muhiga, ndaali nisingiyi kuluginga lwu mugera munene gwa Tigurisi.

⁵ Ndahenza igulu nendoraa umundu yiviiki zinguvu zie ikatani, kandi mu kesinde chiche yaali yevohi musibi mulahi gwi izahabu indahi kutura Ufazi.

⁶ Muviri gwigwe gwang'ereng'ana kuli ligina liu vuguli, mumoni mwimwe mwahemahema kuli oloheni, zimoni zizie ziaka kuli muliru. Makono harara ni vilenge vivie viang'ereng'ana kuli ligina liavakwa mugasa, kandi mwoyo gwigwe gwa hulirika kuli lifuma liu muganda gwa vandu vanyingi.

⁷ Ndaalora malola yaga inzi wengine. Avandu vandaali navo si valora kindu choosi mba, navuzwa vadegera niviruka kandi vivisa.

⁸ Vandeka inzi wengine nindoraa amalola gokogenyia yaga. Si ndaali ni zinguru mba, kandi mumoni mwange mwagilungana kali si haali ho numundu mulala waali unyala kumanyiriza mba.

⁹ Lwa ndahulira mwoyo gwigwe, ndagwa hasi mamumama niimbura kumanya ichekolekaa.

¹⁰ Maku mukono gwangimira kandi gusingiriza kumalu na makono gange, ningedegera.

¹¹ Engelosi ya mbolera, “Danieli, Nyasaye yakuyaanza. Si ngila kandi uhulirizi vulahi ku ganzizaa kovora. Inzi mali kutumwa kuivi.” Lwa yaali yakamala kovora yaga, ndasingira vulungi, navuzwa ndaali ningikiri mu lidegera.

¹² Maku yambolera, “Danieli, utatia mba Nyasaye umali kuhulira lisaala liilio kutura ing'inga yu kutanga lwa watovola kwegehiza kunangwa onyoore limanyiriza. Inzi mali kuduuka kigira gi lisaala liilio.

¹³ Engelosi ilindaa uvwami vwa Pasia yahing'ana na inzi ku madiku 21, maku Mikaeli indala ku zingelosi zinene yaza kongonya, kigira ndaali nendekeywi mu mwami wa Pasia

¹⁴ Mali kuduuka kunangwa ivi uduuki kumanya agazizaa kwekoleka ku vandu vovo mu madiku gaaza.” Yaga namalola kigira makuva gaaza.

¹⁵ Lwa yavoola yaga, ndahenza hasi vugira komoloma.

¹⁶ Maku engelosi, yaloleka kuli mundu, yanyira mukono gwigwe nadiira munwa gwange. Maku ndavoora, “O, mwami wange, malola yaga gaanombi kuva mudedekere kandi si nyara koleka kodegera mba.

¹⁷ Mbeeye kuli mutugwa imbiri wu munene weve; nyalandi komoloma ku ivi? Zinguru ni mieka jange jifeye.”

¹⁸ Oyo waloleka kuli mundu ya ndiraa kandi yamba zinguru.

¹⁹ Yavoola, “Nyasaye yakuyaanza, ku lwayago utaleka kindu choosi kikuhendizi mwoyo anoho kikutiihizi mba.” Lwa yaali ni yakavoola yaga, ndanyoora nzingulu kandi ni mboraa, “Mwami wange, moloma na inzi kigira ombeeye zinguru.”

²⁰ Maku yavoola, “Umanyi kigiri ninziza kuivi? Navuzwa kalunu ndirana kulwaana engelosi ilindaa uvwami vwa Pasia. Nindakamara kulwaana naye, engelosi ilindaa vwami vwa Guriki alaza.

²¹ Navuzwa ndakovolera agang'odwa mu kitabu cha giligali: Si aveeyeho nu mundu kali mulala wangonya, nitali Mikaeli engelosi ulindaa munyi avandu va Isiraeli.