Ayubu 5 - KITABU KITAKATIFU

¹ Waniri kalunu, Ayubu. Olole niiva haveeye ho nu mulala ukutivulira. Eveeye ho nengelosi ya unyala kuzia kuyo ekokoonye?

² Uvutima vululu vwitaa musiru, kandi embodoka yitaa avayingu.

³ Inzi mali kolola avasiru ni vaveeye ni mirembe, navuzwa nonoho Nyasaye yalaama nukuvatuliza ho.

⁴ Avayaayi vaavo sivanyala konyoora vohonyi; na sihali ho nu mundu unyala kuvakinga lwa vasingira mu kiyaalo mba.

⁵ Avandu viinzala valalia ligesa lia vasiru, kali valavugula vuswage vuvilukiraa hagati ha mafwa; kandi avuvuluhu valakendekera vutugi vwivwe.

⁶ Uvudamanu sivuvirukaa kutura mu luguchi mba, anoho ikivi sikemeraa kutura mu marova kuli indiva mba.

⁷ Navuzwa mundu yiivulwa anyoore kivi kuli zisese ziumuliru ziduumaa igulu.

⁸ Niiva ndakaveeye ivi Ayubu, ndakagirungani kuzia ku Nyasaye yangonye, nokuviika vudinyu vwange kuye.

⁹ Sikunyala kumanyiriza vindu vinene viakolaa, kandi siviveeye nekeheri ku vilolekizu vivie mba.

¹⁰ Nyasaye aleetaa imbura ku lirova, nukusama amazi mu milimi.

¹¹ Yee, ni Nyasaye onenehizaa avegehizaa, kandi ahaanaa uvusangari ku yavo avasioma.

¹² Yononyia, lilohiza lia avagaadi, kunangwa vavuli kuduukiza agavasaavira kokora.

¹³ Agumiraa avageri mu vogeri vwavo; Kandi agayaa lilohiza liavo liu vugadi ma lihelizwa vwangu.

¹⁴ Kisundi kivakunikaa lwa voveeye mbasu, kandi vahavatizaa mbasu hagati kuli mu vudiku.

¹⁵ Navuzwa Nyasaye ahonyia avavisandu vavuli kwitwa, ahonyia avadaka kutura mu makono ga avizingulu.

¹⁶ Ahaanaa lisuuvirizwa ku avadaka kandi achiring'anyia avachamu.

¹⁷ Aveeye nuvugasu mundu oyo wa Nyasaye aheezaa mageri! Nandio utalegeriza lihaana mageri liu Wuvunyali mba.

¹⁸ Nyasaye yaataa zing'oma, navuzwa kandi avoheleraa zing'oma zana. Asaliriza, navuzwa ahonyia kandi.

¹⁹ Alakohonyia kutura mu vudinyu sita. Mu kivi cha saba, uvudamanu sivulakudiira kali hakuzu mba.

²⁰ Mu ing'inga yinzara, alamukola kuva mwoyo, mu ing'inga yu vulwani vululu kandi alamukinga kutura mu likuza.

²¹ Nyasaye alakukinga kutura ku avandu vu kukugina amakuva. Alakohonyia lwi lidivizwa liduka.

²² Ivi ulasekeriza lidivizwa kandi inzara. Kandi siulatia zinyama ziumbulimu mba.

²³ Milimi ja mulimaa sijilava mu na magina mba; zinyama ziumbulimu sizilakwingilira kali hakuzu mba.

²⁴ Maku ulamenya mu mirembe mu lihema liilio; ulanyora mitugu jijo, josi nijiveeye mu mirembe lwujiluuta.

²⁵ Ulava ni visikululwi vinyingi, kuli vunyasi mu milimi.

²⁶ Ulakuza noveeye mukungu ligali, kuli kiganda chi ingano ilavi vulahi, eleteywe koloze ing'inga yiligesa.

²⁷ Henza yili ni lienyeleriza lietu; gaveeye agiligali, uhuliri kandi umanye, gaveeye kigira uvulahi vuvwo.