Ayubu 9 - KITABU KITAKATIFU

Ayubu

¹ Maku, Ayubu yativura,

² Ligali Inzi manya ndi aga umali kovora na giligali. Navuzwa mundu anyala kuva ndi mulungi imbiri wa Nyasaye?

³ Mundu anyala ndi kuhing'ana na Nyasaye? Nyasaye anyala koteeva amateeva elefu navuzwa siaveeyeho nu mulala unyala kumutivulira.

⁴ Nyasaye aveeye mugeri kandi aveeye wi zinguru. Nivwaha unyala kuhing'ana na Nyasaye ma aguuti?

⁵ Nyasaye asuundaa vigulu vugira yivio kumanya; kandi avitung'aminyaa mu vutima vwivwe.

⁶ Nyasaye asungusaa lirova kutura mu vogono vwalio, kandi akolaa zitiru zialio zidegera.

⁷ Nyasaye alaangaa liuva livuli kotonga, kandi yigalira zing'ereng'ani zivuli kong'ereng'ana vudiku.

⁸ Oyo yeng'ine niyie uwaala ligulu, kandi niyie uwaseena seena gunyama gonene gwu munyanza nukugwita.

⁹ Yalomba zing'ereng'ani zilangangwa “Iliaga linene, Orioni na Pleiadesi,” kandi ni zing'ereng'ani zia Isavaalu.

¹⁰ Akolaa vindu vinene ligali viu mundu anyala kuvula kumanyiriza kandi yakola vindu vinyingi viokogenyia ivitaveeye nilivaliza.

¹¹ Ligali lwavita ahimbi ni inzi, simulolaa mba, kandi avitaa kuzia imbiri, na simumanyirizaa mba.

¹² Ligali, Nyasaye avugulaa choosi cha yenya, na siaveeyeho nu mundu unyala kumugaya mba, siaveeyeho nunyala kuluvilira ku muteeva, “Okolaa ki?”

¹³ Nyasaye sianyala kugirung'anyia uvutima vwivwe mba; yashonoranyia avasigu veve avakonya Rahabu ukuhingana naye.

¹⁴ Kunangwa, nyara ndi kutivulira Nyasaye? Nyara ndi konyoora makuva gu kuhangalizana naye?

¹⁵ Kali niiva mbeeye mulungi, vugira lihiolo, sinyala kumutivulira kindu mba. Nyara vuzwa kogonya Nyasaye, umukalagi wange yaambere zimbavasi.

¹⁶ Kali niiva ndakamulangi, naye yaandivuliri, sindakasuuviyi ndi, ahulirizaa ku agambooraa mba.

¹⁷ Nyasaye yakanduvaganyi ni ikiihi, nokomeda zing'oma ziange vugira kivuni.

¹⁸ Siyakandeki mbeerane mwika kali hakuzu mba, navuzwa livamwoyo liange lizuuyi uvusaliri vululu ligali.

¹⁹ Niiva ni ligerana lie zinguru Nyasaye aveeye ni zinguru, kumbita inzi. Niiva na makuva gi likalaga lirungi, nivwaha unyala kumuleeta mu kiyaalo?

²⁰ Kali niiva mbeeye mulungi, vugira lihiolo, navuzwa makuva gange gene galangalagira; kali niiva mbeeye vugira imbara, Nyasaye yakandolekizi ndi mbeeye muchamu ligali.

²¹ Kali niiva mbeeye vugira imbara, simbendaa mwoyo ku kinyala kwekoleka ku inzi mba. Mbihiliraa livamwoyo liange.

²² Goosi gaveeye malala meere; kunangwa mboraa, Nyasaye adivizaa vombi, avalungi na vachamu.

²³ Lwi kivi keleetaa likuza vwangu ku mundu mulungi, Nyasaye asekeliza kivi kiduukaa ku vandu valungi.

²⁴ Nyasaye yahaana kivala ku vachamu, kandi afumaa zimoni zia vakalagi, kandi niiva siaveeye Nyasaye waavikola, ku nivwaha waavikola?

²⁵ Kalunu madiku gi livamwoyo liange ganyagulaa zimbiru ligali vwangu, kuvita munyaguli. Girukaa ligali, sigalolaa uvulahi mba.

²⁶ Livamwoyo liange livitaa vwangu kuli liato lia vwangu ligali, kuli indizu yikaa vwangu kumamira kifoyo.

²⁷ Kali nimbora, “Ndivilira lielilira liange,” ndaleka liiva liange lio vovereri, nukuva nuvusangali.

²⁸ Inzi mbeeye nu uvuti kigira uvusaliri vwange vwosi, kigira manya ligali ndi, Nyasaye sialambaliza kuva oveeye vugira imbara mba.

²⁹ Niiva mali kukalagirwa kuva muhioli, kigira ki nyang'ana vuzwa?

³⁰ Niiva ndisaava umwene ni likonza, nukunihiza makono gange ni isavuni;

³¹ Nyasaye asiuvi mu vogo vwo vodohi vufunyaa, kandi zinguvu ziange zilambihilira.

³² Niiva Nyasaye yakavee mundu kuli inzi, ndakamutivuliyi makuva gange; ngano kwakaziiyi mu kiyaalo kuyaarana, ma kuduuki kukalagirwa amakuva giitu.

³³ Navuzwa sihaveeye ho nu mundu unyala kukalaga hagati hiitu mba, sihaveeye ho nu mundu ukalaga hagati ha Nyasaye ninzi mba.

³⁴ O, Nyasaye, lekera kuhaana mageri ku inzi. Kandi tulizaho litihiza liilio ku inzi.

³⁵ Hene yaho, inzi ndamoloma vugira vuti ku ivi, O, Nyasaye, kigira inzi manya mwoyo gwange umwene.