Ayubu 4 - KITABU KITAKATIFU

Livoolerana liu Kutanga 4:1—14:22 Elifazi

¹ Maku Elifazi kutura Temani yateeva,

² Ayubu, niiva ndageriza kokovoolera likuva ulasinyika? Navuzwa nivwaha unyala kwiyigalira avuli komoloma?

³ Ivi wamala kwigiza nukudinyiriza vandu vanyingi, nukuhaana zinguru ku vandu vadedekere.

⁴ Amakuva googo gamala kudinyiriza yavo vaakuza mioyo. Umali kudinyiriza yavo avaveeye vadedekere kandi vamali kuluha.

⁵ Navuzwa kalunu vudinyu vuduuki ku ivi, na ivi uvuli kuva niliekuzira; vukusalirizi na ukuzi mwoyo nukutihizwa.

⁶ Lisigamira Nyasaye liilio liveeye uvuluviliri vuvwo, uvusuuvirifu nuvulungi vwi zinzira zizio voveeye lisuuvirizwa liilio?

⁷ Wizulizi makuva yaga kalunu Ayubu, nivwaha wa Nyasaye yadiviza ku vuzwa nataveeye ni lihiolo? Anoho ni haliha ha vandu valungi vakalagirwa?

⁸ Mali kolola vandu ni vakora uvudamanu kandi nivamizaa uvudinyu kuli mulimi amizaa uvuguza, navuzwa vagesa vuzwa uvudamanu.

⁹ Nyasaye, avadiviza nu mwika gwigwe gwu vutima. Kandi liatuluka liu vutima vwivwe vagotaa.

¹⁰ Avachamu vahumaa kuli isimba. Navuzwa Nyasaye avachiring'anyia nukuvunanyia amiinu gavo.

¹¹ Avachamu yava vakuza kuli zisimba zitanyooye kindu cha zilia na avana vaavo vosi valasalana kuli avana vi isimba ingali.

¹² Maku likuva lialetwa ku inzi machiriri, na ndaahulira livoora lialio.

¹³ Hagati hi zing'anagani ziatula mu malola guvudiku, lwi zindoolo zinene zigumiraa avandu.

¹⁴ Ndaali mu lihenda mwoyo kandi lidegera, nu muviri gwange gwosi gwihika ligali kigira uvuti.

¹⁵ Umwika gwu vukindu gwavita imbiri wange, na amaswa gasingira vulungi ku muviri gwange kigira uvuti vonene.

¹⁶ Kindu chasingira makiriri imbiri wange, ndaachumika, navuzwa sindali nyara kumanya ligondo liacho mba. Kifananyi chaali imbiri wange kandi haali ho ni lichiring'ana. Maku ndaahulira mwoyo nigovoora:

¹⁷ “Umundu wilikuza anyala kuva mulungi kuvita Nyasaye? Mundu anyala kuva muduukiru kuvita Mulombi weve?

¹⁸ Kali Nyasaye si asuviraa vatumikiri veve vatakatifu, kandi anyoora zingelosi veve na mahiolo mba.

¹⁹ Muganaganaa alasuuvira kelombe chovodohi, kindu chalombwa kutura kuluguchi, ikinyala kuduvulanywa vuzwa kuvita esere?

²⁰ Mundu anyala kuva mwoyo hamugamba, navuzwa akuzaa vuzwa vugira kumanyikana hamugorova.

²¹ Niiva mugoye gwi lihema liavo gwifwa kutura muvo, valakuza vuzwa, vugira konyoora vogeri.”