Ayubu 40 - KITABU KITAKATIFU

¹ Kandi Yahova yaazizagilira kovoolera Ayubu:

² “Umuhenzerizi wuvudamanu anyala kuhing'ana na Nyasaye Wuvunyali? Oyo uhangalizanaa na Nyasaye, leka amutivuri!”

Ayubu

³ Maku Ayubu yativulira Yahova:

⁴ Henza, Inzi simbeeye kindu ligali mba; nyala kukutivulira ki? Sindageriza kovora kindu kindi choosi mba.

⁵ Mali kovora, na sindativula kandi mba. Ndadinyiriza kovora ligali, navuzwa sindazizagilira komoloma mba.

⁶ Maku, Yahova yamoloma ku Ayubu kutura mu imbura yi kiihi:

Yahova

⁷ Singira vudinyu kalunu kuli musaza; ndakoteeva mateeva gange, na undivuliri.

⁸ Unyala kali kumbika mu vudamanu? Unyala kungaragira kuva muhioli ku uduuki kwekola mulungi?

⁹ Oveeye ni zinguru kuli ziange? mwoyo gugwo gunyala kwatuluruka vudinyu kuli gwange?

¹⁰ Niiva nindio, singira mu luyali kandi lizominywa liilio. Wiviki umwene vonene kandi vukumi.

¹¹ Viika uvutima vuvwo kuvo; kandi henza ku yavo vosi avuluyali, kandi uvaleganyie.

¹² Yee, henza ku avigingiri na uviikizi hasi; duvulanyia vachamu havundu ha vasingira.

¹³ Uvayaviri vosi mu marova harara, uvavohere mu kilindwa.

¹⁴ Maku inzi ndava wukutanga kukwizominya. Kandi uvugiliri ndi zinguru zizio mwene nizio zikoheeye liguuta.

¹⁵ “Henza inyama enene ilangwa inguvu, ya ndalomba kuli ndalomba ivi yaya uvunyasi kuli eng'ombe.

¹⁶ Eveeye ni zinguru ki mu muviri gwayo? Kandi eveeye ni zinguru ki mu zinyama ziayo?

¹⁷ Mukila gwayo gwasingira kuli mudaragwa, kandi zinyama ziu muvirenge viayo ziveeye nizinguru.

¹⁸ Vigumba viayo viveeye nizinguru kuli mugasa, kandi virenge viayo viveeye kuli vidonye vie kivia.

¹⁹ “Eveeye yokogenyia ligali ku vilombe viange viosi! Mulombi wayo yeng'ine niyie unyala kugiguuta.

²⁰ Uvunyasi vwu kugilihiza vuvirukaa ku vigulu, uwizinyama ziu mbulimu ziosi zikiniraa.

²¹ Egonaa hasi isi muvulimu vwa mafwa, Kandi yiivisa hagati ha mafunzu mu kedende.

²² Misaala ji viriri jigikunikaa. Misaala jukuvisinukilu via mazi vigikumbirizaa.

²³ Sieveeye nuvuti lwu mugera gunyagulaa zimbiru, ehomataa vuzwa lwu mugera gwa Jorodani gukuyaa mu moni mwayo.

²⁴ Nivwaha unyala kugivakuliza ma agigumiri? Anoho nivwaha unyala kugumira muulu gayo nu mutego?”