Ayubu 41 - KITABU KITAKATIFU

¹ “Unyala kulimbika inyama enene yumumazi ilangwa leviazani nendoani? Anoho kovoha lulimi lwayo nu mugoye?

² Unyala kovoha mugoye guvitiri mu muulu gayo? Anoho ufuduli ulusaya lwayo ne ndoani?

³ Inyala kokogoonya ugilakule izie, inyala kukogoonya ogeveere zimbavasi?

⁴ Ilalomba lilagana niivi kandi ikusuuvirizi ndi ilakutumikira mihiga ni mihiga?

⁵ Unyala kogevoha kuli linyonyi liukukinila, kuli kindu chokogenyia ku vatumikiri vovo vakana?

⁶ Uganagana vakiranyi valasindanira ku vuguli vwayo? Uganagana valagikalaganyia nukugavulana?

⁷ Unyala kotooza ligodo liayo namatimu gukuluvira? Anoho kotooza mutwi gwayo na matimu gukuluva zisuzi?

⁸ Geriza ugidiiri nu mukono, na siuligeriza kokora ndio kandi mba; Siulakiviliri uvulwani yivwo mba!

⁹ “Mundu woosi olola Leviazani, akuzaa mwoyo maagwa hasi.

¹⁰ Sihaveeyeho nu mundu kali mululu unyala kuruvilira kugitindira mba. Kunangwa, nivwaha unyala kusingira imbiri wange?

¹¹ Nivwaha umali kumba ikindu kunangwa nduuki kumutunga? Choosi ekeveeye isi wi ligulu liosi nichange.

¹² “Leka ngovolere makuva gi virenge via Leviazani, nukwivaala kuli aveeye munene kandi wizingulu zinene.

¹³ Siaveeye ho numundu unyala kutandura likoti lilie lieyigulu mba. Anoho unyala kufudula isalamba ya yiviika mba.

¹⁴ Nivwaha unyala kukunula munwa gwayo? Amiinu gayo gizimbega ziosi gaveeye gukutihiza ligali.

¹⁵ Mugongo gwayo gwalombwa ni zimbaso zie inguva, ziagerekana harara kandi zindinyu ligali kuli ligina.

¹⁶ Vuli inguva yaagumirana vudinyu ku iyindi kali mieka sijinyala kuvita hagati hago mba.

¹⁷ Gagumirana harara vudinyu lilala ku lindi; gagumirana harara kali siganyala kwavukanywa mba.

¹⁸ Uvulavu vong'ereng'anaa lwa yasamulaa, kandi zimoni ziayo ziakaa kuli liuva litongaa.

¹⁹ Zimemo ziadukaa kutura mu munwa gwayo; kandi zisese ziumuliru ziduumaa igulu.

²⁰ Mwoki guvuuyaa kutura mu muulu gayo, kuli mwoki gutulaa ku indiva ihilaa isi winyingu itavagiraa.

²¹ Mwika gwayo gwakizaa manda, lomemo lwu muliru lwadukaa kutura mu munwa gwayo.

²² Ligoti liayo liveeye nizinguru zinene ligali kali ku vosi avaganaa nayo vatihizwa ligali.

²³ Amaganyi gi zinyama ziayo gagumirana harara; gadinyirana vudinyu ligali na sizinyala kusuundwa mba.

²⁴ Mwoyo gwayo gwadinya ligali kuli ligina, mudinyu kuli lugina lwu kusiera ku.

²⁵ Lwa ivuukaa kali vizingulu ligali vatihizwa ligali; viranaa inyima nukutimukwa engolo.

²⁶ Sihali ho nikivavi ikinyala kugetema mba; sihali ho nilitimu anoho losere anoho chugi kindi choosi kinyala kugisaliriza mba.

²⁷ Kuyo kivia keveeye vuzwa kuli vunyasi, na umugasa kuli musaala gwagunda.

²⁸ Umbano gwuvuta sigunyala kugekola yiruki mba. Amagina galaswa kuyo gaveeye vuzwa kuli umukuzi.

²⁹ Kigurumi keveeye vuzwa kuli uluvuva kuyo; kandi esekaa vuzwa lwa vasaza vagilasaa matimu.

³⁰ Amagamba ku inda yayo gaveeye kuli vijonjo viugi viagikunika; gagoovaa nukutandula vodohi kuli kiju chukuhula vuswage.

³¹ Ivuruganyiaa inyanza kuli amazi gatavagiraa mu inyingu. Kandi ekolaa inyanza itulaa ulufulu kuli inyingu ya maguta gu kwivaka.

³² Lwa ivitaa, elekaa inzira neng'ereng'anaa inyima; kandi igirung'anyian inyanza kuva kuli ulufulu lulavu.

³³ Sihali ho nikindu ku lirova chukufananywa na Leviazani mba; yicho keveeye kelombe kitaveeye nuvuti.

³⁴ Alegelizaa kali zinyama ziosi ziegingiraa ligali kuvita; aveeye mwami wizinyama zinduru ziosi ziumbulimu.”