Danyeli 1 - KITABU KITAKATIFU

MAKUVA GA DANIELI NA VALINA VEVE 1:1—6:28 Danieli na valina veve mu Kiyaalo cha Nebukadineza:

¹ Mu muhiga gwa kavaga gwi liamiiha liu mwami Jehoyakimu wi Ivuyuda, Nebukadineza mwami wa Babiloni yingilira Lidaala lia Jerusalemi kandi nalikumberiza.

² Yahova yaleka mwami Nebukadineza nagumira mwami Jehoyakimu kandi na vugula vilala ku viju vie Litembeli lia Nyasaye. Yaahira viju yivi mu kivala cha Babiloni, naviviika mu keng'oze chi litembeli lia vanyasaye veve.

³ Maku mwami yalaga Ashipenazi mwimiliri wa vanene veve vu mukiyaro, aleete valala ku vandu va Isiraeli, vombi kutura munyumba yu vwami kandi kutura mu inyumba yindi yoosi yu mundu munene;

⁴ avayaayi vi ligondo lilahi, avageri kandi avigizwa vulahi, avaveeye vwangu kwiga, kandi avaveeye vugira imbara. Vave avadukiru kutumika mu kiyaalo chu vwami. Ashipenazi alavigiza kosoma kandi kong'oda lulimi lwa vandu va Babiloni.

⁵ Mwami kandi yalaga ndi, avayaayi yava vanyoore chukulia kilala chere chu mwami yalizaaku, kandi iwaini ndala nzere yu mwami yanwezaa ku. Nivakigizwa ku mihiga 3, gavadukiraa valetwe imbiri wu mwami.

⁶ Valala ku vaatovolwa vaali: Danieli, Hanania, Mishaeli na Azaria; vosi vaatura mu ihiiri yi Ivuyuda.

⁷ Ashipenazi mwimiliri wa vanene vi kiyaalo yavagulika amita: Mahia Danieli yamugulika Beliteshaza, Hanania yamugulika Sadaraka, Mishaeli yamugulika Meshaka na Azaria yamugulika Abedinego.

⁸ Navuzwa Danieli yatovola avuli kwivika muvudamanu kigira lilia viukulia viu mwami anoho kunwa iwaini yeeye. Kunangwa yateeva Ashipenazi amuvugiliri avuli kwivika nuvudamanu.

⁹ Nyasaye yakola Ashipenazi kumanyia Danieli liyaanzilira kandi zimbavasi.

¹⁰ Ashipenazi yaali nu vuti nu mwami, kunangwa yavolera Danieli, “Mwami amali kotovola chukulia cha ivi ulia kandi cha unwa. Niiva si ulaloleka kuva nizinguru kuli avayaayi vandi, mwami alaanzita.”

¹¹ Maku Danieli yavolera mulindi wa Ashipenazi yaali natovoye alindi Danieli, Hanania, Mishaeli na Azaria,

¹² “Okogerizi kunyi avatumikiri vovo ku madiku 10; okohe zinguza kulie kandi amazi kunwi.

¹³ Maku ufananyie liiva lietu ni liiva lia vasoleri vandi avalizaa ku chukulia chu mwami kilahi, hene yaho, unyala kokokolera avatumwa vovo kuli ololaa.”

¹⁴ Kunangwa yavugilira, ma navageriza ku madiku 10.

¹⁵ Lwi ing'inga ya madiku 10 gaafwa, vaaloreka kuva avanifu kandi avizingulu kuvita avayaayi vandi vosi avalizaa ku chukulia chu mwami.

¹⁶ Kunangwa kutura lwene yilwo, mulindi wavo yavavugilira kulia zinguza havogono hi viukulia viu mwami yavatovolera.

¹⁷ Nyasaye yahaana ku vayaayi vane yava ovogeri kandi limanyiriza lie ling'oda zing'ano ziosi; kandi komeeda kogene yaga, yahaana ku Danieli ovogeri vwu kumanyiriza kandi kwivaala malola kandi amalooto zing'ano ziosi.

¹⁸ Lwi ing'inga yi mihiga 3 ju mwami yaviikaho jafwa, Ashipenazi yavugula vayaayi vosi navahira ku mwami Nebukadineza.

¹⁹ Mwami yamoloma ku vayaayi vosi; navuzwa Danieli, Hanania, Mishaeli na Azaria vayanziza mwami kuvita vayaayi vandi vosi. Kunangwa vakolwa kuva avatumikiri munyumba yu vwami.

²⁰ Ku makuva goosi gu mwami yateeva, anoho vudinyu vwosi vwu mwami yaleeta, avayaayi vane yava vamanya haali 10 kuvita muvuuli anoho mukumu wundi woosi munyumba yeeye yu vwami vwosi.

²¹ Danieli yamenya munyumba yu vwami kuduuka muhiga gwu kutanga gwu Mwami Sairasi wa Pasia yaguuta kivala cha Babiloni.