Ayubu 7 - KITABU KITAKATIFU

¹ Livamwoyo liu mundu ku lirova liveeye kuli liyinzira liukuniga mu liihi, kandi liveeye kuli miyinzi midinyu jamakono.

² Kandi liveeye kuli muhambe uwegombaa kuva mu chiriri kandi kuli muyinziri alindiliraa kutungwa mitungu ju vuyinziri.

³ Kunangwa Nyasaye ombeeye mieli ju vudinyu kandi juvusaliri kandi yandeteraa vovereri vuli vudiku.

⁴ Lwa ng'onaa hasi vudiku, nzeteevaa navuchi ng'inga ki? Navuzwa uvudiku vuvezaa uvutambi; ng'ilung'anaa yiyi na yiyi mbula vuche.

⁵ Muviri gwange gwizuuyi zing'ende, kandi gwiyi makindi ga marova. Ligodo liu muviri gwange lihandi ku muviri, kandi liyavuguki.

⁶ Madiku gilivamwoyo liange livita vwangu ligali kuli kinaviru chu munavi. Kandi livamwoyo liange liduuki ku kiheri vugira lisuuvirizwa.

⁷ Wizulizi, O, Nyasaye, livamwoyo liange liveeye kuli mwika, emoni yange silalola uvulahi kandi mba.

⁸ Emoni ya uyu ondolaa, sialandola kandi mba. Zimoni zizio zilahenza ku inzi, navuzwa sindavaho kandi mba.

⁹ Kuli lilesi liveeye mwigulu likamaa nokogota, kandi ndio uyu uzizaa mu kihadisi si aliloleka kulirova kandi mba.

¹⁰ Sialiirana kandi munyumba yeeye mba, kandi avandu vinyumba yeeye sivalamumanya kandi mba.

¹¹ Kigira yaga, sinyala kwigalira munwa gwange guvuli komoloma mba. Ndamoloma mu vusaliri vwange; kandi ndalira mu vuzunu vwange.

¹² Inzi mbeeye inyanza, anoho inyama enene yu munyanza? Siunyala kuviika vulindi ku inzi mba.

¹³ Inzi ng'onaa hasi nokogeriza kosoosa. Nyenyerizaa lileminywa mwoyo gwange kutura ku vuzunu vwange.

¹⁴ Navuzwa ondetera maloto gu kundiihiza, kandi ndolaa malola gu kutihiza ligali.

¹⁵ Ndakayanzi kumigwa nu kukuza, kuvita komenya mu muviri yigu ugwizuyi uvuzunu no vovereri.

¹⁶ Inzi mbihiriraa livamwoyo liange madiku goosi, ondeke mbe, madiku gi livamwoyo liange gaveeye hazwa kuli mwika.

¹⁷ Kigira ki mundu siaveeye kindu ku ivi? Kigira ki uhulirizi ku agakolaa?

¹⁸ Ivi ohenzeriza mundu vuli kazozo mugambazuri, kandi umugerizaa vuli ing'inga.

¹⁹ Ivi siunyala kohenza halovega kutura ku inzi anoho ondeke kali kung'inga engekeeke?

²⁰ Niiva ndakora uvwoni, nyara kukokolera ki ivi muhenzerizi wa vandu? Kigira ki ivi onombi kuva kelolero chu kulasa? Kandi kigira ki ngwiyi umusigu mulitu ligali ku ivi?

²¹ Kigira ki uvuli kusamiiha mahiolo gange? Kandi kigira ki uvuli kutuliza ho uvudamanu vwange vwosi? Kalunu inzi ndakuza, na ulanyenya ligali, navuzwa siulandola kandi mba.