Ayubu 8 - KITABU KITAKATIFU

Bilidadi

¹ Maku Bilidadi mulina weve kutura Shua yavoola,

² Ivi ulavoola vindu yivi kuduuka ng'inga ki? Makuva googo galava kuli imbuza kuduuka ng'inga ki?

³ Uganaganaa Nyasaye achaminyaa likalaga lirungi? Anoho uganaganaa Wuvunyali achaminyaa uvulungi?

⁴ Niiva avana vovo vayona imbiri weve, Nyasaye umali kuhaana amageri kuvo kolondekana nuvwoni vwavo.

⁵ Niiva ulenyeleriza Nyasaye ligali, nokogoonya Wuvunyali,

⁶ niiva oveeye musereeze mu mwoyo kandi mulungi imbiri wa Nyasaye, ligali kalunu alaza kokokonya, kandi alakugasiza nu kuhaana ku ivi amadanyi go vomenyo vwu vulungi vuvwo.

⁷ Kali niiva litanga liilio liali likekeeke, amadiku googo gukumaliriza galava guvugaasu ligali.

⁸ Mwaza, teveleriza amakuva go ovogeri vwa maziambiri, na uganagane ku agiligali aga vaguuga viitu viga.

⁹ Livamwoyo lietu liveeye likekeeke, na sikumanyi kindu kali hakuzu; kuvitaa kuli chiriri ku lirova.

¹⁰ Navuzwa leka avageri va maziambiri va kwigizi; hulirizi ku makuva ga vavola.

¹¹ “Mafunzu sigameraa havundu hekedende kitaveeye mba; kandi vidundu sivimeraa ha amazi gataveeye mba.

¹² Lwa vitagwa yivi vikikiri ni kimuli, kandi nivikikiri kotemwa, viniara imbiri wi vitagwa vindi viosi.

¹³ Yizi nizio zinzira zia vandu vosi aviviliraa Nyasaye; na lisuuvirizwa liu umundu utamanyi Nyasaye liladiva.

¹⁴ Mundu uyu, lidinyirizwa lilie lilatulizwa ho; kandi lisuuvirizwa lilie lilava kuli inyumba yu uluvuvi.

¹⁵ Mundu uyu yesedemaa kunyumba yeeye, navuzwa siisingira mba; agidiliraa, navuzwa siyindiraa mba.

¹⁶ “Mundu uyu aveeye kuli kitagwa kisamiywi amazi mu muvasu, ma kihiraa miri jacho mu malova.

¹⁷ Imiri jacho jierizanyia ku magina, kandi jigumira vudinyu ku magina.

¹⁸ Niiva mundu uyu aladivizwa kutura mu vomenyo vwivwe, hene yaho, vomenyo vwivwe vulamwambakana nokovoora, inzi sindaakololaku mba.

¹⁹ Henza, yivu nivwo vusangali vwu mundu uyu, na avandi valaza nu kuvugura ovogono vwivwe

²⁰ “Ligali, Nyasaye sialaleka avasuuvirifu veve mba, kandi sialakonya avakolaa uvudamanu mba.

²¹ Ulava ni liseka linyingi ligali, kandi ulizula isango yuvusangali.

²² Navuzwa yavo avakudunyiraa valava mu zisoni. Kandi zinyumba zia vachamu ziladivizwa.”